ភ្នំពេញ៖ អត្តពលិកកីឡាទាំងអស់ដែលត្រូវទៅចូលរួមការប្រកួតកីឡាយុវជនអាស៊ីលើកទី៣នៅប្រទេសបារ៉ែន បន្ទាប់ពីទទួលបានការបណ្តុះបណ្តាលរយៈពេល២ថ្ងៃ ស្តីពី “វិន័យ និងក្រមសីលធម៌” ត្រូវប្រុងប្រយ័ត្នខ្ពស់ចំពោះការប្រើប្រាស់ព័ត៌មាននៅលើបណ្តាញសង្គម ត្រូវប្រកាន់ខ្ចាប់នូវក្រមសីលធម៌ ព្រោះបើយើងមិនពេញចិត្តនិងអ្វីមួយក្នុងអំឡុងពេលទៅចូលរួមក្នុងព្រឹត្តិការណ៍ប្រកួត ហើយយើងបញ្ចេញព័ត៌មានលើបណ្តាញសង្គម វានឹងបង្កផលប៉ះពាល់ដល់ក្រុមកម្ពុជាទាំងមូល ទាំងកេរ្តិ៍ឈ្មោះនិង កិត្តិយស។
ការថ្លែងលើកឡើងរបស់ រដ្ឋលេខាធិការ ក្រសួងអប់រំយុវជននិងកីឡា ឯកឧត្តម វ៉ាត់ ចំរើន បែបនេះ ក្នុងពិធីបិទ សិក្ខាសាលា ស្តីពី “វិន័យ និងក្រមសីលធម៌” នៅមជ្ឈមមណ្ឌលជាតិហ្វឹកហ្វឺនកីឡា។
ឯកឧត្តម បានគូសបញ្ជាក់ទៀតថា អត្តពលិកកម្ពុជាអំឡុងពេលទៅចូលរួមប្រកួតអ្វីដែលគួតែបង្ហោះដើម្បីបង្ហាញព័ត៌មានលើបណ្តាញសង្គម គឺមានតែការសប្បាយរីករាយ សកម្មភាពហ្វឹកហាត់ និងប្រកួត ហើយត្រូវជៀសវាងការប្រើប្រាស់បណ្តាញសង្គមបញ្ចេញអារម្មណ៍របស់ខ្លួនទើសទាល់អ្នកនេះទើសទាល់អ្នកនោះ និងមិនសុខចិត្តចេះ និងមិនសុខចិត្តចុះ ដែលទង្វើទាំងអស់នោះវាមិនបានផ្តល់ផលចំណេញអ្វីដល់ក្រុមកម្ពុជាយើងនោះទេ ។ ពោលផ្ទុយទៅវិញមានតែផ្តល់ផលអវិជ្ជាដែលធ្វើអោយប៉ះពាល់ដល់មុខមាត់កម្ពុជា។
ទន្ទឹមជាមួយគ្នានេះដែរ ឯកឧត្តម វ៉ាត់ ចំរើន បានក្រើនរំលឹក ដល់អត្តពលិកកម្ពុជាទាំងអស់ ត្រូវរៀបចំខ្លួន ឱ្យគ្រប់ជ្រុងជ្រុយមុនចេញទៅប្រកួតមិនត្រូវភ្លេចអ្វីដោយលទ្ធផលទទួលបានចាញ់មិនបានប្រកួតឱ្យសោះ ពិសេស ត្រូវខិតខំហ្វឹកហាត់ដូសខាត់សមត្ថភាពបន្ថែមទៀត ឱ្យបានខ្លាំងក្លាបន្ទាប់ពីបញ្ចប់សិក្ខាសាលានេះទៅរហូតដល់ថ្ងៃប្រកួត។ឯកឧត្តម សង្ឈឹមជឿជាក់ថា ការរួបរួមសាមគ្គីគ្នាក្នុងសា្មរតីកីឡាបូករួមនិងការខិតខំប្រឹងប្រែងរបស់កីឡាករកីឡាការិនីផ្ទាល់ និងទទួលបានលទ្ធផលល្អនាំមកជូនជាតិជាក់ជាមិនខាន។
គួរឱ្យដឹងដែថា វគ្គសិក្ខាសាលាស្តីពី “វិន័យ និងក្រមសីលធម៌” មុនចូលរួមប្រកួតកីឡាយុវជនអាស៊ីលើក ទី៣ នៅព្រះរាជាណាចក្រប៉ារ៉ែន មានរយៈពេល ០២ថ្ងៃ គីចាប់ពីថ្ងៃទី ០២ ដល់ថ្ងៃទី០៣ ខែតុលា ឆ្នាំ២០២៥ មានគ្រូឧទ្ទេសចំនួន០៥នាក់ ក្នុង នោះមានអត្តពលិក ចំនួន១៣ប្រភេទកីឡាចូលរួមប្រកួតដូច ហែលទឹក, អត្តពលកម្ម, វាយសី, បាល់បោះ៣x៣, យូដូ, ជីជីតស៊ូ, គុនចម្រុះ, វាយកូនឃ្លីលើតុ, តេក្វាន់ដូWT, ចំបាប់, លើកទម្ងន់, បាល់ទាត់លើតុ, គុនខ្មែរ៕
