ទោះបីស្ថិតក្នុងការលំបាកពីការឈ្លានពានពីប្រទេសថៃ នាពេលថ្មីៗនេះ ទិវារត់ប្រណាំងចម្ងាយឆ្ងាយនៅតំបន់អង្គរ ឬ Angkor Ultra Trail 2026 នៅតែអាចរក្សាបាននៅចំនួនអ្នកចុះឈ្មោះចូលរួមយ៉ាងច្រើនផុសផុល។ ជាក់ស្ដែង គិតមកទល់ពេលនេះ អ្នកចុះឈ្មោះចូលរួមទិវារត់ប្រណាំងចម្ងាយឆ្ងាយនៅតំបន់អង្គរ លើកទី៩ ឆ្នាំ ២០២៦ មានចំនួន១២២៩នាក់ហើយ ហើយគណៈកម្មការរៀបចំរំពឹងថា អ្នកចូលរួមនៅថ្ងៃប្រកួតជាក់ស្ដែង អាចមានចំនួនខ្ទង់១៥០០នាក់។ ក្នុងនោះអ្នករត់ជនជាតិខ្មែរមានជាង៥០០នាក់ ជនជាតិបារាំងឈរលំដាប់ទី២ មានជាង៤០០នាក់ តាមពីក្រោយដោយជនជាតិវៀតណាម។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា ការរក្សាបាននូវចំនួនយ៉ាងផុសផុលបែបនេះ ដោយសារតែការមានទំនុកចិត្តពីអ្នកចុះឈ្មោះ។ ជាក់ស្ដែង តំបន់ទេសចរណ៍ខេត្តសៀមរាបនៅតែទទួលបានទេសចរបរទេសយ៉ាងច្រើនកុះករ ជាហេតុធ្វើឱ្យអ្នកចុះឈ្មោះមានទំនុកចិត្តលើសុខសុវត្ថិភាពនៃការចូលរួម។ ទន្ទឹមនឹងនេះការរៀបចំដ៏ល្អក្រុមហ៊ុន Phoenix Voyages ដែលមានលោក Edouard George ជាប្រធាន លោក JEAN CLAUDE LE CORNEC ជាប្រធានប្រតិបត្តិការ និង លោក LE DIZES LUDOVIC ជាអ្នកចាត់ការទូទៅក៏បានផ្ដល់ភាពកក់ក្ដៅដល់អ្នកចូលរួមផងដែរ។
ទិវារត់ប្រណាំងចម្ងាយឆ្ងាយនៅតំបន់អង្គរ លើកទី៩ ឆ្នាំ ២០២៦ នឹងប្រព្រឹត្តទៅនៅថ្ងៃទី២៤ ខែមករា លើទឹកដីខេត្តសៀមរាប។ ទិវារត់ប្រណាំងប្រចាំឆ្នាំនេះត្រូវបានរៀបចំឡើងដើម្បីលើកកម្ពស់វិស័យទេសចរណ៍ជាតិ ជាពិសេសនៅតំបន់អង្គរ និងជួយដល់សកម្មភាពមនុស្សធម៌។ ជាក់ស្ដែង Phoenix Voyages នឹងជួយដល់ការជួសជុលសាលារៀន សាងសង់អណ្ដូង និងសម្ភារៈសិក្សាជាច្រើនទៀតនៅស្រុកពួក ខេត្តសៀមរាប។
សម្រាប់វិញ្ញាសានៃការប្រកួតមាន១០០គីឡូម៉ែត្រ ៦៤គីឡូម៉ែត្រ ៤២គីឡូម៉ែត្រ ៣២គីឡូម៉ែត្រ ១៨គីឡូម៉ែត្រ និង៨គីឡូម៉ែត្រ។ ព្រឹត្តិការណ៍នេះក៏ត្រូវបានទទួលស្គាល់ដោយរាជរដ្ឋាភិបាល និងការជំរុញយ៉ាងខ្លាំងពីឯកឧត្ដមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា។ ដូច្នេះក្រសួងស្ថាប័នពាក់ព័ន្ធនឹងប្រឹងប្រែងរៀបចំឱ្យបានយ៉ាងល្អសម្រាប់ទិវារត់ប្រណាំងដែលផ្សារភ្ជាប់នឹងធម្មជាតិមួយនេះ។
ឯកឧត្ដម វ៉ាត់ ចំរើន រំពឹងថា វត្តមានដ៏ច្រើនពីអ្នកចូលរួមទិវារត់ប្រណាំងចម្ងាយឆ្ងាយនៅតំបន់អង្គរនឹងជំរុញសន្ទុះទេសចរណ៍នៅខេត្តសៀមរាបបានកាន់តែខ្លាំងក្លា ព្រោះមិនត្រឹមតែមានអ្នកចុះឈ្មោះចូលរួមទូទៅប៉ុណ្ណោះ ក៏មានដែរនូវអ្នកចូលរួមជាលក្ខណៈកញ្ចប់ទេសចរណ៍ ដែលត្រូវចំណាយពេលមួយសប្ដាហ៍ទាំងការស្នាក់នៅ ដើរកម្សាន្ដ និងចូលរួមការប្រកួត៕
