កីឡាការិនីកម្ពុជាដំបូងគេចូលរួមរត់វិញ្ញាសា១០០គីឡូម៉ែត្រក្នុងព្រឹត្តិការណ៍ Angkor Ultra Trailមិនព្រមបោះបង់ចោលមហិច្ឆិតាក្នុងការចូលរួមបើទោះបីការត្រៀមខ្លួនបានតិចជាងឆ្នាំមុនៗក៏ដោយ ។ ការជម្នះចូលរួមរត់ក្នុងវិញ្ញាសាចម្ងាយនេះ ព្រោះនាងចង់បង្ហាញសារទៅកាន់ពិភពលោកថា កម្ពុជាជាប្រទេសសុវត្ថិភាពខ្ពស់។
កីឡាការិនីរត់ចម្ងាយមួយរូបរបស់កម្ពុជាលើវិញ្ញាសារត់១០០គីឡូម៉ែត្រដែលចូលរួមដំបូងគេក្នុងព្រឹត្តិការណ៍រត់ចម្ងាយឆ្ងាយឬ Angkor Ultra Trail បានបង្ហាញមោទនភាពចូលរួមដើម្បីបង្ហាញសារទៅកាន់ពិភពលោកថា ប្រទេសកម្ពុជាជាទឹកដីដែលមានសុវត្ថភាពខ្ពស់បំផុត ទោះបីជាមានការបំពានមកលើទឹកដីខណ្ឌសីម៉ាពីសំណាក់ប្រទេសជិតខាងក៏ដោយ។ប៉ុន្តែរាល់បញ្ហាទាំងអស់នេះវាមិនបានប៉ះពាល់ទៅដល់សុខសុវត្ថិភាពទៅដល់ភ្ញៀវទេសចរណ៍ដែលមកចូលរួមរត់ព្រឹត្តិការណ៍ និងដំណើរកំសាន្តនោះទេ។
កីឡាការិនី វ័យ៣៣ឆ្នាំ រិទ្ធ ម៉ូនីតា អ្នករត់មកពីរាជធានីភ្នំពេញ បានថ្លែងលើកឡើងបែបនេះ គ្រាដែលនាងមកចូលរួមរត់ជាមួយលោកឪពុក ក្នុងព្រឹត្តិការណ៍រត់ចម្ងាយឆ្ងាយឬ Angkor Ultra Trailលើទី៩ នៅទឹកដីអង្គរ ខេត្តសៀមរាប។
កីឡាការិនីរូបនេះ បានគូសបញ្ជាក់ថា នេះជាលើកទី៣ហើយ សម្រាប់រូបនាងចូលរួមក្នុងព្រឹត្តិការណ៍រត់ចម្ងាយឆ្ងាយ។ ដោយកាលពីចូលរួមលើកទី១ បានហ្វឹកហាត់ត្រៀមខ្លួនបានរយៈពេលកន្លះខែ ហើយការចូលរួមលើកទី២ ការហ្វឹកហាត់ត្រៀមខ្លួនបានមួយសប្តាហ៍ខណៈលើកទី៣ Angkor Ultra Trailលើទី៩ ឆ្នាំ២០២៦នេះ នាងបានហ្វឹកហាត់ត្រៀមខ្លួនបានតិចតួចបំផុត។
រិទ្ធ ម៉ូនីតា បានអះអាងថា កត្តាដែលជម្នះឱ្យនាងនៅតែបន្តចូលរួមមិនបោះបង់សម្រាប់ព្រឹត្តិការណ៍រត់មួយនេះ ព្រោះការរត់គឺមានភាពសប្បាយរីករាយបានមើលឃើញនូវទេសភាពពិតដិតអារម្មណ៍ជាមួយនឹងវាល ស្រែភូមិឋានអ្នកស្រុកនិងប្រាសាទបូរាណរបស់ខ្មែរដែលជួយឱ្យនាងមានភាពសប្បាយរីករាយក្នុងចិត្ត។ជាពិសេស នាងចង់អំពាវនាវឱ្យស្រី្តកម្ពុជាចូលរួមរត់ក្នុងវិញ្ញាសានេះបានកាន់តែច្រើនផងដែរ។
គួរឱ្យដឹងដែរថា រិទ្ធម៉ូនីតា ជាកីឡាការិនីកម្ពុជាតែម្នាក់គត់បានចូលរួមរត់ក្នុងព្រឹត្តិការណ៍រត់ចម្ងាយឆ្ងាយឬ Angkor Ultra Trailលើវិញ្ញាសារត់ចម្ងាយ១០០គីឡូម៉ែត្រកាលពីឆ្នាំ២០២៤ ខណៈឆ្នាំ២០២៦នេះ កីឡាការិនីកម្ពុជាចុះឈ្មោះរត់វិញ្ញាសា១០០គីឡូម៉ែត្របានកើនឡើងដល់ជាង១០នាក់ទៅហើយ៕
