លោក Casey Barnett អនុប្រធានសហព័ន្ធកីឡាចំបាប់កម្ពុជា មានប្រសាសន៍ថា ការប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ ២០២៥ មានកំណើនចូលរួមទាំងក្លិប ទាំងខេត្ត និងយុវជន។
ជាក់ស្ដែងគ្រាន់តែខេត្តកំពង់ឆ្នាំងមួយមានដល់ទៅ៥ក្លិបចូលរួម ហើយខេត្តថ្មីៗមានដូចជា ត្បូងឃ្មុំ និងខេត្តតាកែវ សរុបក្លិបចូលរួមមានចំនួន១៤ ខណៈកីឡាករ កីឡាការិនីជាយុវជនក៏មានកាន់តែច្រើនដូចគ្នា។ ទាំងនេះបង្ហាញការរីកចម្រើននៃកីឡាចំបាប់នៅកម្ពុជា។
លោក Casey Barnett សង្កត់ធ្ងន់ថា ភាពរីកចម្រើននេះក៏មិនអាចកើតឡើងបានដែរ ប្រសិនបើគ្មានការចូលរួមប្រឹងប្រែងពីសំណាក់បណ្ដាក្លិបនៅតាមខេត្តនានា បូករួមទាំងមន្ត្រីពាក់ព័ន្ធរបស់សហព័ន្ធកីឡាចំបាប់កម្ពុជាផងដែរ។
ការប្រកួតកីឡាចំបាប់ជើងឯកថ្នាក់ជាតិ ២០២៥ បានប្រព្រឹត្តទៅពីថ្ងៃទី៣ដល់ថ្ងៃទី៥ ខែមករា ឆ្នាំ ២០២៦ នៅសាលកីឡាចំបាប់នាពហុកីឡដ្ឋានជាតិអូឡាំពិក។ ជាលទ្ធផល ក្រុមកីឡាចំបាប់ក្រសួងមហាផ្ទៃដណ្ដើមបានមេដាយសរុប១៩គ្រឿង មានមេដាយមាស៦គ្រឿង ប្រាក់៤គ្រឿង និងសំរឹទ្ធ៩គ្រឿង ឈរកំពូលតារាង។ ចំណែកកងយោធពលខេមរភូមិន្ទ ឈរលេខ២ មានមេដាយមាស១ ប្រាក់៥ និង សំរឹទ្ធ៣ សរុប៩គ្រឿង ។ លេខ៣បានទៅលើខេត្តត្បូងឃ្មុំ មានមេដាយមាស១ ប្រាក់១ និងសំរឹទ្ធ២គ្រឿង សរុប៣គ្រឿង៕
