សហព័ន្ធកីឡាស្គែតកម្ពុជាបានសម្រេចបញ្ជូនកីឡាករឆ្នើមវ៉ាន់ យិនតុលាចូលរួមប្រកួតប្រជែង ក្នុងព្រឹត្តិការណ៍ប្រកួតកីឡាក្តាស្គែតជ្រើសរើសជើងឯកពិភពលោក (World Skateboarding Tour Kitakyushu Street 2025 ) ដែលរៀបចំឡើងដោយសហព័ន្ធអន្តរជាតិ world Skate ចាប់ផ្តើមពីថ្ងៃ២៦ ដល់ថ្ងៃទី៣០ ខែវិច្ឆិកា ឆ្នាំ២០២៥ នៅប្រទេសជប៉ុន។ នេះក៏ជាលើកដំបូងដែលភាគីស្គែតកម្ពុជាបញ្ជូនកីឡាករទៅប្រកួតជើងឯកពិភពលោក។
លោក កុសល ពិសី ប្រធានសហព័ន្ធកីឡាស្កែតកម្ពុជា ប្រាប់ថា ព្រឹត្តិការណ៍ World Skateboarding Tour Kitakyushu Street នេះ កើតចេញពីការប្រកួតវិលជុំសន្សំពិន្ទុពីព្រឹត្តិការណ៍អូឡាំពិកតូក្យូកន្លងទៅ។ ដោយឡែកកីឡាករ វ៉ាន់ យិនតុលា ពិតជាស័ក្ដិសមដែលអាចចូលរួមព្រឹត្តិករណ៍នេះ ព្រោះរូបគេមានបទពិសោធច្រើន និងបានហ្វឹកហាត់យ៉ាងពិសេសនៅប្រទេសជប៉ុនផងដែរនាពេលកន្លងមក។
គួញ្ជាក់ផងដែរថា ព្រឹត្តិការណ៍ (World Skateboarding Tour Kitakyushu Street 2025 ) មានកីឡាករមកពីជុំវិញពិភពលោកចូលរួមសរុបចំនួន១១៩រូប ចែកចេញជា៧ពូលមកពី៤៧ប្រទេសជុំវិញពិភពលោក។
លោក កុសល ពិសី ក្នុងនាមប្រធានសហព័ន្ធកីឡាស្គែតកម្ពុជា បានសំណូមពរដល់ប្រជាពលរដ្ឋទូទាំងប្រទេស ចូលរួមលើកទឹកចិត្ត និងគាំទ្រពីវត្តមានកីឡាករកម្ពុជា ដែលបានចូលរួមក្នុងព្រឹត្តិការណ៍ពិភពលោកនេះ។ ទន្ទឹមនឹងនេះ លោក កុសល ពិសី ក៏បានសំណូមពរពលរដ្ឋខ្មែរដែលរស់នៅប្រទេសជប៉ុន ចូលរួមគាំទ្រការប្រកួតដោយផ្ទាល់ដើម្បីជាលើកទឹកចិត្តដល់អត្តពលិកកម្ពុជា៕
