ឯកឧត្ដម យី វាសនា អគ្គលេខាធិការ នៃ គណៈកម្មាធិការជាតិប៉ារ៉ាឡាំពិកកម្ពុជា បានសរសើរឆន្ទៈក្រុមកីឡាការិនីបាល់បោះជិះរទេះនារីកម្ពុជា ដែលទទួលបានជោគជ័យក្នុងព្រឹត្តិការណ៍ The 2025 Asia Oceania Championship និងទទួលបានកៅអីចូលរួមព្រឹត្តិការណ៍កីឡាជនពិការអាស៊ី លើកទី៥ (5th Asia Para Games) នៅក្រុង Nagoya ប្រទេសជប៉ុន ឆ្នាំ ២០២៦។
ឯកឧត្ដមអគ្គលេខាធិការ បានចាត់ទុកក្រុមកីឡាការិនីកម្ពុជា ជានារីក្លាហានដែលអាចជម្នះបាននូវការលំបាកនានា និងអាចទទួលជ័យជម្នះ លើប្រទេសដែលក្រុមកម្ពុជាមិនធ្លាប់ឈ្នះ ដូចជា ឥណ្ឌា និង អ៊ីរ៉ង់ ជាដើម។ ដូច្នេះ នេះបានបង្ហាញពីមោទនភាព មិនត្រឹមតែសម្រាប់ គណៈកម្មាធិការជាតិប៉ារ៉ាឡាំពិកកម្ពុជា ប៉ុណ្ណោះទេ តែក៏សម្រាប់ប្រទេសជាតិទាំងមូល ព្រោះលទ្ធផលនេះបានផ្សព្វផ្សាយពីមុខមាត់ជាតិទៅកាន់ពិភពលោក។
ឯកឧត្ដម យី វាសនា បានបញ្ជាក់ថា នេះជាលើកទី៣ជាប់គ្នាហើយ ដែលក្រុមបាល់បោះជិះរទេះនារីកម្ពុជា បានឆ្លងផុតវគ្គជម្រុះ ព្រឹត្តិការណ៍កីឡាយុវជនអាស៊ី បន្ទាប់ពីធ្វើបានក្នុងឆ្នាំ ២០១៨ និង ២០២២។
ព្រឹត្តិការណ៍ Asia Oceania Championship ប្រព្រឹត្តទៅនៅទីក្រុងបាងកក ប្រទេសថៃ ពីថ្ងៃទី ៧ ដល់ថ្ងៃទី ១៥ វិច្ឆិកា ឆ្នាំ ២០២៥។
ក្រុមកីឡាការិនីប៉ារ៉ាឡាំពិកកម្ពុជា លើប្រភេទកីឡាបាល់បោះជិះរទេះ បានឈ្នះទៀតហើយ សម្រាប់ការប្រកួតនារសៀលថ្ងៃទី ១៣ វិច្ឆិកា ឆ្នាំ២០២៥។ ក្នុងការប្រកួតប្រចាំពូល B កម្ពុជា បានយកឈ្នះ អ៊ីរ៉ង ឡាវ ហ្វីលីពីន ឥណ្ឌា តែចាញ់ម្ចាស់ផ្ទះថៃ៕
