ភ្នំពេញៈ កាលពី នេះ សហព័ន្ធកីឡាប្រដាល់សកលកម្ពុជា បានប្រកាសនៅលើផេកហ្វេបុកផ្លូវការរបស់ខ្លួនថា នឹងរៀបចំការព្រឹត្តិការណ៍ប្រកួតជ្រើសរើសជើងឯកថ្នាក់ជាតិឆ្នាំ២០២៥រយៈពេល៤ថ្ងៃចាប់ពីថ្ងៃទី២៣ដល់ថ្ងៃទី២៦ ខែ ធ្នូ ឆ្នាំ២០២៦ នៅសាលកីឡាការ៉ាតេស្ថិតក្នុងសាកលវិទ្យាល័យភូមិន្ទភ្នំពេញ (RUPP) នាពេលឆាប់ៗខាងមុខនេះ។
ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់កម្ពុជា មានប្រសាសន៍ថា៖ ការប្រកួតកីឡាប្រដាល់សកលជ្រើសរើសជើងឯកថ្នាក់ជាតិឆ្នាំ២០២៥នេះ គឺមានការខុសប្លែកពីការកួតរៀបចំមុនៗ ដោយសារតែសហព័ន្ធបានដាក់បញ្ចូលនូវវិញ្ញាសាថ្នាលសម្រាប់កីឡាករវ័យក្មេងអាយុក្រោម១៦ឆ្នាំ ទម្ងន់ ៤០ គ.ក្រ, ៤៥ គ.ក្រ។
ឯកឧត្តម បានរំលេចថា មូលហេតុដែលសហព័ន្ធសម្រេចបន្ថែមវិញ្ញាសាថ្នាលចូលក្នុងជើងឯកថ្នាក់ជាតិថ្នាក់ជាតិប្រចាំឆ្នាំ២០២៥នេះ គឺសហព័ន្ធចង់ផ្តល់ឱកាសឱ្យកីឡាករវ័យក្មេងបានចូលរួមការប្រកួតថ្នាក់ជាតិ ដើម្បីទទួលបានបទពិសោធន៍ និងបច្ចេកទេសសម្រួចឆ្ពោះទៅកីឡាយុវជនអាស៊ីឆ្នាំ២០៣១ដែលព្រះរាជាណាចក្រកម្ពុជាទទួលធ្វើជាម្ចាស់ផ្ទះ។
ទន្ទឹមជាមួយគ្នានេះ ឯកឧត្តម ប្រធានសហព័ន្ធក៏បានអំពាវនាវជូនដំណឹងដល់សមាគម ក្លឹបកីឡាប្រដាល់សកលរាជធានី-ខេត្ត ក្រសួង ទាំងអស់ មកទទួលពាក្យចូលរួមប្រកួតចាប់ពីថ្ងៃជូនដំណឹងនេះ រហូតដល់ថ្ងៃទី១៧ ខែធ្នូ ឆ្នាំ២០២៥ វេលាម៉ោង៖ ១៧:០០ នាទីល្ងាច នៅទីស្នាក់ការសហព័ន្ធកីឡាប្រដាល់សកលកម្ពុជា ស្ថិតក្នុងទីស្នាក់ការគណៈកម្មាធិការជាតិអូឡាំពិកកម្ពុជា ។ សម្រាប់ព័ត៌មានលម្អិត សូមទំនាក់ទំនងនៅទីស្នាក់ការសហព័ន្ធកីឡាប្រដាល់សកលកម្ពុជា ឬ តាមរយៈទូរសព្ទលេខ៖ ០៩៧ ៣០៧ ៩៩៤៤ / ០៧៧ ៣៥៤ ៤០២/០១០ ៩៨៧ ៨៩២ ។
គួបញ្ជាក់ផងដែរថា៖ ការប្រកួតដែលរៀបចំដោយសហព័ន្ធកីឡាប្រដាល់សកលកម្ពុជាក្រោមការឧបត្ថម្ភគាំទ្រដោយក្រសួងអប់រំយុវជននិងកីឡាជាការប្រកួតចម្រាញ់រកជើងខ្លាំងប្រចាំឆ្នាំមួយនេះត្រូវបានសហព័ន្ធសម្រេចដាក់វិញ្ញាសាប្រកួតនិងប្រភេទទម្ងន់ប្រជែងមានដូចជា៖ វិញ្ញាសា និងប្រភេទទម្ងន់ត្រូវចូលរួមប្រកួត រួមមាន៖ វិញ្ញាសាថ្នាល (ក្រោម១៦ឆ្នាំ) ទម្ងន់ ៤០ គ.ក្រ, ៤៥ គ.ក្រ ។ វិញ្ញាសាយុវជន (ក្រោម១៩ឆ្នាំ)ទម្ងន់ ៥១ គ.ក្រ, ៥៤ គ.ក្រ, ៥៧ គ.ក្រ ។ វិញ្ញាសាបុរស (១៩ឆ្នាំឡើង)ទម្ងន់៥១ គ.ក្រ, ៥៤ គ.ក្រ, ៥៧ គ.ក្រ, ៦០ គ.ក្រ, ៦៣.៥ គ.ក្រ, ៦៧ គ.ក្រ, និង ៧១ គ.ក្រ ។ វិញ្ញាសានារី (មិនកំណត់អាយុ)ទម្ងន់ ៥៤ គ.ក្រ៕
