ភ្នំពេញ៖ បន្ទាប់ពីក្រុមកីឡាបញ្ចស៊ីឡាត់កម្ពុជា ដែលទើបបានបំបែកកំណត់ត្រាឈ្នះមេដាយសំរឹទ្ធ ជាប្រវត្តិសាស្រ្ត មុនគេ ពីការប្រកួតកីឡាយុវជនអាស៊ី លើកទី ៣ ឆ្នាំ២០២៥ នៅប្រទេសបារ៉ែនកាលពីខែតុលា កន្លងទៅនោះ ពេលនេះ អត្តលិកនៃកីឡាថ្មីមួយប្រភេទនេះ បានបន្តយកមេដាយប្រាក់១គ្រឿង និង សំរិទ្ធ១គ្រឿងទៀតពីព្រឹត្តិការណ៍ប្រកួតកីឡា សិស្សអាស៊ាន លើកទី១៤ (14th ASEAN School game 2025) នៅប្រទេសប្រ៊ុយណេ។
ការប្រកួតកីឡាសិស្សអាស៊ាននេះ នឹងប្រព្រឹត្តទៅចាប់ពីថ្ងៃទី២០ ដល់ថ្ងៃទី២៩ ខែវិច្ឆិកា ឆ្នាំ២០២៥ ហើយសហព័ន្ធកីឡាបញ្ចស៊ីឡាត់កម្ពុជា ក្រោមការអនុញ្ញាតពីក្រសួងអប់រំ យុវជន និងកីឡា បានបញ្ជូនប្រតិភូចំនួន៨នាក់ទៅចូលរួម ក្នុងនោះមានគ្រូបង្វឹក២នាក់ កីឡាករ៤នាក់ និងកីឡាការិនី២នាក់។
អត្តពលិក២រូបដែលបាននាំយកមេដាយប្រាក់ និង សំរិទ្ធ បានមកដល់កម្ពុជាវិញយប់ម្សិលមិញនេះ ក្រោមការទទួលស្វាគមន៍យ៉ាងកក់ក្ដៅពីសំណាក់ ឯកឧត្តម ប៉ុន សុខ អគ្គនាយកកីឡានៃក្រសួងអប់រំយុវជន និង កីឡា
និងតំណាងសហព័ន្ធកីឡាបញ្ចស៊ីឡាត់កម្ពុជាផងដែរ នាអាកាសយានដ្ឋានអន្តរជាតិតេជោ។
សមិទ្ធផលដ៍ធំដែលទទួលបានពីការប្រកួតនេះ គឺទទួលបានដោយកីឡាករ រ៉ៃយ៉ុង នួនមុន្នីរាជ ឈ្នះមេដាយប្រាក់១គ្រឿង ក្នុងប្រភេទវិញ្ញាសា Boy Class B 43-47kg ដោយចាញ់ម្ចាស់ក្បាច់គុនឥណ្ឌូណេស៊ីក្នុងវគ្គផ្តាច់ព្រ័ត្រ។ និងកីឡាករ ភុក ដានីញ៉ែល ទទួលបានមេដាយសំរឹទ្ធ១គ្រឿង ក្នុងប្រភេទវិញ្ញាសា Boy Class C 47-51kg ដោយចាញ់ម្ចាស់ក្បាច់គុនឥណ្ឌូណេស៊ីក្នុងវគ្គពាក់កណ្ដាលផ្ដាច់ព្រ័ត្រ ហើយក៍ជាម្ចាស់មេដាយដាយសំរឹទ្ធ ពីការប្រកួតកីឡាយុវជនអាស៊ី លើកទី ៣ ឆ្នាំ នៅប្រទេសបារ៉ែនផងដែរ៕
