ស្របពេលកម្ពុជា នឹងចូលរួមព្រឹត្តិការណ៍កីឡាស៊ីហ្គេម(SEA Games) លើកទី៣៣ ឆ្នាំ២០២៥ នៅប្រទេសថៃ ដែលនឹងប្រព្រឹត្តទៅពីថ្ងៃទី៧-២០ ខែធ្នូ ឆ្នាំ២០២៥ ខាងមុខ មានសាធារណៈជន បានបញ្ចេញទស្សនៈផ្សេងៗជាច្រើនលើបណ្ដាញសង្គម។
ទន្ទឹមនឹងការបញ្ចេញមតិរបស់មហាជន ក៏មានទស្សនៈមួយចំនួន ដែលប្រិយមិត្តគួរស្វែងយល់ អំពីការចូលរួមនេះផងដែរ រួមមាន៖
១. ការចូលរួមប្រកួតកីឡាស៊ីហ្គេម លើកនេះ គឺកម្ពុជាចូលរួមប្រកួត ក្នុងនាមជាសមាជិក និងគ្រួសារសហព័ន្ធកីឡាអាស៊ីអាគ្នេយ៍(SEAGF) ក៏ដូចជាចលនាអូឡាំពិកតំបន់ ។ ចលនាអូឡាំពិកប្រទេសជាសមាជិក ត្រូវមានកាតព្វកិច្ចចូលរួមប្រកួតពហុកីឡាតាមការកំណត់។
២. គោលការណ៍គ្រឹះអូឡាំពិកអន្តរជាតិ គឺប្រឆាំងនឹងការរើសអើងគ្រប់ទម្រង់ ក្នុងវិស័យកីឡា និងជៀសវាងពីសម្ពាធនយោបាយ សាសនា ជាតិសាសន៍ និងនិន្នាការសង្គមឡើយ។ ប្រកាន់យកស្មារតីសាមគ្គីភាព មិត្តភាព និងយោគយល់គ្នា ដើម្បីកសាងពិភពលោកមួយល្អប្រសើរ។
៣. ព្រឹត្តិការណ៍កីឡាស៊ីហ្គេម ជាបុព្វសិទ្ធិរបស់សហព័ន្ធកីឡាអាស៊ីអាគ្នេយ៍ទាំង ១១ប្រទេស គ្រប់គ្រងដឹកនាំ ។ រីឯម្ចាស់ផ្ទះជាអ្នករៀបចំតាមសេចក្តីសម្រេចរបស់ក្រុមប្រឹក្សាសហព័ន្ធកីឡាអាស៊ីអាគ្នេយ៍(SEAGF Council) ទាំង ១១ ប្រទេស ។
៤. ជ័យលាភីមេដាយ ដែលប្រទេសទាំងអស់ប្រកួតប្រជែងដណ្តើមគ្នា ជាមេដាយ SEAGF មិនមែនមេដាយរបស់ម្ចាស់ផ្ទះទេ។
៥. បើមិនចូលរួមយើងនឹងត្រូវបន្ទោសថា មិនគោរពធម្មនុញ្ញអូឡាំពិក និងធម្មនុញ្ញ SEAGF ។
៦. បើយើងចូលរួមដោយយកហេតុផលផ្សេងៗខុសពីគោលការណ៍ច្បាប់កីឡាជាសកលខាងលើ ក៏ត្រូវអន្តរជាតិថ្កោលទោស ឬដាក់ ពិន័យ ។ តែជនរួមជាតិយើងមួយចំនួនមិនគាំទ្រ និងមិនពេញចិត្តឲ្យចូលរួមដោយអស់ទំនុកចិត្ត បារម្មណ៍សុវត្ថិភាពក៏ត្រឹមត្រូវដែរ។
ឧទាហរណ៍ថា ក្នុងស្ថានភាព បច្ចុប្បន្នដែលកម្ពុជាត្រូវការសន្តិភាព បើមានកិច្ចប្រជុំទ្វេភាគីក្នុងប្រទេសថៃ លើទឹកដីថៃ រវាងកម្ពុជា និងថៃ តើយើងទៅចូលរួមឬអត់? ប្រសិនបើមានប្រជុំ ASEAN លើដីថៃមានការអញ្ជើញត្រឹមត្រូវយើងចូលរួមឬអត់? ថ្មីៗនេះប្រឡងបវកញ្ញានៅថៃ ប្រកួតកីឡាជនពិការរទេះនារីនៅថៃក៏យើងបានចូលរួមដោយសុវត្ថិភាពមកវិញដែរ។ ប៉ុន្មានឆ្នាំមុនការប្រកួតកីឡាអូឡាំពិករដូវរងារនៅកូរ៉េខាងត្បូង ប្រតិភូកូរ៉េខាងជើងបានចូលរួម ទោះបីបងប្អូនកូរ៉េទាំងពីរជាសត្រូវដ៏សាហាវនឹងគ្នាក៏ដោយ។
តើអាចទេ ដែលយើងយកកីឡាជាសារកាទូត ឬជាសមរភូមិកាទូតមួយទៀតបង្ហាញថា កម្ពុជាចង់បានសន្តិភាព គោរពជានិច្ចគោលការណ៍ច្បាប់កីឡាអន្តរជាតិ ច្បាប់កីឡាតំបន់ និងមានសេចក្តីក្លាហ៊ាន ថ្លៃថ្នូ មិនចុះញមចំពោះអគតិទាំងឡាយ និងសភាវអាក្រក់ទាំងអស់ឡើយ។
នេះជាទស្សនៈផ្ទាល់ខ្លួនរបស់ឯកឧត្តម វ៉ាត់ ចំរើន មិនឆ្លុះបញ្ចាំងជាទស្សនរួមរបស់គណៈកម្មាធិការជាតិអូឡាំពិកកម្ពុជា និងបងប្អូនជនរួមជាតិទេ។
គួរដឹងថា ក្រោយទទួលបានការអនុញ្ញាតពីរាជរដ្ឋាភិបាលកម្ពុជា ក្រុមប្រតិភូកីឡាកម្ពុជាចំនួន ២១ប្រភេទ ក្នុងនោះមានកីឡាករ-កីឡាការិនី ២២២នាក់ នឹងចូលរួមព្រឹត្តិការណ៍ប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ នាខែក្រោយ រួមមានកីឡាអត្តពលកម្ម ហែលទឹក ជិះសេះ គុនដាវ កាយសម្ព័ន្ធ យូដូ តេក្វាន់ដូ WT ទ្រីយ៉ាត្លុង បាល់ទះ បាល់ទាត់ ចំបាប់ បញ្ចស៊ីឡាត់ ឃីកបុកស៊ីង ប៉េតង់ សីដក់ ម៉ូតូទឹក ការ៉ាតេ ជឺជីតស៊ូ វូស៊ូ បាល់ទាត់លើតុ និងកីឡាអេឡិចត្រូនិក៕
