រាជធានីភ្នំពេញ៖កីឡាករដែលមានរហ័ស្សនាមក្របីព្រៃពេជ្រ សម្បត្តិពិតជាមិនធម្មតាមែនគេបានធ្វើឱ្យមានការភ្ញាក់ផ្អើលនិងកក្រើកសង្វៀនស្រុកចិន ក្រោយពីបានយកឈ្នះលើកីឡាករជើងខ្លាំងប្រចាំបប្រទេសចិនខា ឡូសូដែលជាម្ចាស់ខ្សែក្រវាត់ជាច្រើនស្ថាប័នឱ្យចាញ់ពិន្ទុដាច់ទាំង៣ទឹក ក្នុងដំណើរបេសកកម្មទៅប្រកួតផ្សព្វក្បាច់គុនបូរាណខ្មែរនៅប្រទេសចិនរបស់ក្រុមកីឡាករ កីឡាការិនីប្រដាល់គុនខ្មែរចំនួន៦រូបកាលពីថ្ងៃទី៧ខែតុលាឆ្នាំ២០២៥។
កីឡាករពេជ្រ សម្បត្តិពិតជាធ្វើបានល្អខ្លាំងណាស់និងមិនធ្វើឱ្យអ្នកគាំទ្ររបស់ខ្លួនខកបំណងនោះទេ ទោះបីជាការប្រកួតបានអូសបន្លាយរហូតទៅដល់៣ទឹកពេញក៏ពិតមែន ប៉ុន្តែគេបានធ្វើឱ្យអ្នកប្រដាល់ល្បីឈ្មោះក្នុងប្រភេទទម្ងន់៦០គីឡូក្រាមប្រចាំប្រទេសចិនឈ្មោះខា ឡូសូដែលជាម្ចាស់ខ្សែក្រវាត់ជាច្រើនស្ថា ប័ននិងជាម្ចាស់ពានរង្វាន់ក្នុងនោះក៏ជាម្ចាស់ខ្សែក្រវាត់WBCផងដែរ ឱ្យចាញ់យ៉ាងដំណុំ ធ្វើឱ្យមានការភ្ញាក់ផ្អើលយ៉ាងខ្លាំងនៅលើសង្វៀនប្រទេសចិន។ហើយអ្វីដែលកើតឡើងនៅពេលនោះ សក្តិសមបំផុតទៅនឹងរហ័សនាមដែលប្រជាជនខ្មែរដាក់ថាជាក្របីព្រៃទៀតផង។ ព្រោះតែការប្រកួតចាប់ពីទឹកទី១ដល់ទឹកទី៣ គេបានសម្រុកដើរចូលប្រើស្នៀតកណ្ដាប់ដៃវាយសន្ធាប់ទៅលើកីឡាករខា ឡូសូដូចក្របីឡើងករ ធ្វើឱ្យកីឡាករចិនរូបនេះរកឱកាសតដៃសឹងតែមិនបាន។
កីឡាករពេជ្រ សម្បត្តិ ការមកប៉ះជាមួយកីឡាករចិនខា ឡូសូលើកនេះគ្រាន់តែនៅត្រឹមដើមទឹកទី១ប្រកួតមិនទាន់បាន១នាទីស្រួលបួលផងនោះ គេបានម៉ាត់ចូលមុខកីឡាករខា ឡូសូពេញៗជាច្រើនដៃសហូតដល់ថ្នាក់បែកឈាមចេញតាមច្រមុះដួលអុកគូថទៅលើតាពីត្រូវលោកអាជ្ញាកណ្ដាលរាប់ម្ដង។ក្រោយពីលោកគ្រូពេទ្យពិនិត្យរួចឃើញថាមិនអី កីឡាករខា ឡូសូត្រូវបានអនុញ្ញាតិ ឱ្យប្រកួត ប ន្ត។
ប៉ុន្តែចូលដល់ទឹកទី២និងទី៣កីឡាករពេជ្រ សម្បត្តិមិនបន្ធូដៃនៅតែ បង្កើនការវាយសម្រុកកាន់តែខ្លាំងលើសដើម។និយាយរួមទំនងមិនចង់ឱ្យគូប្រកួតរបស់គេឆ្លងផុតពីទឹកទី៣នោះទេ។តែទោះជាយ៉ាងណាកីឡាករចិនម្នាក់នេះអាចតស៊ូប្រកួតរហូតដល់ចប់ទឹកទី៣និងបានប្ដូកណ្ដាប់ដៃវាយបកសងមកវិញជាការសងសឹកមិនព្រមចុះចាញ់ដោយងាយនោះឡើយ ក្នុងនាមជាអ្នកប្រដាល់ជើងខ្លាំងល្បីឈ្មោះម្នាក់ដែលធ្លាប់គេកោតក្រែងគ្រប់ៗគ្នា។
តែទីបំផុតត្រូវបានលោកអាជ្ញាកណ្ដាលប្រកាសឱ្យចាញ់កីឡាករពេជ្រ សម្បត្តិត្រឹមតែពិន្ទុទាំងមិនអស់ចិត្តក្រោយចប់ការប្រកួត។
កីឡាករចិនខា ឡូសូបើតាមស្ដាប់ប្រវត្តិគេជាអ្នកប្រដាល់មួយរូបដែលធ្លាប់ហ្វឹកហាត់នៅប្រទេសថៃ ហើយក៏ជាជើងខ្លាំងម្នាក់ធ្លាប់ធ្វើព្យុះភ្លៀងនៅប្រទេសថៃយូឆ្នាំមកហើយ។មិនតែប៉ុណ្ណោះកីឡាករចិនម្នាក់នេះធ្លាប់ឈ្នះខ្សែក្រវាត់និងពានរង្វាន់ជាច្រើនគ្រឿងថែមទៀតផង ក្នុងនោះមានទាំងខ្សែក្រវាត់ពិភពលោកWBCទៀតផង។ប៉ុន្តែទីបំផុតបែជាមកចាញ់ក្រោមកណ្ដាប់ដៃក្របីព្រៃពេជ្រ សម្បត្តិទាំងមិនអស់ចិត្តទៅវិញ។
ព្រឹត្តិការណ៍ដ៏គួរឱ្យចាប់អារម្មណ៍ក្នុងដំណើរទៅផ្សព្វផ្សាយក្បាច់គុនបូរាណខ្មែរដែលដឹកនាំដោយឯកឧត្តមខូវ ឆាយប្រធានសហព័ន្ធកីឡាប្រដាល់គុនខ្មែរនៅប្រទេសចិនលើកនេះគឺធ្វើនៅខេត្តស៊ីឆ័ន ទីក្រុងឆឹងទូកាលពីយប់ថ្ងៃទី៧ខែតុលាឆ្នាំ២០២៥។
ចំណែកក្រុមប្រតិភូកីឡាប្រដាល់គុនខ្មែរដែលធ្វើដំណើរទៅចូលរួមប្រកួតលើកនេះមានចំនួន៦នាក់។ ជាលទ្ធឈ្នះ២នាក់ស្មើ១នាក់ចាញ់៣នាក់អ្នកដែលឈ្នះ មានកីឡាករពេជ្រ សម្បត្តិ កីឡាការិនីរិទ្ធី វ៉ានិច្ច ចំណែកីឡាករឡៅ ចិត្រាស្មើពិន្ទុ។ដោយឡែកអ្នកដែលប្រកួតចាញ់ទាំង៣នាក់មានកីឡាករិនីអេ យ៉ា នុត កីឡាករមឿន សុខហ៊ុចនិងកីឡាករពេជ្រ អទិទេព៕
