(ភ្នំពេញ)៖ បន្ទាប់ពីសិក្សាវគ្គបណ្ដុះបណ្ដាលគ្រូបច្ចេកទេសថ្នាក់ជាតិ ឆ្នាំ២០២៥ ដោយជោគជ័យ ក្រោយដំណើរការសិក្សារយៈពេល ៥ថ្ងៃ ចាប់ពីថ្ងៃទី១៩-២៣ ខែវិច្ឆិកានេះ ខណៈមន្ដ្រីជំនាញ នៃក្រសួងអប់រំ យុវជន និងកីឡា បានវាយតម្លៃខ្ពស់ ចំពោះការរៀបចំវគ្គបណ្ដុះបណ្ដាលដ៏សំខាន់នេះ។
លោកសាស្ដ្រាចារ្យ ដែក ភារៈ អគ្គលេខាធិការរងសហព័ន្ធកីឡាការ៉ាតេបានមានប្រសាសន៍ថា៖ វគ្គនេះពិតជាសំខាន់ណាស់ដើម្បីបង្កើនធនធានគ្រូបង្វឹកនៅក្នុងប្រទេសកម្ពុជា។ សិក្ខាកាមចូលរួមបានត្រឹមតែ ៣០ នាក់ប៉ុណ្ណោះដោយសារកង្វះថវិកា។ សិក្ខាកាមភាគច្រើនជាគ្រូបង្គោលមកពីតាមបណ្តាលសាលាគុន សមាគម និងក្លិប ប៉ុន្តែនៅមានគ្រូជំនួយជាច្រើនទៀតដែលមិនបានចូលរួម។
សហព័ន្ធពិតចង់បើកវគ្គបណ្តុះបណ្តាលឲ្យបានច្រើនបន្ថែមនៅតាមបណ្តាខេត្តនានា ប៉ុន្តែដោយសារកង្វះថវិកាទើបមិនទាន់អាចដំណើរតាមការចង់បាន។
ទោះបីជាយ៉ាងណា តំណាងសហព័ន្ធរូបនេះបានសង្កត់ធ្ងន់ថា រឿងសំខាន់ចាំបាច់បំផុតនៅចំពោះមុខគឺសិក្ខាកាមដែលទទួលបានចំណេះដឹងពី វគ្គបណ្តុះបណ្តាលនេះគឺចែករំលែកដល់គ្រូជំនួយ និងអ្នកពាក់ព័ន្ធផ្សេងៗទៀតឲ្យបានទូលំទូលាយ។
លោកថា៖វគ្គនេះគឺជាផ្នែកមួយ នៃការអភិវឌ្ឍវិស័យកីឡាការ៉ាតេកម្ពុជា ក្រោមការដឹកនាំ និងយកចិត្តទុកដាក់របស់លោកអគ្គបណ្ឌិតសភាចារ្យ អូន ព័ន្ទមុនីរ័ត្ន ឧបនាយករដ្ឋមន្ដ្រី និងជាប្រធានសហព័ន្ធ ។ ជាលទ្ធផល ក្រោយបញ្ចប់ការសិក្សារយៈពេល ៥ថ្ងៃនេះ ក្នុងចំណោមសិក្ខាកាមចូលរួម មានអ្នកទទួលបាននិទ្ទេសល្អ ១៦នាក់, និទ្ទេសល្អបង្គួរ ៩នាក់ និងនិទ្ទេសមធ្យម ៥នាក់ ។
ជាមួយគ្នានេះដែរ លោក ប៉ែន វុទ្ធី ប្រធាននាយកដ្ឋានកីឡាជំនាញ និងមហាជន បានលើកឡើងថា វគ្គបណ្តុះបណ្តាលគ្រូបច្ចេកទេសកីឡាការ៉ាតេថ្នាក់ជាតិ ឆ្នាំ២០២៥ នេះ ជាការឆ្លុះបញ្ចាំងនូវសមត្ថភាព ចំណេះដឹង បទពិសោធន៍ បច្ចេកទេស និងទេពកោសល្យរបស់គ្រូបង្វឹក ដែលបានខិតខំប្រឹងប្រែង យកចិត្តទុកដាក់អស់ពីមត្ថភាពរបស់ខ្លួនក្នុងរយៈពេល ៥ថ្ងៃកន្លងមកក្នុងការរៀនសូត្រ។
លោកសង្ឃឹមថា ក្រោយបញ្ចប់វគ្គនេះ សិក្ខាកាមទាំងអស់ នឹងយកចំណេះដឹងទទួលបានពីគ្រូឧទ្ទេស ទៅអនុវត្តឲ្យកាន់តែមានប្រសិទ្ធភាព នៅតាមសមាគមក្លិប និងសាលាគុន តាមមូលដ្ឋានរៀងៗខ្លួន ដើម្បីចូលរួមអភិវឌ្ឍវិស័យកីឡាការ៉ាតេកម្ពុជាឲ្យកាន់តែរីកចម្រើន ក្នុងការកសាងធនធានកីឡាករ-កីឡាការិនីឆ្នើមៗមចូលរួមការប្រកួតថ្នាក់ជាតិ និងអន្ដរជាតិនានា៕
