សហព័ន្ធកីឡាគ្រិកឃីតកម្ពុជាបានរៀបចំមហាសន្និបាតបញ្ចប់អាណត្តិចាស់ ទី៤ និងបន្តអាណត្តិថ្មី ទី៥ ឆ្នាំ២០២៦-២០៣០ នៅព្រឹកថ្ងៃពុធ ទី២៩ ខែមេសា ឆ្នាំ២០២៦ នាស្នាក់ការគណៈកម្មាធិការជាតិអូឡាំពិកកម្ពុជា។
ជាលទ្ធផល ឯកឧត្ដម វ៉ាត់ ចំរើន បន្តជាប្រធានដឹកនាំសហព័ន្ធកីឡាគ្រិកឃីតកម្ពុជា សម្រាប់អាណត្តិថ្មីទី៥ ឆ្នាំ ២០២៦-២០៣០។ ក្នុងនោះដែរ លោក ទ្រី សុវណ្ណារ៉ា ទទួលបន្ទុកជាអនុប្រធាន លោក នូ សុផល ជាអគ្គលេខាធិការ លោកស្រី ទឹម ធាវី ជាអគ្គហេរញ្ញិក និងលោក Nirmaljit Singh ជាសមាជិក។
ឯកឧត្ដម វ៉ាត់ ចំរើន មានប្រសាសន៍ថា កីឡាគ្រិកឃីតជាប្រភេទកីឡាអូឡាំពិក និងមានប្រជាប្រិយភាពខ្លាំងក្នុងចំណោមប្រភេទកីឡាធំៗលើពិភពលោក។ តែនៅប្រទេសកម្ពុជា ការជ្រួតជ្រាបពីកីឡាគ្រិកឃីតនៅមិនទាន់មានភាពទូលំទូលាយ និងយល់ដឹងច្រើនពីសំណាក់មហាជន។ ហេតុដូចនេះហើយបានជាសហព័ន្ធកីឡាគ្រិកឃីតកម្ពុជាក្នុងអាណត្តិថ្មីត្រូវផ្សព្វផ្សាយកាន់តែទូលំទូលាយថែមទៀត និងស្វែងរកការគាំទ្រជាពិសេសពីធុរកិច្ចផ្សេងៗដើម្បីជ្រោមជ្រែងឱ្យបានរីកចម្រើន។
ឯកឧត្ដមប្រមុខសហព័ន្ធបានបង្ហាញពីការលំបាកមួយចំនួនទៀតដែរថា ដោយសារតែកីឡាគ្រិកឃីត គឺជាកីឡាលេងជាក្រុម ដូច្នេះត្រូវការចំណាយច្រើនទាំងទៅលើទីលាន ការហ្វឹកហាត់ និងប្រកួត ជាដើម។ ទន្ទឹមនឹងនេះ ដំណើរការរៀបចំសព្វថ្ងៃក៏មានការចូលរួមអភិវឌ្ឍពីជនបរទេសដែលមានជំនាញ និងបច្ចេកទេសខ្ពស់ក្នុងកីឡាគ្រិកឃីតនេះដែរ ដោយបានរួមចំណែកក្នុងការស្វែងរកការឧបត្ថម្ភគាំទ្រផ្សេងៗ។
ឯកឧត្ដម វ៉ាត់ ចំរើន បានបន្តទៀតថា ការងារចំពោះមុខមួយទៀត គឺស្វែងរកទីលានសម្រាប់ការហ្វឹកហាត់ និងប្រកួត។ ជាក់ស្ដែង បច្ចុប្បន្នសហព័ន្ធកីឡាគ្រិកឃីតកម្ពុជាកំពុងពិភាក្សាជាមួយភាគីពហុកីឡដ្ឋានជាតិមរតកតេជោដើម្បីបោះទីតាំងហ្វឹកហាត់ និងប្រកួតនៅទីនោះ។ ជាមួយគ្នានេះ ការបង្ហាត់បង្រៀនដល់សិស្សានុសិស្សក៏ស្ថិតក្នុងបេសកកម្មនៃការពង្រីកវិសាលភាពរបស់សហព័ន្ធ។
សូមរំឭកថា កីឡាគ្រិកឃីតកម្ពុជាដណ្ដើមមេដាយមាស៣គ្រឿង និងមេដាយប្រាក់១គ្រឿង ក្នុងព្រឹត្តិការណ៍កីឡាស៊ីហ្គេម ២០២៣៕
