មានរយៈពេល៨ឆ្នាំហើយដែលយុវជន ទែន វ៉ាន់ដេត បានចូលរួមហ្វឹកហាត់កីឡាកាយសម្ព័ន្ធ និងបានជាប់ជម្រើសជាតិកម្ពុជាទៅប្រកួតលើឆាកអន្តរជាតិជាហូរហែ។
ម្ចាស់មេដាយមាសជើងឯកថ្នាក់ជាតិឆ្នាំ២០២៥ វិញ្ញាសាអាទីស្ទីក ប្រាប់ថា ចាប់អារម្មណ៍កីឡាកាយសម្ព័ន្ធតាមឪពុករបស់គេដែលជាអតីតកីឡាករមួយរូបដែរ ដូច្នេះចង់ដើរតាមគន្លងអ្នកមានគុណក្នុងកីឡាមួយនេះ។
កីឡាករមានប្រភពពីស្រុកកំពង់ត្រឡាច ខេត្តកំពង់ឆ្នាំង អះអាងដែរថា កីឡាកាយសម្ព័ន្ធធ្វើឱ្យរូបគេអាចនាំកិត្តិយសជូនគ្រួសារ និងជាតិមាតុភូមិតាមរយៈការឈ្នះមេដាយយ៉ាងច្រើនទាំងក្នុងស្រុក និងលើឆាកអន្តរជាតិ។
សិស្សថ្នាក់ទី១២ដដែលរំឭកថា ទម្រាំទទួលបានផ្លែផ្កាដូចសព្វថ្ងៃគេបានឆ្លងកាត់ការលំបាកយ៉ាងច្រើន ជាពិសេសការហ្វឹកហាត់សម្របខ្លួន តែការតស៊ូប្រឹងប្រែងធ្វើឱ្យរូបគេជម្នះបានឧបសគ្គនានា។ គេថា នាពេលអនាគត ប្រសិនបើមានពេលគ្រប់គ្រាន់គេចង់រួមចំណែកបណ្ដុះបណ្ដាលយុវជនជំនាន់ក្រោយបន្តទៀត៕
