ឯកឧត្ដម វ៉ាត់ ចំរើន ប្រធានសហព័ន្ធកីឡាគុនចម្រុះកម្ពុជាមានប្រសាសន៍ថា ប្រសិនបើវិបត្តិព្រំដែនត្រូវបានដោះស្រាយរួចរាល់ នោះព្រឹត្តិការណ៍កីឡាយុទ្ធគុនចម្រុះខ្មែរបុរាណពានរង្វាន់សម្ដេចបវរធិបតី អាចនឹងត្រូវបានរៀបចំឡើងសាជាថ្មីនៅឆ្នាំក្រោយ។
ប្រមុខសហព័ន្ធកីឡាគុនចម្រុះជាតិមានប្រសាសន៍បែបនេះក្នុងមហាសន្និបាតបញ្ចប់អាណត្តិចាស់របស់សហព័ន្ធកាលពីរសៀលថ្ងៃសុក្រ ទី១០ ខែមេសា ឆ្នាំ២០២៦ នាទីស្នាក់ការគណៈកម្មាធិការជាតិអូឡាំពិកកម្ពុជា ខណៈឯកឧត្ដមត្រូវបានផ្ដល់ទំនុកចិត្តបន្តដឹកនាំសហព័ន្ធក្នុងអាណត្តិថ្មី ឆ្នាំ២០២៦-២០៣០។
សូមរំឭកថា ព្រឹត្តិការណ៍កីឡាយុទ្ធគុនចម្រុះខ្មែរបុរាណពានរង្វាន់សម្ដេចបវរធិបតី ត្រូវបានរៀបចំឡើងលើកដំបូងក្នុងឆ្នាំ២០២៤ ដោយមានការចូលរួមពីក្បាច់គុនយ៉ាងច្រើន ជាពិសេសក្បាច់គុនខ្មែរបុរាណ ក្នុងន័យលើកស្ទួយ និងផ្សព្វផ្សាយក្បាច់គុនមរតកជាតិ។
ឯកឧត្ដម វ៉ាត់ ចំរើន សង្កត់ធ្ងន់ថា សហព័ន្ធកីឡាគុនចម្រុះបានធ្វើការងារច្រើនជាមួយរាជរដ្ឋាភិបាល ពិសេសក្រោមការយកចិត្តទុកដាក់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដែលបានជំរុញការងារយុទ្ធគុនចម្រុះខ្មែរបុរាណ ផ្ដល់នូវភាពកក់ក្ដៅ ក្នុងការអភិវឌ្ឍកីឡាគុនចម្រុះជាតិ។
គួរដឹងដែរថា ក្នុងការបន្តធ្វើជាប្រធានសម្រាប់អាណត្តិថ្មីនៃសហព័ន្ធកីឡាគុនចម្រុះកម្ពុជា ឆ្នាំ ២០២៦-២០៣០ របស់ឯកឧត្ដម វ៉ាត់ ចំរើន អមដោយអនុប្រធាន៤រូប គឺឯកឧត្ដម វ៉ា ស៊ិនភិរម្យ លោកបណ្ឌិត សេង ប៊ុនសុង លោក ម៉ុង សាំងឃុន និង លោក អ៊ួ តារា។
ចំណែកលោក ជឹម ធារ៉ា បន្តតំណែងជាអគ្គលេខាធិការ អមដោយអគ្គលេខាធិការរង៣រូបទៀត៕
