ទាំងកីឡាករ ស សុផានុត កីឡាករ សៅ សុភារ៉ា និង កីឡាការិនី គង់ ម៉ូណាជេសស៊ីកា បានបង្ហាញការប្ដេជ្ញាចិត្តខ្ពស់ដូចគ្នាក្នុងការទៅចូលរួមព្រឹត្តិការណ៍កីឡាស៊ីហ្គេម ឆ្នាំ២០២៥ នៅប្រទេសថៃ។
កីឡាការិនី ម៉ូណា ជេសស៊ីកា ដែលត្រូវប្រកួតលក្ខណៈសម្ដែងថ្លែងថា បានត្រៀមខ្លួនរួចជាស្រេចសម្រាប់ការទៅចូលរួមព្រឹត្តិការណ៍កីឡាដ៏ធំក្នុងតំបន់អាស៊ីអាគ្នេយ៍មួយនេះ ហើយថា បញ្ហាជម្លោះដ៏តានតឹងនឹងមិនប៉ះពាល់ដល់ការតាំងចិត្តឡើយ ដ្បិតនេះជាការប្រកួតកីឡា។
មិនខុសពីកីឡាការិនី គង់ ម៉ូណាជេសស៊ីកា គឺកីឡាករ សៅ សុភារ៉ា និងកីឡាករ ស សុផានុត ដែលប្រកួតលើវិញ្ញាសាប្រយុទ្ធ អះអាងថា នឹងប្រឹងប្រែងអស់ពីសមត្ថភាព និងប្រកួតទៅតាមបច្ចេកទេសរបស់ខ្លួន។
ទន្ទឹមនឹងនេះ លោក សំអុន បូរមី អគ្គលេខាធិការសហព័ន្ធកីឡាជឺជីតស៊ូកម្ពុជា ថ្លែងថា សហព័ន្ធបានរៀបចំត្រៀមសម្រាប់កីឡាករ កីឡាការិនីរបស់ខ្លួនតាំងពីក្រោយចប់ស៊ីហ្គេម ឆ្នាំ២០២៣ ម្ល៉េះ ដោយមានការហ្វឹកហាត់ និងចេញទៅប្រកួតនៅក្រៅប្រទេសច្រើនលើកច្រើនសា។ លោកថា ការចេញទៅប្រកួតស៊ីហ្គេមខាងមុខនេះ គឺគោលដៅទៅយកមេដាយតែម្ដង។
សម្រាប់ការចូលរួមព្រឹត្តិការណ៍កីឡាស៊ីហ្គេម ២០២៥ នៅប្រទេស សហព័ន្ធកីឡាជឺជីតស៊ូកម្ពុជាបានបញ្ជូនកីឡាករកីឡាការិនី១១រូបមានទាំងវិញ្ញាសាប្រយុទ្ធ និង សម្ដែង៕
