អត្តពលិកជម្រើសជាតិជាង៦០០នាក់ទាំងកម្រិតថ្នាល និងក្រុមធំនឹងចាប់ផ្ដើមការប្រមូលផ្ដុំហ្វឹកហាត់ចាប់ពីថ្ងៃទី១ ខែមេសា ដល់ខែតុលា សម្រាប់ព្រឹត្តិការណ៍ប្រកួតកម្រិតអន្តរជាតិនានាក្នុងឆ្នាំ២០២៦នេះ។ នេះបើតាមប្រសាសន៍ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ក្រោយកិច្ចប្រជុំជាមួយសហព័ន្ធកីឡាជាតិនៅមជ្ឈមណ្ឌលជាតិហ្វឹកហ្វឺនកីឡានារសៀលថ្ងៃពុធ ទី១៨ ខែមីនា។
ឯកឧត្ដមរដ្ឋលេខាធិការមានប្រសាសន៍បែបនេះ “តាមគោលការណ៍ និងអនុសាសន៍ដ៏ខ្ពង់ខ្ពស់របស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ការប្រមូលផ្ដុំត្រូវមានគោលដៅ គោលការណ៍ និងផែនការដឹកនាំច្បាស់លាស់ដោយមានការសហការយ៉ាងស្អិតរមួតជាមួយសហព័ន្ធកីឡាជាតិ។ ដូច្នេះកិច្ចប្រជុំថ្ងៃនេះយើងពិនិត្យលើចំនួននៃការប្រមូលផ្ដុំឱ្យមានសមភាពទៅនឹងលទ្ធភាពនៃកញ្ចប់ថវិកាដែលក្រសួងអប់រំ យុវជន និងកីឡា បានទទួល និងផ្ដល់ទៅមជ្ឈមណ្ឌលជាតិហ្វឹកហ្វឺនកីឡាសម្រាប់ឆ្នាំ២០២៦។ ឆ្នាំនេះយើងនៅតែរក្សាបានការប្រមូលផ្ដុំជាង៦០០នាក់ទាំងក្រុមថ្នាល និងក្រុមធំ ក៏ដូចជាប៉ារ៉ាឡាំពិកផងដែរ ដើម្បីត្រៀមចូលរួមព្រឹត្តិការណ៍កីឡាជាច្រើន ជាពិសេសអាស៊ីហ្គេម នៅប្រទេសជប៉ុន ដែលជាព្រឹត្តិការណ៍ធំប្រចាំឆ្នាំ។ ក្រៅពីនេះក៏មានការប្រកួតកីឡាឆ្នេរខ្សាច់ កីឡាក្នុងសាល ជើងឯកពិភពលោកផ្សេងៗទៀតរបស់សហព័ន្ធ។ ក្នុងនោះសហព័ន្ធត្រូវធ្វើផែនការ និងរបៀបរបប ក៏ដូចជាសូចនាករក្នុងការវាយតម្លៃគុណភាពគ្រប់គ្រង និងបច្ចេកទេសរបស់ខ្លួន”។
ឯកឧត្ដមអគ្គលេខាធិការគណៈកម្មាធិការជាតិអូឡាំពិកកម្ពុជាដដែល បញ្ជាក់បន្ថែមថា គោលដៅនៃការចូលរួមព្រឹត្តិការណ៍ឆ្នាំនេះ គឺអាស៊ីហ្គេម (Asian Games) នៅប្រទេសជប៉ុន និងព្រឹត្តិការណ៍សិស្សនិស្សិតអាស៊ាននៅឆ្នាំក្រោយ ក៏ដូចជា ឆ្នាំ ២០២៨ដែលកម្ពុជាគ្រោងធ្វើជាម្ចាស់ផ្ទះ។ ក្នុងពេលជាមួយគ្នានេះ សហព័ន្ធត្រូវត្រៀមសំខាន់មួយទៀត គឺការធ្វើម្ចាស់ផ្ទះព្រឹត្តិការណ៍កីឡាយុវជនអាស៊ី។
ឯកឧត្ដម វ៉ាត់ ចំរើន បានថ្លែងអំណរគុណដល់រាជរដ្ឋាភិបាលដែលនៅតែគាំទ្រយ៉ាងពេញទំហឹងចំពោះវិស័យកីឡា ជាពិសេសការផ្ដល់នូវការឧបត្ថម្ភលើការប្រមូលផ្ដុំ។ នេះបានបង្ហាញការយកចិត្តទុកដាក់របស់រាជរដ្ឋាភិបាល ជាពិសេសសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានគិតគូរគ្រប់ជ្រុងជ្រោយលើគ្រប់វិស័យទាំងអស់ ជាពិសេសវិស័យ។ ដូច្នេះ អ្នកជំនាញទាំងអស់ត្រូវខិតខំប្រឹងប្រែងឱ្យស័ក្កិសមទៅនឹងការគាំទ្រពីរាជរដ្ឋាភិបាល៕
