អ្នករៀបចំព្រឹត្តិការណ៍រត់ប្រណាំង AIA Pink Run លើកទី៣ ឆ្នាំ២០២៥ បង្ហាញក្តីរំពឹងថា នឹងមានអ្នកចូលរួមរត់កើនដល់ប្រមាណ ៥ ពាន់នាក់ លើសពីការរៀបចំពេលកន្លងទៅ ស្របពេលគណៈកម្មការយុទ្ធនាការកីឡារត់ប្រណាំង បន្តបញ្ជ្រៀបចំណេះដឹង លើកកម្ពស់ ការយល់ដឹង និងទប់ស្កាត់ជំងឺមហារីកសុដន់របស់ស្ត្រី កាន់តែច្រើនបន្ថែមទៀត។
ព្រឹត្តិការណ៍រត់ប្រណាំង AIA Pink Run លើកទី៣ ឆ្នាំ២០២៥ នឹងរៀបចំឡើងនៅថ្ងៃទី១៩ ខែតុលា ដោយទីតាំងប្រកួតរៀបចំ នៅសួនច្បារវត្តបទុមវតី ដែលព្រឹត្តិការណ៍២លើក កន្លង មក រៀបចំឡើងនៅឆ្នាំ២០២៣ និង ២០២៤។
នៅក្នុងសន្និសីទសារព័ត៌មាន ថ្ងៃទី១៤ កក្កដា នាសាលប្រជុំគណៈកម្មាធិការជាតិអូឡាំពិក (NOCC) លោក វ៉ាត់ ចំរើន អគ្គលេខាធិការ (NOCC) លើកឡើងថា ព្រឹត្តិការណ៍រត់ប្រណាំង AIA Pink Run នៅតែបន្តជាយុទ្ធនាការរត់ដើម្បីលើកកម្ពស់ការយល់ដង និងទប់ស្កាត់ជំងឺ មហារីកសុដន់របស់ស្ត្រី។ អគ្គលេខាធិការ NOCC ដដែល ក៏រំឭកថាយុទ្ធនាការ ២លើក កន្លងមក មានស្ត្រី និងមហាជនជាច្រើនយល់ដឹងច្រើន ពីបញ្ហាជំងឺមហារីកសុដន់។
ដោយឡែក លោក សែម ផល្លា ប្រធានគណៈកម្មាធិការរៀបចំការប្រកួតម៉ារ៉ាតុងនៅកម្ពុជា បានអះអាងបញ្ជាក់ប្រាប់អ្នកសារព័ត៌មាន គិតត្រឹមថ្ងៃទី១៤ កក្កដា មានអ្នកចូលរួមចុះឈ្មោះរត់ ប្រមាណ ១ ៣០០នាក់ ខណៈកាលពីឆ្នាំ២០២៤ មានអ្នកចូលរួមរត់ជិត ៤ពាន់នាក់។ កម្មវិធីរត់ប្រណាំង AIA Pink Run មានប្រភេទវិញ្ញាសារត់ចម្ងាយ ១០គីឡូម៉ែត្រ, ៥គីឡូម៉ែត្រ, និង ២,៥គីឡូម៉ែត្រ។
លើសពីនេះ គណៈកម្មការរៀបចំការប្រកួត ក៏បង្ហាញក្តីរំពឹងថា នឹងអាចទទួលបានអ្នកចូលរួមរត់ប្រមាណ ៥ពាន់នាក់ នៅព្រឹត្តិការណ៍ពេលខាងមុខ ហើយក៏បានអំពាវនាវឱ្យមហាជនចូលរួមក្នុងកីឡារត់ប្រណាំងក្នុងព្រឹត្តិការណ៍ AIA Pink Run៕
Click to page
