លោក ផល សុផាត អតីតកីឡាប្រដាល់សកលឆ្នើមជម្រើសជាតិកម្ពុជា បានបង្ហាញភាពភ្ញាក់ផ្អើលយ៉ាងខ្លាំងចំពោះសមត្ថភាពសិស្សប្អូនបច្ចុប្បន្ន។ លោកថា ទោះបីប្រដាល់សកលកម្ពុជាមិនសូវសម្បូរទីផ្សារប្រកួត ប៉ុន្តែកីឡាករបច្ចុប្បន្នមានបច្ចេកទេសរីកចម្រើន ដែលលោកនឹកស្មានមិនដល់ ហើយក៏អាចធ្វើឱ្យប្រទេសជិតខាងកោតសរសើរបានដែរ។
បងប្រុសបង្កើតកីឡាករ ផល សុភ័ណ្ឌ ថ្លែងបែបនេះ "៖ បន្ទាប់ពីឃើញការប្រកួត Dragon the Golden Ring ខ្ញុំភ្ញាក់ផ្អើលចំពោះសមត្ថភាពសិស្សប្អូនឥឡូវ ឃើញថា ទោះបីគាត់អត់សូវមានទីផ្សារប្រកួតក្នុងស្រុក ប៉ុន្តែពួកគេបានបង្ហាញសមត្ថភាពបច្ចេកទេសយ៉ាងល្អមែនទែន មើលទៅរីកចម្រើន។"
ជាមួយគ្នានេះ លោក ផល សុផាត បានផ្ដាំផ្ញើសិស្សប្អូនបច្ចុប្បន្នត្រូវខិតខំប្រឹងប្រែងពង្រឹងសមត្ថភាពឱ្យបានល្អ ទាន់នៅមានក្រុមហ៊ុនវឌ្ឍនៈចូលរួមឧបត្ថម្ភសហការរៀបចំការប្រកួតកម្រិតអាជីពប្រចាំខែ ដែលមិនធ្លាប់មានពីមុនមក។
លោកអាជ្ញាកណ្ដាលប្រចាំកម្មវិធីប្រដាល់សកលអាជីព Dragon the Golden Ring សង្កត់ធ្ងន់ថា យុវជនប្រដាល់សកលកម្ពុជាត្រូវខិតខំរៀនសូត្រតិចនិចតាមប្រទេសដែលខ្លាំងដើម្បីពង្រឹងសមត្ថភាពខ្លួនឯងបន្ថែម។
លោក ផល សុផាត ជាប់ជម្រើសជាតិប្រដាល់សកល ពីចន្លោះឆ្នាំ២០០៣ដល់២០១១។ លោកធ្លាប់បានមេដាយប្រាក់ស៊ីហ្គេមនៅប្រទេសឡាវ ដែលកាលណោះលោកបានផ្ដួលកីឡាករម៉ាឡេស៊ី ក្នុងវគ្គ៨នាក់ និងឥណ្ឌូនេស៊ី វគ្គពាក់កណ្ដាលផ្ដាច់ព្រ័ត្រ មុនចាញ់កីឡាករហ្វីលីពីនវគ្គផ្ដាច់ព្រ័ត្រ៕
