សហព័ន្ធកីឡាវូស៊ូកម្ពុជាបានធ្វើមហាសន្និបាតបិទបញ្ចប់អាណត្តិទី៦ ឆ្នាំ២០២១-២០២៥ បន្តអាណត្តិទី៧ ២០២៥-២០២៩ នៅរសៀលថ្ងៃច័ន្ទ ទី១៣ ខែតុលា ឆ្នាំ២០២៥ នាស្នាក់ការគណៈកម្មាធិការជាតិអូឡាំពិកកម្ពុជា។
ក្នុងនោះ លោកឧកញ៉ា ស្រ៊ុន ប៊ុនថាត ទទួលបានការគាំទ្រជាប្រធានសម្រាប់អាណត្តិថ្មី អមដោយសមាជិក១២រូប សរុបគណៈកម្មាធិការប្រតិបត្តិមាន១៣រូបដឹកនាំសហព័ន្ធកីឡាវូស៊ូអាណត្តិទី៧។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិក ក្នុងនាមជាប្រធានស្តីទីសហព័ន្ធអាណត្តិចាស់បានកោតសរសើរចំពោះទឹកចិត្តលោកឧកញ៉ា ស្រ៊ុន ប៊ុនថាត និងសមាជិកប្រតិបត្តិគ្រប់រូបក្នុងការចូលរួមដឹកនាំសហព័ន្ធ។
ឆ្លៀតក្នុងឱកាសនោះ ឯកឧត្ដម វ៉ាត់ ចំរើន បានលើកឡើង៥ចំណុចពិសេសដើម្បីពង្រឹងសហព័ន្ធកីឡាវូស៊ូ ដែលទី១មានផ្នែករដ្ឋបាលកីឡា។ នោះសហព័ន្ធត្រូវមានការរៀបចំដំណើរការលិខិតស្នាម គ្រប់គ្រង កិច្ចប្រជុំ ដែលប្រធានសហព័ន្ធ និងអគ្គលេខាធិការទទួលបន្ទុកចាត់ចែង ជាពិសេសអគ្គលេខាធិការ។ ទោះបីជាសហព័ន្ធកីឡាវូស៊ូកម្ពុជាមិនទាន់ជាប្រភេទកីឡាអូឡាំពិក គណៈកម្មាធិការជាតិអូឡាំពិកកម្ពុជានៅតែជួយជ្រោមជ្រែងលើផ្នែករដ្ឋបាល។
ចំណុចទី២ គឺសហព័ន្ធកីឡាវូស៊ូត្រូវពង្រឹងលើផ្នែកទំនាក់ទំនងអន្តរជាតិ កៀរគររកការគាំទ្រពីប្រទេសជាម្ចាស់ដើម គឺ ប្រទេសចិន ជាពិសេសផ្នែកបច្ចេកទេស និងការឧបត្ថម្ភគាំទ្រ។ ចំណុចទី៣ គឺគ្រប់គ្រងបច្ចេកទេសដែលមានការអភិវឌ្ឍគ្រូបង្វឹក កីឡាករ អាជ្ញាកណ្ដាលចៅក្រម ជាដើម។ ចំណុចទី៤ គឺរៀបចំឱ្យមានផ្នែកទីផ្សារ ស្វែងរកចំណូល និងរៀបចំព្រឹត្តិការណ៍។ ចំណុចទី៥ គឺត្រូវធ្វើផែនការអភិវឌ្ឍអ្នកគ្រប់គ្រងព្រឹត្តិការណ៍ដែលមានការប្រកួតប្រចាំឆ្នាំដោយសហការជាមួយផ្នែកទីផ្សារ និងរៀបចំព្រឹត្តិការណ៍ ទាំងការប្រកួតក្នុងស្រុក និងប្រកួតលក្ខណៈអន្តរជាតិនៅក្រៅប្រទេស៕
