ក្រុមជម្រើសជាតិហុកគីនារីកម្ពុជា នៅព្រឹកថ្ងៃទី១ ខែវិច្ឆិកានេះ បានធ្វើដំណើរទៅកាន់ប្រទេសម៉ាឡេស៊ី ដើម្បីបោះជំរំហ្វឹកហាត់ និងប្រកួតមិត្តភាពអន្ដរជាតិ ជាមួយបណ្ដាក្លិប និងក្រុមម្ចាស់ផ្ទះ ដើម្បីសម្រួចសមត្ថភាព និងបច្ចេកទេសត្រៀមការប្រកួតអន្ដរជាតិនានា។
លោក កាំង សុធា អគ្គលេខាធិការសហព័ន្ធ បានបញ្ជាក់ថា បេសកកម្មបោះជំរំហ្វឹកហាត់ មានរយៈពេល ១ខែពេញ ក្រោយទទួលបានការអនុញ្ញាតពីក្រសួងអប់រំ យុវជន និងកីឡា និងមានការឧបត្ថម្ភគាំទ្រពីសហព័ន្ធកីឡាហុកគីអាស៊ី(AHF)។
កំឡុងពេលហ្វឹកហាត់នេះដែរ ក្រុមកីឡាហុកគីនារីកម្ពុជា នឹងមានការប្រកួតមិត្តភាពអន្ដរជាតិមួយចំនួន ជាមួយក្លិប ក៏ដូចជាក្រុមម្ចាស់ផ្ទះម៉ាឡេស៊ី ដោយសហព័ន្ធចាត់ទុកជាឱកាសដ៏ល្អ ដើម្បីវាស់ស្ទង់ និងជម្រុញការអភិវឌ្ឍសមត្ថភាព បច្ចេកទេស របស់កីឡាការិនីកម្ពុជា សម្រាប់ត្រៀមការប្រកួតអន្ដរជាតិនានានៅពេលខាងមុខ ពិសេសត្រៀមការប្រកួតពានរង្វាន់ជើងឯកអាស៊ី Asian Cup នាដើមឆ្នាំ២០២៦ ដែល AHF គ្រោងនឹងធ្វើការកំណត់ម្ចាស់ផ្ទះរៀបចំនាពេលខាងមុខ។
គួរដឹងថា ការបោះជំរំហ្វឹកហាត់នៅម៉ាឡេស៊ីរបស់ក្រុមជម្រើសជាតិហុកគីនារីកម្ពុជានេះ មានគ្រូបង្វឹក គ្រូជំនួយ និងកីឡាការិនីសរុបចំនួន ១៤រូប ។ ចំពោះការហ្វឹកហាត់ផ្ដោតលើវិញ្ញាសាក្នុងសាល(Indoor)ផង និងវិញ្ញាសា Hockey5’s ផង ដែលសហព័ន្ធកីឡាហុកគីអាស៊ី រៀបចំនៅ Raja Ashman – AHF Academy Ipoh ចាប់ពីថ្ងៃទី១ ដល់ថ្ងៃទី៣០ ខែវិច្ឆិកា ឆ្នាំ២០២៥ ខាងមុខ៕
