ភ្នំពេញ៖ ឯកឧត្តមបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា(NOCC) និងជាប្រធានប្រតិភូកីឡាកម្ពុជា បានដាក់ការជឿជាក់លើកីឡាករ-កីឡាការិនីថ្នាលរបស់កម្ពុជា ក្នុងដំណើរឆ្ពោះទៅប្រជែងមេដាយជូនជាតិ បន្ទាប់ពីពួកគេបានយកចិត្តទុកដាក់ និងខិតខំប្រឹងប្រែងហ្វឹកហាត់ពេញ ១ឆ្នាំកន្លងមក ដើម្បីត្រៀមការប្រកួតកីឡាយុវជនអាស៊ី លើកទី៣ នៅប្រទេសបារ៉ែន ចាប់ពីថ្ងៃទី២២-៣១ ខែតុលា ឆ្នាំ២០២៥។
ការបង្ហាញសុទិដ្ឋិនិយមនេះ ធ្វើឡើងក្នុងពិធីជួបសំណេះសំណាល និងផ្ដល់អនុសាសន៍ណែនាំ ក៏ដូចជាការជូនដំណើរ និងផ្ដល់ការលើកទឹកចិត្តដល់ប្រតិភូកីឡាកម្ពុជា មុនចេញទៅប្រកួតកីឡាយុវជនអាស៊ី លើកទី៣ នៅប្រទេសបារ៉ែន ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី១៣ ខែតុលា ឆ្នាំ២០២៥។
ឆ្លៀតឱកាសនោះដែរ ក្នុងនាម NOCC ឯកឧត្ដមទេសរដ្ឋមន្ដ្រី បានថ្លែងអំណរគុណ ចំពោះឯកឧត្តមបណ្ឌិត សភាចារ្យ ហង់ជួន ណារ៉ុន តំណាងដ៏ខ្ពង់ខ្ពស់បំផុត សម្តេចមហាបវរធិបតី នាយករដ្ឋមន្ត្រី ដែលបានឆ្លៀតពេលវេលាដ៏មមាញឹកក្នុងការដឹកនាំវិស័យអប់រំ យុវជន និងកីឡា ផ្តល់កិត្តិយសឲ្យប្រតិភូកីឡាកម្ពុជា ជួបសម្តែងការគួរសម ជម្រាបលា និងទទួលអនុសាសន៍ណែនាំដ៏ខ្ពង់ខ្ពស់ មុនពេលចេញដំណើរចូលរួមការប្រកួតកីឡាយុវជនអាស៊ីលើកទី៣ ឆ្នាំ២០២៥ នៅព្រះរាជាណាចក្របារ៉ែន។
ឯកឧត្តមមានប្រសាសន៍ថា ការប្រកួតកីឡាយុវជនអាស៊ី នៅទីក្រុងម៉ាណាម៉ា នាចុងខែតុលានេះ ម្ចាស់ផ្ទះបារ៉ែន បានកំណត់កីឡាចំនួន ២៣ប្រភេទ ហើយមានគណៈកម្មាធិការជាតិអូឡាំពិកក្នុងទ្វីបអាស៊ីចំនួន ៤៥ប្រទេសចូលរួម ដោយកម្ពុជាត្រៀមចូលរួមចំនួន ១៤ប្រភេទកីឡា លើ ៧១វិញ្ញាសា រួមមាន៖ អត្តពលកម្ម ហែលទឹក វាយសី បាល់បោះ ជឺជីតស៊ូ យូដូ គុនខ្មែរ យុទ្ធគុនចម្រុះ តេក្វាន់ដូ-WT វាយកូនឃ្លីលើតុ លើកទម្ងន់ បាល់ទាត់លើតុ បញ្ចស៊ីឡាត់ និងកីឡាចំបាប់ ដោយមានកីឡាករ-កីឡាការិនីចំនួន ៥២នាក់ គ្រូបង្វឹក ២១នាក់ មន្ត្រី និងថ្នាក់ដឹកនាំកីឡា ៤០នាក់ ព្រមទាំងក្រុមសិល្បៈ ៤៤នាក់ សរុបប្រតិភូកីឡាកម្ពុជាចំនួន ១៥៧នាក់។
