“គ្រប់ភាគីពាក់ព័ន្ធជាពិសេសកីឡាករ កីឡាការិនីវ័យក្មេង ត្រូវស្វែងយល់ឱ្យបានច្បាស់ពីការត្រៀមលក្ខណៈចូលរួមដើម្បីធានាបាននូវសុខសុវត្ថិភាព ក្នុងការចូលរួម និងការប្រកួតប្រជែង ជាមួយភាពម៉ឺងម៉ាត់ ក្នុងការដឹកនាំ និងគ្រប់គ្រងជាដើម។” នេះជាប្រសាសន៍របស់ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និង កីឡា ក្នុងសិក្ខាសាលាស្ដីពីវិន័យ និងក្រមសីលធម៌ដល់មន្ត្រី គ្រូបង្វឹក គ្រូជំនួយ កីឡាករកីឡាការិនីនៅមជ្ឈមណ្ឌលហ្វឹកហ្វឺនកីឡាកាលពីព្រឹកថ្ងៃព្រហស្បតិ៍ ទី០២ ខែតុលា មុនចូលរួមព្រឹត្តិករណ៍កីឡាយុវជនអាស៊ី២០២៥ នៅប្រទេសបារ៉ែន ពាក់កណ្ដាលខែតុលានេះ។
ឯកឧត្ដម វ៉ាត់ ចំរើន បន្តថានេះជាព្រឹត្តិការណ៍ដ៏មានតម្លៃ ព្រោះក្រៅពីការប្រកួតប្រជែងលក្ខណៈបច្ចេកទេស ក៏ជាការត្រៀមដ៏សំខាន់ស្របពេលកម្ពុជាកំពុងត្រៀមរៀបចំការប្រកួតកីឡាយុវជនអាស៊ី លើកទី៤ ឆ្នាំ២០២៩។ ដូច្នេះការរៀបចំសិក្ខាសាលានេះពិតជាសំខាន់ ក្នុងន័យបណ្ដុះបណ្ដាល និងអប់រំ ពីរបៀបរបបផ្សេងៗ មុនចេញដំណើរ មានន័យថា កីឡាករ-កីឡាការិនី និងគ្រូបង្វឹក ត្រូវគោរពតួនាទីរបស់ខ្លួន ហើយថ្នាក់ដឹកនាំ ក៏បានត្រៀមខ្លួនជាស្រេច ដើម្បីសម្របសម្រួល និងដោះស្រាយរាល់បញ្ហានានា ឱ្យមានភាពរលូន និងជោគជ័យ។
ព្រឹត្តិការណ៍ការប្រកួតកីឡាយុវជនអាស៊ីនៅបារ៉ែន នឹងប្រព្រឹត្តទៅពីថ្ងៃទី២២ ដល់ថ្ងៃទី៣១ ខែតុលា។ ក្នុងនោះកម្ពុជាត្រៀមប្រកួតប្រជែងលើ ១៣ប្រភេទ ខណៈប្រតិភូ គ្រូបង្វឹក និងកីឡាករ-កីឡាការិនីសរុបប្រមាណ ១៤០នាក់។ ទន្ទឹមនឹងនេះ កម្ពុជាក៏បញ្ជូនប្រតិភូពិសេស រួមទាំងក្រុមសិល្បៈ និងក្បាច់គុនខ្មែរ ដើម្បីសម្ដែងអបអរសាទរពិធីទទួលទង់ធ្វើម្ចាស់ផ្ទះបន្ដវេន នៃព្រឹត្តិការណ៍កីឡាយុវជនអាស៊ី លើកទី៤ នាឆ្នាំ២០២៩ ដែលកម្ពុជាធ្វើជាម្ចាស់ផ្ទះ៕
