អត្តពលិកជាង ១,៨០០នាក់ នឹងចូលរួមព្រឹត្តិការណ៍រត់ប្រណាំងឆ្លងកាត់ឧបសគ្គចម្ងាយ ឆ្ងាយ "Angkor Ultra Trail" លើកទី៨ ឆ្នាំ២០២៥ នៅតំបន់អង្គរ ស្អែកនេះ

អត្តពលិកប្រមាណជាង ១,៨០០នាក់ មកពី ៥០ប្រទេស លើពិភពលោក នឹងចូលរួមទិវារត់ប្រណាំងឆ្លងកាត់ឧបសគ្គចម្ងាយឆ្ងាយ "Angkor Ultra Trail" លើកទី៨ នៅតំបន់អង្គរ ខេត្តសៀមរាប នាថ្ងៃទី១៨ ខែមករា ឆ្នាំ២០២៥ ស្អែកនេះ។ នេះបើតាមការបញ្ជាក់របស់ ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) ។

ឯកឧត្តម បានឲឱ្យដឹងថា យោងតាមព័ត៌មានបឋមចុងក្រោយ គឺមានអត្តពលិកជាង ១,៨០០នាក់ មកពី ៥០ប្រទេស បានចុះឈ្មោះចូលរួមព្រឹត្តិការណ៍រត់ចម្ងាយឆ្ងាយលើទឹកដីអង្គរ នាចុងសប្ដាហ៍នេះ ហើយប្រទេសដែលមានអត្តពលិកចូលរួមច្រើនជាងគេ មាន: បារាំង កម្ពុជា វៀតណាម ថៃ និងអាមេរិកជាដើម អត្តពលិកភាគច្រើនបានធ្វើដំណើរមកដល់ខេត្តសៀមរាប ២ ទៅ ៣ថ្ងៃ មុនព្រឹត្តិការណ៍ចាប់ផ្ដើម ។

ឯកឧត្តម វ៉ាត់ ចំរើន បន្ដថា «ការចុះឈ្មោះរបស់អត្តពលិកជាតិ និងអន្ដរជាតិ ក្នុងព្រឹត្តិការណ៍រត់ប្រណាំងឆ្លងកាត់ឧបសគ្គចម្ងាយឆ្ងាយ "Angkor Ultra Trail" ឆ្នាំនេះ បានប្រព្រឹត្តទៅតាមការគ្រោងទុក។ រីឯ ដំណើរការរៀបចំក៏ប្រព្រឹត្តទៅយ៉ាងរលូន ដោយមានកិច្ចសហការល្អពីរដ្ឋបាល និងអាជ្ញាធរខេត្តសៀមរាប ក៏ដូចជាការជួយសម្របសម្រួលពីអាជ្ញាធរអប្សរា និងគ្រឹះស្ថានអង្គរជាដើម ដែលជំរុញឱ្យគណៈកម្មាធិការជាតិអូឡាំពិកកម្ពុជា(NOCC) និងភាគីបារាំង(ក្រុមហ៊ុន Phoenix Voyages) ដំណើរការរៀបចំនេះបានល្អប្រសើរ» ។

ឯកឧត្តមបន្ថែមថា «ឥឡូវនេះ អ្នកចុះឈ្មោះ បានមកដល់សៀមរាប អ្នកខ្លះមកមុន ២ ទៅ ៣ថ្ងៃ ពិសេសម្រាប់អ្នកចូលរួមរត់ចម្ងាយ ១០០គីឡូម៉ែត្រ ដើម្បីត្រៀមលក្ខណៈ និងហ្វឹកហាត់មុន។ ការមកយូរ និងស្នាក់នៅយូរបែបនេះ គឺជាអ្វីដែលយើងចង់បាន ដែលផ្ដល់នូវអត្ថប្រយោជន៍សម្រាប់ទេសចរណ៍ សេដ្ឋកិច្ច និងជួយដល់ប្រតិបត្តិករទេសចរណ៍នៅសៀមរាប ។ ជាទូរទៅព្រឹត្តិការណ៍នេះ ជាចំណែកមួយដ៏សំខាន់ ស្របតាមគោលការណ៍រាជរដ្ឋាភិបាល ដែលអនុញ្ញាតឱ្យ NOCC រៀបចំនេះឡើង» ។

គួរដឹងថា ព្រឹត្តិការណ៍ Angkor Ultra-Trail លើកទី៨ ឆ្នាំ២០២៥ នេះ គឺមានរៀបចំនួន ៦វិញ្ញាសា រួមមានវិញ្ញាសារត់ចម្ងាយ ១០០គីឡូម៉ែត្រ, ៦៤គីឡូម៉ែត្រ, ៤២គីឡូម៉ែត្រ, ៣២គីឡូម៉ែត្រ, ១៨គីឡូម៉ែត្រ និង ៨គីឡូម៉ែត្រ ៕