ឯកឧត្ដម វ៉ាត់ ចំរើន
អគ្គលេខាធិការគណៈកម្មាធិការជាតិអូឡាំពិកកម្បុជាបានរំឭកពីជោគជ័យរបស់គណៈកម្មាធិការជាតិអូឡាំពិកកម្ពុជា ជាពិសេសមរតកកីឡាស៊ីហ្គេម ឆ្នាំ២០២៣ និងសមិទ្ធផលយ៉ាងច្រើនទៀតក្នុងអាណត្តិទី៨កន្លងទៅ។
ការលើកឡើងរបស់ឯកឧត្ដមអគ្គលេខាធិការបានធ្វើឡើងក្នុងមហាសន្និបាតគណៈកម្មាធិការជាតិអូឡាំពិកកម្ពុជា បញ្ចប់អាណត្តិទី៨ ឆ្នាំ២០២២-២០២៦ និងបន្តអាណត្តិទី៩ ឆ្នាំ២០២៦-២០៣ នៅរសៀលថ្ងៃព្រហស្បតិ៍ ទី១៩ ខែមីនា ឆ្នាំ២០២៦។
ឯកឧត្ដម វ៉ាត់ ចំរើន សង្កត់ធ្ងន់ថា នៅពីក្រោយជោគជ័យនេះ គឺមានការកសាងនូវមូលដ្ឋានគ្រឹះ បច្ចេកទេសកីឡា ដែលធ្វើឱ្យសហព័ន្ធកីឡាជាតិមានភាពរឹងមាំ និងមានម្ចាស់ការលើខ្លួនឯងក្នុងការរៀបចំព្រឹត្តិការណ៍នានា។ ការអភិវឌ្ឍកីឡាករ កីឡាការិនី ក៏ជាចំណុចពិសេស។ CAMSOC បានផ្ដល់ថវិកាទៅប្រកួត និងហ្វឹកហាត់នៅក្រៅប្រទេសដើម្បីវាស់ស្ទង់សមត្ថភាពត្រៀមព្រឹត្តិការណ៍កីឡាស៊ីហ្គេម ឆ្នាំ២០២៣។ ការខិតខំប្រឹងប្រែងបានផ្ដល់នូវផ្លែផ្កាយ៉ាងត្រចះត្រចង់ដល់កម្ពុជា ដោយទទួលបានមេដាយមាស៨១គ្រឿង មេដាយប្រាក់៧៤គ្រឿង និងសំរឹទ្ធ១២៧គ្រឿង សរុប២៨២គ្រឿង ឈរនៅចំណាត់ថ្នាក់លេខ៤ ដែលជាសមិទ្ធផលលើសពីការរំពឹងទុក។
ជោគជ័យមួយទៀត គឺមរតកស៊ីហ្គេម ដែលបានផ្សព្វផ្សាយវប្បធម៌ជាតិតាមរយៈព្រឹត្តិការណ៍កីឡាដ៏ធំប្រចាំតំបន់នេះ។ ការមិនគិតថ្លៃលើការហូបចុក ស្នាក់នៅ ការទស្សនាប្រាសាទអង្គរវត្ត និងសិទ្ធិផ្សព្វផ្សាយជារបត់ថ្មីធ្វើឱ្យចលនាអូឡាំពិកលើពិភពលោកភ្ញាក់ផ្អើល។
ភាពអស្ចារ្យនៃពិធីបើក និងបិទនៃព្រឹត្តិការណ៍កីឡាស៊ីហ្គេមនៅកម្ពុជាធ្វើឱ្យអាស៊ាន និងប្រទេសផ្សេងៗបន្ទាប់ពីកម្ពុជាស្ងើចសរសើរ ព្រោះជាការរៀបចំកម្រិតអូឡាំពិកតែម្ដង។
ជោគជ័យដ៏ធំមួយទៀត គឺការដាក់ឱ្យមាននូវកីឡាប្រពៃណីដែលក្នុងនោះ ការប្រកួតកីឡាគុនខ្មែរត្រូវបានធ្វើឡើងដោយឯករាជ្យ មិនចំណុះកីឡាមួយថៃ។
ការមានសុខដុមនីយកម្មក្នុងនាមជាអ្នកដឹកនាំកីឡាជំនាញបានបង្ហាញពីរួបរួម និងធ្វើការងារជាមួយគ្នាយ៉ាងរលូន។ទន្ទឹមនឹងនេះ គណៈកម្មាធិការជាតិអូឡាំពិកកម្ពុជាបានធ្វើសកម្មភាពកីឡាច្រើនជាមួយអាជ្ញាធរ និងសហព័ន្ធជាតិ ទាំងជាមួយមហាជន និងកីឡាទេសចរណ៍ ដែលជាសកម្មភាពលេចធ្លោត្រូវធ្វើបន្តទៀត។
ជុំវិញបញ្ហាប្រឈមវិញ ឯកឧត្ដម វ៉ាត់ ចំរើន លើកឡើងថា បន្ទាប់ពីជោគជ័យដ៏លើសលប់នៃព្រឹត្តិការណ៍កីឡាស៊ីហ្គេមឆ្នាំ២០២៣ ការយកចិត្តទុកដាក់ហាក់ថមថយជាងមុន និងកង្វះលក្ខណៈវិទ្យាសាស្ត្រចំពោះការកសាងគុណផល ពោលគឺមិនមានភាពខ្លាំងយូរអង្វែង។
គណៈកម្មាធិការជាតិអូឡាំពិកកម្ពុជានឹងស្វែងរកគ្រូវិទ្យាសាស្ត្រកីឡាដើម្បីបង្កើនគុណផលប្រកបដោយចីរភាព ក៏ដូចជាការស្វែងរកអ្នកឧបត្ថម្ភគាំទ្រកាន់តែច្រើនថែមទៀត។ ក្រៅពីនេះ ក៏មានការរៀបចំវគ្គបណ្ដុះបណ្ដាលរយៈពេលខ្លី មធ្យម និងវែង និងចំទិសដៅ៕
