អត្តពលិកកីឡាជិះក្ដាររំអិលលើទឹកកកម្ពុជាចំនួន២រូប ដឹកនាំដោយលោក ម៉ក់ ចាន់តារា ជាអគ្គលេខាធិការ បានធ្វើដំណើរទៅកាន់សាធារណរដ្ឋកូរ៉េ នៅរាត្រីថ្ងៃសៅរ៍ ទី១៥ ខែវិច្ឆិកា ឆ្នាំ២០២៥ សម្រាប់ការហ្វឹកហាត់ និង ប្រកួតចំនួន២សប្ដាហ៍ ក្រោមការឧបត្ថម្ភគាំទ្រពីភាគីម្ចាស់ផ្ទះ។
អត្តពលិកទាំង២រូបមានកីឡាករ អាន វឌ្ឍនៈ និងកីឡាការិនី ហ៊ុល ដេបូរ៉ា ហើយនេះជាលើកទី២ហើយសម្រាប់ការចូលរួមវគ្គហ្វឹកហាត់នៅកូរ៉េខាងត្បូង បន្ទាប់ពីបានចំណាយពេល២សប្ដាហ៍ដូចគ្នាកាលខែវិច្ឆិកា ឆ្នាំ២០២៤។
លោក ម៉ក់ ចាន់តារា អគ្គលេខាធិការកីឡាជិះក្ដាររំអិលលើទឹកកកម្ពុជា មានប្រសាសន៍ថា ការចូលរួមលើកនេះសម្រាប់សប្ដាហ៍ដំបូង គឺជាការបន្តហ្វឹកហាត់បច្ចេកទេសលើរយៈចម្ងាយ ហើយមួយសប្ដាហ៍បន្ទាប់នឹងមានការប្រកួតបញ្ចេញសមត្ថភាពផងដែរ។ លោកថា នេះជាបទពិសោធយ៉ាងសំខាន់សម្រាប់កូនក្រុមក្នុងការសម្រួចខ្លួនកាន់តែល្អ និងបន្តចែករំលែកទៅដល់កីឡាករ កីឡាការិនីផ្សេងៗទៀត។
លោក ម៉ក់ ចាន់តារា បង្ហើបដែរថា សហព័ន្ធកីឡាជិះក្ដាររំអិលលើទឹកកកកម្ពុជានឹងលេចចេញជារូបរាងនាពេលឆាប់ៗខាងមុខហើយ ហើយនឹងបង្កលក្ខណៈកាន់តែងាយស្រួលសម្រាប់អត្តពលិកកម្ពុជាបានចូលរួមការប្រកួតនានា ជាពិសេសត្រៀមចូលរួមព្រឹត្តិការណ៍កីឡាអូឡាំពិករដូវរងា ឆ្នាំ២០២៦ នៅប្រទេសអ៊ីតាលី។
ចំណែកកីឡាករ អាន វឌ្ឍនៈ និងកីឡាការិនី ហ៊ុល ដេបូរ៉ា អះអាងថា នេះជាឱកាសដ៏ល្អក្នុងការចូលរួមហ្វឹកហាត់នៅសាធារណរដ្ឋកូរ៉េ ដោយអាចទទួលបានមេរៀន និងបច្ចេកទេសថ្មី មកពង្រឹងសមត្ថភាពឱ្យបានកាន់តែខ្លាំងក្លាថែមទៀត៕
