បារ៉ែន៖ បញ្ចស៊ីឡាត់កម្ពុជា១រូប កីឡាការិនី ដេត ស្រីយ៉ាល់ បានរបូតឱកាសធ្លាក់ចេញពីការប្រកួត មិនបានឡើងទៅដណ្តើមមេដាយក្នុងព្រឹត្តិការណ៍កីឡាយុវជនអាស៊ី នៅព្រះរាជាណាចក្របារ៉ែន បន្ទាប់ពីប្រកួតចាញ់ថ្ងៃបើកឆាក នាល្ងាចថ្ងៃទី១៩ ខែ តុលា ឆ្នាំ២០២៥។
ថ្លែងប្រាប់អ្នកយកព័ត៌មានNOCCក្រោយបញ្ចប់ការប្រកួតនៅព្រះរាជណាចក្របារ៉ែន លោក វីតារា គ្រូបង្វឹកបញ្ចស៊ីឡាត់កម្ពុជា បានគូសបញ្ជាក់ថា លទ្ធផលដែលទទួលបានសម្រាប់ការប្រកួតកីឡាយុវជនអាស៊ីនេះ អាចនិយាយបានថា យើងទទួលបានលទ្ធផលល្អប្រសើរដែរ ទោះបីយើងបានចាញ់របូតឱកាសសម្រាប់កីឡាការិនី ដេត ស្រីយ៉ាល់ ឡើងទៅវគ្គបន្តក៏ដោយ។ ព្រោះការចាញ់នេះ យើងបានប្រឹងប្រែងប្រកួតអស់ពីលទ្ធភាព ហើយការប្រកួតយើងធ្វើបាន៣ទឹកពេញ អាចនិយាយបានថា ជាលទ្ធផលធ្វើបានល្អហើយ សម្រាប់កីឡាការិនីថ្មីថ្មោង។
គ្រូបង្វឹករូបនេះ បានបញ្ជាក់ទៀតថា សម្រាប់បញ្ចស៊ីឡាត់កម្ពុជា នៅសល់ក្តីសង្ឈឹមមួយទៀត លើកីឡាករ ភុក ដានីញ៉ែល ដោយចាប់ឆ្នោតឈរចាំប្រកួតវគ្គពាក់កណ្តាលផ្តាច់ព្រ័ត្រ នៅថ្ងៃទី២០ វេលាម៉ោង១០ ត្រូវប៉ះកីឡាម្ចាស់ក្បាច់គុនជនជាតិឥណ្ឌូនេស៊ី ប្រកួតនៅក្នុងគូរទី៥ ។
ក្នុងព្រឹត្តិការណ៍កីឡាយុវជនស៊ីនេះ បញ្ចស៊ីឡាត់កម្ពុជា បានបញ្ជូនអត្តពលិកទៅប្រកួតចំនួន៣រូបក្នុងមានគ្រូបង្វឹក លោក វីតា រា និងកីឡាករកីឡាការិនី២រូប មាន កីឡាករ ភុក ដានីណែល និងកីឡាការិនីដេត ស្រីយ៉ាល់។
សម្រាប់កីឡាបញ្ចស៊ីឡាត់កម្ពុជា ក្នុងព្រឹត្តិការណ៍កីឡាយុវជនអាស៊ីនៅព្រះរាជាណាចក្របារ៉ែន លើកទី៣នេះ គឺជាប្រភេទកីឡាដំណើរការប្រកួតមុនគេក្នុងចំណោម១៤ប្រភេទកីឡារបស់ព្រះរាជាណាចក្រកម្ពុជា ចាប់ពីថ្ងៃទី១៩ដល់ថ្ងៃទី២០ ខែ តុលា ឆ្នាំ២០២៥៕
