FIFA ត្រៀមទឹកប្រាក់ប្រមាណ ១ពាន់លានដុល្លារ សម្រាប់ការប្រកួត Club World Cup ទម្រង់ថ្មីឆ្នាំនេះ នឹងមិនទុកមួយដុល្លានោះទេ

(ប៉ារីស)៖ សម្រាប់ការប្រកួតប្រជែងដណ្តើមពានរង្វាន់ Club World Cup ឆ្នាំនេះ ដែលលេងក្នុងទម្រង់ថ្មី ៣២ក្រុម មកពី ៦តំបន់ ស្ថាប័នគ្រប់គ្រងបាល់ទាត់ពិភពលោក FIFA បានត្រៀមទឹកប្រាក់ប្រមាណ ១ពាន់លានដុល្លារ ដើម្បីចែកចាយ។ នេះបើតាមស្ថាប័នគ្រប់គ្រងឱ្យដឹងនៅក្នុងសេចក្តីថ្លែងការណ៍នាថ្ងៃទី០៦ ខែមីនា ឆ្នាំ២០២៥ ។

សម្រាប់ប្រាក់រង្វាន់នៃការប្រកួត FIFA Club World Cup ឆ្នាំនេះ ដែលមានក្រុមចំនួន ៣២នោះ នឹងត្រូវធ្វើឡើងនៅសហរដ្ឋអាមេរិក ចន្លោះថ្ងៃទី១៤ ខែមិថុនា រហូតដល់ថ្ងៃទី១៣ ខែកក្កដា ដែលស្ថាប័ន FIFA បានហៅថា «ជាស្តង់ដារថ្មីសម្រាប់បាល់ទាត់ក្លិបពិភពលោក» ។

ប្រធាន FIFA លោក Gianni Infantino បានឱ្យដឹងនៅក្នុងសេចក្តីថ្លែងការណ៍មួយថា ជាមួយនឹងប្រាក់ចំណូលប្រមាណ ២ពាន់លានដុល្លារ ដែលបានរំពឹងទុក ជាទុនបម្រុងរបស់ FIFA នឹងមិនមានការប៉ះពាល់ ហើយប្រាក់ចំណូលមួយចំនួននឹងត្រូវផ្តល់ដល់ក្លិបបាល់ទាត់ជុំវិញពិភពលោកផងដែរ ។

ការប្រកួតដែលមានក្រុមកំពូលៗ មកពីជុំវិញពិភពលោក នឹងធ្វើឡើងនៅក្នុងពហុកីឡដ្ឋានចំនួន១២ នៅសហរដ្ឋអាមេរិក ដែលនេះក៏ជាការធ្វើតេស្តមុន ព្រឹត្តិការណ៍ World Cup 2026 មកដល់ដែលធ្វើសហម្ចាស់ផ្ទះរួមជាមួយ ម៉ិកស៊ិក និងកាណាដា ។

ខណៈក្លិបម្ចាស់ផ្ទះការប្រកួត Inter Miami ដែលវត្តមានខ្សែប្រយុទ្ធឆ្នើម Lionel Messi នឹងបើកការប្រកួតដំបូងក្នុងពូលទល់នឹង Al Ahly នៅកីឡដ្ឋាន Hard Rock នៅថ្ងៃទី១៤ ខែមិថុនា ។

យោងតាមសេចក្តីថ្លៃការណ៍ ក៏បានបង្ហាញពីមូលដ្ឋានគ្រឹះហិរញ្ញវត្ថុដ៏រឹងមាំរបស់ FIFA ដើម្បីអភិវឌ្ឍបាល់ទាត់ជុំវិញពិភពលោក បានឈានចូលដំណាក់កាលកណ្តាលនៅក្នុងកិច្ចប្រជុំក្រុមប្រឹក្សា FIFA អនុម័តជាឯកច្ឆ័ន្ទរនៅរបាយការណ៍ប្រចាំឆ្នាំ២០២៤ រួមទាំងគោលដៅចំណូលថវិកាដែលបានកែសម្រួលចំនួន ១៣ពាន់លានដុល្លារ អំឡុងឆ្នាំ២០២៣-២០២៦ ដែលនឹងឃើញមានកើនជិត ៩០ភាគរយ នៃការវិនិយោគ ដើម្បីជំរុញការអភិវឌ្ឍបាល់ទាត់ពិភពលោកយ៉ាងសំខាន់។

ប្រធាន FIFA បានបន្តថា «ក្នុងពេលជាមួយគ្នានេះ យើងកំពុងធ្វើការវិនិយោគជាកំណត់ត្រាជិត ២.៣ពាន់លានដុល្លារក្នុងកម្មវិធី FIFA Forward Program ក្នុងអំឡុងឆ្នាំ២០២៣-២០២៦ ដែលមានន័យថា នៅឆ្នាំ២០២៦ នឹងធ្វើឱ្យចំនួនទឹកប្រាក់ដែលមិនធ្លាប់មានពីមុនមកកើនរហូតដល់ ៥.១ពាន់លានដុល្លារ សម្រាប់ការអភិវឌ្ឍបាល់ទាត់គិតចាប់តាំងពីឆ្នាំ២០២៦» ៕ ប្រភព Fresh News