បើតាមវិបសាយផ្លូវការរបស់សហព័ន្ធកីឡាបាល់ទាត់អាស៊ីអាគ្នេយ៍ (ASEAN Football) ការប្រកួតកីឡាបាល់ទាត់ថ្មីមួយហៅថា FIFA ASEAN Cup អាចនឹងចាប់ផ្ដើមជាផ្លូវការអំឡុង FIFA's Day ឆ្នាំ២០២៧ ដែលជាផ្នែកមួយរបស់សហព័ន្ធកីឡាបាល់ទាត់ពិភពលោក (FIFA)។
សុទិដ្ឋិនិយមនៃការលេចចេញនូវព្រឹត្តិការណ៍ថ្មីនេះកើតឡើងអំឡុងការចូលរួមរបស់លោក Gianni Infantino ប្រធាន FIFA ក្នុងមហាសន្និបាតរបស់សហព័ន្ធកីឡាបាល់ទាត់អាស៊ីអាគ្នេយ៍ ថ្ងៃទី២២ និង២៣ ខែវិច្ឆិកា ឆ្នាំ២០២៥ នៅក្រុងបាងកក ប្រទេសថៃ។
គេរំពឹងថា វត្តមានរបស់លោក Infantino ក្នុងមហាសន្និបាតនេះនឹងជំរុញផែនការ FIFA ASEAN Cup កើតឡើងដោយជោគជ័យ។
គួររំឭកថា ផែនការព្រឹត្តិការណ៍ FIFA ASEAN Cup ត្រូវបានបង្ហាញកាលថ្ងៃទី២៦ ខែតុលា កន្លងទៅក្រោយការចុះអនុស្សរណៈយោគយល់រវាង ASEAN និង FIFA នៅរាជធានីគូឡាឡាំពួរ ក្នុងន័យជំរុញ និងលើកកម្ពស់ស្តង់ដារកីឡាបាល់ទាត់ក្នុងតំបន់អាស៊ាន។
សូមបញ្ជាក់ដែរថា ព្រឹត្តិការណ៍បាល់ទាត់ជើងឯកអាស៊ាន AFF Cup ដែលរៀបចំឡើង២ឆ្នាំម្ដង ដោយមានការចូលរួមពីក្រុមបាល់ទាត់ជម្រើសជាតិទាំង១១នៃប្រទេសសមាជិកអាស៊ាននោះ មិនស្ថិតក្នុងប្រព័ន្ធរបស់ FIFA ទេ៕