ឯកឧត្តមបណ្ឌិត ថោង ខុន បន្ដថា «ក្រោមការយកចិត្តទុកដាក់ និងការប្រមូលផ្តុំក្រុមជម្រើសជាតិថ្នាលហាត់ហ្វឹកហ្វឺនពេញមួយឆ្នាំ របស់មជ្ឈមណ្ឌលជាតិហ្វឹកហ្វឺនកីឡា នៃក្រសួងអប់រំ យុវជន និងកីឡា យើងរំពឹងទុកថា កីឡាករ កីឡាការិនីនឹងផ្តល់ទំនុកចិត្តលើគុណផលកីឡា (Performance) របស់ខ្លួន អាចនឹងឈានទៅរកជ័យលាភីមេដាយជូនជាតិជាក់ជាពុំខាន ។ ក្នុងនាមប្រធានប្រតិភូ នាយបេសកកម្ម និងក្រុមការងារសម្របសម្រួល សូមប្តេជ្ញាខិតខំប្រឹងប្រែងប្រកបដោយស្មារតីបុរេសកម្ម ដើម្បីធានាសុខភាព សុវត្ថិភាព ភាពកក់ក្តៅ និងភាពជឿជាក់ជូនដល់កីឡាករ កីឡាការិនី ទាំងពេលធ្វើដំណើរចាកចេញ អំឡុងពេលប្រកួត និងពេលត្រឡប់មកវិញ»។
ឯកឧត្តមបន្ថែមថា «ចំពោះកម្មវិធីទទួលទង់ធ្វើជាម្ចាស់ផ្ទះកីឡាយុវជនអាស៊ី លើកទី៤ គណៈកម្មាធិការជាតិអូឡាំពិកកម្ពុជាបានសហការជាមួយក្រសួងវប្បធម៌ និងវិចិត្រសិល្បៈក្នុងការរៀបចំកម្មវិធីទទួលទង់កីឡាទៅតាមការសម្របសម្រួល របស់ម្ចាស់ផ្ទះបារ៉ែន ដើម្បីឱ្យកម្មវិធីប្រព្រឹត្តទៅដោយរលូន ប្រកបដោយមោទនភាពជាតិក្នុងការទាក់ទាញចំណាប់អារម្មណ៍ប្រតិភូកីឡា និងអត្តពលិកអាស៊ីទាំងអស់ ដើម្បីទទួលស្វាគមន៍ភ្ញៀវមកទស្សនាកម្ពុជា ព្រះរាជាណាចក្រអច្ឆរិយៈ នាឆ្នាំ២០២៩»។
ក្នុងជំនួបសម្ដែងគួរសមខាងលើ ក្រៅពីការជួបសំណេះសំណាល និងលើកទឹកចិត្ត ក៏ដូចជាផ្ដល់អនុសាសន៍ណែនាំដ៏ខ្ពង់ខ្ពស់ របស់ឯកឧត្តមបណ្ឌិតសភាចារ្យ ហង់ជួន ណារ៉ុន ឯកឧត្តមក៏បានកោតសរសើរ និងវាយតម្លៃខ្ពស់ ចំពោះការចូលរួមយ៉ាងសកម្មរបស់ថ្នាក់ដឹកនាំ NOCC ក្រោមការដឹកនាំរបស់ឯកឧត្តមទេសរដ្ឋមន្ដ្រី ថោង ខុន និងកិច្ចសហការរបស់សហព័ន្ធកីឡាជាតិទាំងអស់ ដែលជំរុញឲ្យវិស័យកីឡាជាតិមានការរីកចម្រើន និងចូលរួមការប្រកួតប្រជែងលើឆាកអន្ដរជាតិ ពិសេសការត្រៀមទទួលធ្វើម្ចាស់ផ្ទះកីឡាយុវជនអាស៊ី លើកទី៤ នាឆ្នាំ២០២៩ ដែលជាព្រឹត្តិការណ៍ដ៏ធំមួយទៀត បន្ទាប់ពីភាពជោគជ័យដ៏ត្រចះត្រចង់ នៃព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣៕
