នៅថ្ងៃអង្គារ ទី៤ ខែវិច្ឆិកា ឆ្នាំ២០២៥ គណៈកម្មាធិការជាតិអូឡាំពិកកម្ពុជា (NOCC)បានទទួលលិខិតថ្លែងអំណរគុណពីក្រុមប្រឹក្សាអូឡាំពិកអាស៊ី (OCA) សម្រាប់កិច្ចសហការដ៏មានតម្លៃ និងការគាំទ្រយ៉ាងរឹងមាំរបស់ប្រមុខចលនាអូឡាំពិកកម្ពុជា ដែលបានជំរុញឲ្យព្រឹត្តិការណ៍ប្រកួតកីឡាយុវជនអាស៊ី លើកទី៣ នៅប្រទេសបារ៉ែន ពីថ្ងៃទី២២-៣១ ខែតុលា ឆ្នាំ២០២៥ កន្លងទៅបញ្ចប់ទៅយ៉ាងរលូន និងជោគជ័យ។
ក្នុងការប្រកួតកីឡាយុវជនអាស៊ីឆ្នាំ២០២៥ នៅបារ៉ែនកន្លងទៅថ្មីៗនេះ កម្ពុជា បានបញ្ជូនអត្តពលិកចូលរួមប្រកួតប្រជែងលើ ១៤ប្រភេទកីឡា ហើយទទួលបានមេដាយសរុប៤គ្រឿង រួមមានមេដាយប្រាក់ ២ និងសំរឹទ្ធ ២។ នេះជាសមិទ្ធផលលើកដំបូងហើយ ដែលកម្ពុជាប្រជែងបានមេដាយពីព្រឹត្តិការណ៍កីឡាយុវជនអាស៊ី បន្ទាប់ពីចូលរួមបាន៣លើកមកនេះ ដោយ២លើកដំបូង កម្ពុជាពុំធ្លាប់ទទួលបានមេដាយនោះឡើយ។
ទាក់ទងទៅនឹងការលើកពេលធ្វើជាម្ចាស់ផ្ទះរបស់កម្ពុជាក្នុងព្រឹត្តិការណ៍កីឡាយុវជនអាស៊ីពីឆ្នាំ២០២៩ទៅឆ្នាំ២០៣១វិញនោះ ក្រុមប្រឹក្សាអូឡាំពិកអាស៊ី (OCA) បញ្ជាក់ថា អ៊ូបេគីស្ថានបានស្នើសូមធ្វើម្ចាស់ផ្ទះព្រឹត្តិការណ៍កីឡាយុវជនអាស៊ីឡើងវិញ ដោយនឹងរៀបចំក្នុងឆ្នាំ២០២៩ ដើម្បីអាចមានពេលវេលាត្រៀមលក្ខណៈ និងរៀបចំហេដ្ឋារចនាសម្ព័ន្ធឱ្យបានរួចរាល់ បន្ទាប់ពីបានបោះបង់សិទ្ធិធ្វើម្ចាស់ផ្ទះ២០២៥ និងទទួលបន្តដោយប្រទេសបារ៉ែន។
OCA បានថ្លែងអំណរគុណចំពោះគណៈកម្មាធិការជាតិអូឡាំពិកកម្ពុជា ពិសេសពីរាជរដ្ឋាភិបាលកម្ពុជាដែលបានឯកភាពលើការលើកពេលនេះ។ ទន្ទឹមនឹងនេះ ការប្រកួតកីឡាយុវជនអាស៊ីនឹងប្ដូរទៅរៀបចំរៀងរាល់ ២ឆ្នាំម្តង។
តាមរយៈលិខិតចុះហត្ថលេខាដោយលោក Husain Al Musallam អគ្គនាយកក្រុមប្រឹក្សាអូឡាំពិកអាស៊ី បានបញ្ជាក់ថា «សាមគ្គីភាព ស្មារតីកីឡា និងមិត្តភាព ដែលបានបង្ហាញដោយគណៈប្រតិភូរបស់ឯកឧត្តម (ឯកឧត្តមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា) ឆ្លុះបញ្ចាំងយ៉ាងច្បាស់ពីគុណតម្លៃនៃសហគមន៍កីឡាអាស៊ី។ OCA សូមថ្លែងអំណរគុណយ៉ាងជ្រាលជ្រៅចំពោះការសហការជិតស្និទ្ធ និងការប្តេជ្ញាចិត្តរបស់ឯកឧត្តម ក្នុងអំឡុងដំណាក់កាលរៀបចំ និងដំណាក់កាលហ្គេម។ យើងទាំងអស់គ្នាបានបង្កើតអនុស្សាវរីយ៍ដ៏មានតម្លៃសម្រាប់យុវជនអាស៊ី និងបានពង្រឹងសម្ព័ន្ធភាព ដែលផ្សារភ្ជាប់ប្រទេសជាតិរបស់យើងតាមរយៈកីឡា»។
ក្រុមប្រឹក្សាអូឡាំពិកអាស៊ី បានបន្ថែមទៀតថា «សូមថ្លែងអំណរគុណម្តងទៀត ចំពោះភាពជាដៃគូ និងការរួមចំណែកដ៏សំខាន់របស់ឯកឧត្តម ក្នុងជោគជ័យ នៃការប្រកួតកីឡាអាស៊ីយុវជនហ្គេម លើកទី៣ ឆ្នាំ២០២៥ នៅប្រទេសបារ៉ែន។ យើងសង្ឃឹមថា នឹងទទួលបានការសហការយ៉ាងល្អបន្ថែមទៀតនៅក្នុងការប្រកួតកីឡាអាស៊ីហ្គេមនាពេលអនាគត»។
សូមបញ្ជាក់ថា ដោយទទួលបានការយកចិត្តទុកដាក់របស់រាជរដ្ឋាភិបាលកម្ពុជា ពិសេសសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដែលតែងលើកទឹកចិត្ត និងឧបត្ថម្ភគាំទ្រដល់ប្រតិភូកីឡាកម្ពុជា ក្នុងការចូលរួមព្រឹត្តិការណ៍អន្ដរជាតិនានា។ ជាក់ស្ដែងការចូលរួមប្រកួតកីឡាយុវជនអាស៊ី លើកទី៣ កាលពីថ្មីៗ បានបង្កើននូវទំនាក់ទំនងការទូតកីឡា ក៏ដូចជាការលើកកម្ពស់ចលនាអូឡាំពិកអន្ដរជាតិ ពិសេសចលនាអូឡាំពិកអាស៊ី ដែលធ្វើឲ្យកម្ពុជាមានមុខមានមាត់ និងសិទ្ធិចូលរួមគ្រប់ព្រឹត្តិការណ៍កីឡា រហូតត្រូវបានគេទទួលស្គាល់ និងវាយតម្លៃខ្ពស់ ចំពោះក្រុមកីឡាកម្ពុជា៕
