កីឡាការិនីគុនដាវជម្រើសជាតិកម្ពុជា ផាត លីកា ម៉ែន ម៉ូនីកា និង ហៃ ស្រីស្រស់ ថ្លែងថា បានប្រឹងប្រែងហ្វឹកហាត់យ៉ាងខ្លាំងក្នុងការត្រៀមខ្លួនទៅចូលរួមព្រឹត្តិការណ៍កីឡាស៊ីហ្គេម ២០២៥ នាពេលខាងមុខ។
កីឡាការិនីទាំង៣ប្រាប់ថា បានបង្កើនហ្វឹកហាត់យ៉ាងខ្លាំង។ ជាក់ស្ដែងពួកគេបន្ថែមម៉ោងហ្វឹកហាត់ដល់ទៅ៤ម៉ោងដើម្បីសម្រួចសមត្ថភាពកាន់តែល្អទៀត។ អ្នកទាំង៣សង្កត់ធ្ងន់ថា នឹងប្រឹងអស់ពីសមត្ថភាព ហើយថា ប្រសិនបើមិនបានមេដាយ ក៏អាចនឹងបានលទ្ធផលល្អ។
ទាក់ទងនឹងការចូលរួមសម្រាប់ក្រុមជម្រើសជាតិគុនដាវកម្ពុជានៅស៊ីហ្គេម ២០២៥ លោក ឌិន សុផល ដែលជាគ្រូបង្គោលប្រាប់ថា សមាសភាពទាំងអស់មាន៦រូប ដោយមានកីឡាករ១រូប និង កីឡាការិនី៥រូប។ លោកសង្ឃឹមថា កូនក្រុម នឹងអាចធ្វើបានល្អ ហើយអាចប្រជែងបានមេដាយត្រលប់មកមាតុភូមិវិញ។
ទាំងគ្រូបង្វឹក និងកីឡាករ កីឡាការិនីក៏បានប្ដេជ្ញាគោរពគោលការណ៍ដែលកម្ពុជាបានរៀបចំដើម្បីសុវត្ថិភាព និងរក្សាវិន័យឱ្យបានល្អក្នុងការចូលរួមការប្រកួតស៊ីហ្គេម៕
