តីតខ្សែប្រយុទ្ធ Wayne Rooney បង្ហើបថា Carlos Tevez គឺជាដៃគូខ្សែប្រយុទ្ធដែលមានភាពយល់ចិត្តគ្នាបំផុតកាលនៅ Manchester United ពីចន្លោះឆ្នាំ២០០៧ដល់២០០៩។
វីរបុរសបាល់ទាត់អង់គ្លេសបាននិយាយក្នុងកម្មវិធី The Wayne Rooney Show "៖ ខ្ញុំចូលចិត្តការលេងជាមួយ Carlos។ ពេលគាត់មកដល់ សារព័ត៌មាននិយាយថា គាត់តូចពេក ធ្វើដៃគូគ្នាមិនកើតទេ។ តែដល់ពេលលេងជាក់ស្ដែង គឺផ្ទុយពីសារព័ត៌មានគិតទៅវិញ។ យើងទាំងពីរនាក់សុទ្ធតែរឹងមាំ ម៉ឺងម៉ាត់ ត្រៀមខ្លួនរួចជាស្រេចដើម្បីប្រកួតប្រជែង ហើយតែងតែគាំទ្រគ្នាទៅវិញទៅមក។ ម្នាក់លេងលេខ ៩ ម្នាក់ទៀតទម្លាក់ខ្លួនចុះដូចលេខ ១០ ចល័តគ្រប់ពេល ហើយអ្វីៗកើតឡើងដោយធម្មជាតិ។"
Rooney និង Tevez គឺជាដៃគូសំខាន់ក្នុងតំបន់ប្រយុទ្ធរបស់ Man UTD អំឡុងឆ្នាំ ២០០៧ដល់២០០៩ និងមានការសហការពី Cristiano Ronaldo បានបង្កើតជាកម្លាំងប្រយុទ្ធដ៏មុតស្រួច ជួយឱ្យក្រុមបិសាចក្រហម ឈ្នះពានរង្វាន់ Premier League ពីរលើកជាប់ៗគ្នា និង UEFA Champions League ឆ្នាំ ២០០៨។ អ្នកទាំង២រកគ្រាប់បាល់សរុប៤៧គ្រាប់ និងជាកម្លាំងសំខាន់របស់អ្នកចាត់ការ Sir Alex Ferguson។
ទោះបីមានការរួមចំណែកច្រើនពី Cristiano Ronaldo ប៉ុន្តែ Rooney យល់ថា Tevez ទៅវិញទេ ដែលជាដៃគូសំខាន់បំផុតជួយឱ្យគេលេចធ្លោ។
"ខ្ញុំធ្លាប់មាន២រដូវកាលដែរដែលរកបានលើស៣០គ្រាប់ក្នុងនាមជាខ្សែបម្រើ តែនិយាយឱ្យស្មោះត្រង់ទៅ ក៏ធុញដែរ។ ខ្ញុំចូលចិត្តលេង ចូលចិត្តបញ្ជូន សម្របសម្រួល និងចលនា។ Tevez ជួយខ្ញុំរឿងហ្នឹងបានច្រើន។" នេះជាការបញ្ជាក់បន្ថែមរបស់ Rooney។
Carlos Tevez បានចាកចេញពី Manchester United នាដំណាច់រដូវកាល២០០៨/២០០៩ ដោយចូលរួមជាមួយក្រុមគូប្រជែងរួមក្រុង គឺ Manchester City មុនបន្តទៅ Juventus និង Boca Juniors ហើយគេបានចូលនិវត្តន៍ក្នុងឆ្នាំ២០២២។
Rooney សង្កត់ធ្ងន់ថា ទោះបីពួកគេលេងជាមួយគ្នាបានតែ២ឆ្នាំ ប៉ុន្តែវាបានក្លាយជាចំណងមិត្តភាពដ៏ពិសេសបំផុត៕
