ក្រសួងអប់រំ យុវជន និងកីឡា និងមជ្ឈមណ្ឌលជំរុញធុរកិច្ចអន្តរជាតិរបស់ប្រទេសមីយ៉ាន់ម៉ា បានធ្វើការពង្រឹងទំនាក់ទំនងឈានទៅលើកកម្ពស់កិច្ចសហប្រតិបត្តិការលើវិស័យកីឡារវាងប្រទេសទាំងពីរ ។ នេះបើតាមប្រសាសន៍ ឯកឧត្តម វ៉ាត់ ចំរើន រដ្ឋលេខាធិការ តំណាងដ៍ខ្ពង់ខ្ពស់ ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និងកីឡា ក្រោយអនុញ្ញាតឲ្យលោក Aik Htun ប្រធានមជ្ឈមណ្ឌលជំរុញធុរកិច្ចអន្តរជាតិរបស់ប្រទេសមីយ៉ាន់ម៉ា និងប្រតិភូ ចូលជួបសម្តែងការគួរសម និងពិភាក្សាការងារ កាលពីម្សិលមិញ។
ឯកឧត្តម វ៉ាត់ ចំរើន មានប្រសាសន៍ថា ជំនួបពិភាក្សាការងារជាមួយក្រុមប្រតិភូធុរកិច្ចមីយ៉ាន់ម៉ាខាងលើ ផ្ដោតលើទំនាក់ទំនងធុរកិច្ចលើវិស័យកីឡា និងការផ្លាស់ប្ដូរគ្នា រវាងវិស័យប្រទេសទាំងពីរ ដែលភាគីទាំងពីរ បានប្ដេជ្ញាធ្វើការរឹតចំណងមិត្តភាព និងពង្រឹងទំនាក់ទំនងល្អនេះ ដ្បិតកន្លងមក កម្ពុជា និងមីយ៉ាន់ម៉ា បានខិតខំធ្វើការទំនាក់ទំនងល្អទៅវិញទៅមក គ្រប់វេទិកាអន្ដរជាតិ ក្នុងវិស័យកីឡា និងចលនាអូឡាំពិកជាដើម។
ជាមួយគ្នានេះ ដើម្បីធានាបាននូវកិច្ចសហប្រតិបត្តិការរឹងមាំ ភាគីមីយ៉ាន់ម៉ា បានស្នើឲ្យមានកិច្ចសហការរៀបចំការប្រកួតមិត្តភាពជាបន្ដបន្ទាប់ ពិសេសដោយផ្ដើមពីមិត្តភាពកីឡាវាយកូនឃ្លីលើតុមុនគេ ក្នុងគោលបំណងជំរុញឲ្យយុវជនបានផ្លាស់ប្ដូរបច្ចេកទេស ក៏ដូចជាការទទួលបដិសណ្ឋារកិច្ច គ្រាដែលកម្ពុជារីករាយ នឹងពិនិត្យលើការងារនេះ ក៏ដូចជាពិនិត្យលើកិច្ចការឧស្សាហកម្មកីឡា និងធុរកិច្ចកីឡាផ្សេងៗទៀតផង ដែលភាគីទាំងពីរ នឹងធ្វើការជាមួយគ្នាផងដែរ។
ឯកឧត្តម បានបន្ដថា «នេះគឺជាពេលវេលាមួយ សម្រាប់វិស័យកីឡាប្រទេសទាំងពីរ ដែលអាចក្លាយទៅជាជំហាន នៃការពង្រឹងកិច្ចសហប្រតិបត្តិការ លើវិស័យកីឡា ទៅថ្ងៃអនាគតកាន់តែដ៏ល្អប្រសើរ។ យើងត្រៀមលក្ខណៈក្នុងការចូលរួមនេះ ស្របតាមគោលការណ៍របស់ រាជរដ្ឋាភិបាល និងក្រសួងអប់រំ ដោយកម្ពុជានឹងពង្រីក កិច្ចសហប្រតិបត្តិការគ្រប់វិស័យ ពិសេសវិស័យកីឡាឲ្យទូលំលាយ ហើយឈានទៅដល់កិច្ចសហប្រតិបត្តិការស៊ីជម្រៅទ្វេភាគីជាមួយបណ្ដាប្រទេសទាំងអស់ ពិសេសប្រទេសក្នុងតំបន់»។
ឯកឧត្តម វ៉ាត់ ចំរើន បន្ថែមទៀតថា «ជាគោលការណ៍របស់អាស៊ាន យើងនឹងអាចធ្វើកិច្ចសហប្រតិបត្តិការនេះ ហើយយើងបានធ្វើការទំនាក់ទំនង និងកិច្ចសហប្រតិបត្តិការនេះ ដោយអគ្គនាយកកីឡា នៃក្រសួងអប់រំ យុវជន និងកីឡា របស់យើង ជាមួយប្រតិភូ ដែលបានមកទស្សនកិច្ចស្វែងយល់ និងចាប់ដៃគ្នាជាមួយវិស័យកីឡារបស់យើង ។ យើងសង្ឃឹមថា កិច្ចសហប្រតិបត្តិការនេះ នឹងឈានទៅដល់ជាផ្លែផ្កាមួយដ៏ល្អប្រសើរនាពេលឆាប់ៗនេះ»។
ឆ្លៀតក្នុងឱកាសនោះដែរ លោក Aik Htun បានថ្លែងកោតសរសើរ និងវាយតម្លៃខ្ពស់ ចំពោះភាពរីកចម្រើននៃវិស័យកីឡាកម្ពុជា ។ អ្វីដែលពិសេស គឺប្រធានសភាពាណិជ្ជកម្មមីយ៉ាន់ម៉ាដដែល នៅតែកោតស្ញប់ស្ញែងនូវភាពជោគជ័យដ៏អស្ចារ្យ នៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅកម្ពុជា ដែលជាករណីដ៏ពិសេសមួយ និងក្លាយជាភាពវិជ្ជមានមួយ សម្រាប់អនាគត ក្នុងការរៀបចំ កសាង និងអភិវឌ្ឍន៍វិស័យកីឡាកម្ពុជា៕
