Readអតីត កីឡាការិនីកីឡាចំបាប់ ដែលជាម្ចាស់មេដាយមាសកីឡាចំបាប់ ក្នុងព្រឹត្តិការណ៍កីឡាស៊ីហ្គេម នៅប្រទេសមីយ៉ាន់ម៉ា ក្នុងឆ្នាំ២០១៣ និ សំណាង ដែលបានចូលនិវត្តលាឈប់ពីអាជីពជាកីឡាការិនីចំបាប់តំណាងជាតិអស់រយៈពេលជាច្រើនឆ្នាំ បានកើតសរសើរ ដល់ភាពវៃឆ្លាតរបស់កីឡាករកីឡាការិនីថ្នាលវ័យក្មេងនាពេលបច្ចុប្បន្ន គឺបានប្រើប្រាស់បច្ចេកទេសជាមូលដ្ឋានក្នុងពេលប្រកួតជាជាងប្រើប្រាស់កម្លាំងដើម្បីយកជ័យជម្នះលើគូប្រកួត។
កីឡាការិនី និ សំណាង បានថ្លែង លើកឡើងដូច្នោះ គ្រាដែលនាង ចូលរួមទស្សនាការប្រកួតកីឡាចំបាប់ជ្រើសរើសជើងឯកថ្នាក់ជាតិ ឆ្នាំ២០២៥ នាពហុកីឡដ្ឋានជាតិ។
នាងថា ការប្រើប្រាស់បច្ចេកទេសបូករួមជាមួយកម្លាំងគឺមានប្រសិទ្ធភាពខ្ពស់ជាងយើងប្រើប្រាស់តែកម្លាំងសុទ្ធ មានន័យថា ការប្រើប្រាស់បច្ចេកទេសខ្លាំង និងកម្លាំងរួមផ្សំជាភាពវៃឆ្លាតមួយ គឺភាគរយឈ្នះមានច្រើនសម្រាប់ការប្រកួត។
នាង បានរំលឹកថា កាលពីនាងនូវហ្វឹកហាត់ជាកីឡាការិនីនូវឡើយប្រកួតម្តងៗភាគច្រើនប្រើប្រាស់កម្លាំងកាយខ្លាំង ដោយបានប្រើប្រាស់បច្ចេកទេសតិចតួច ដ្បិតកាលនោះ មិនមានអ្វីដែលជាឧបករណ៍ទំនើបកម្មដែលអាចសិក្សាស្វែងរកនូវបច្ចេកទេសថ្មីៗដូចសម័យបច្ចុប្បន្ននោះទេ ពោលមានតែហ្វឹកហាត់តាមបច្ចេកទេសគ្រូបានប្រាប់តែប៉ុណ្ណោះ។
និ សំណាង បានមើលឃើញពីកម្រិតសមត្ថភាពកីឡាករកីឡាការិនីថ្នាលនាពេលបច្ចុប្បន្ន នាងជាអត្តីតកីឡាការិនី សង្ឈឹម ជឿជាក់ថា កីឡាចំបាប់របស់កម្ពុជានឹងរីកចម្រើនសនិងមានសក្កានុពលអាចឈានទៅដណ្តើមបានមេដាយជូនជាតិពីការប្រកួតអន្តរជាតិធំៗតាមផែនការគ្រោងទុករបស់សហព័ន្ធកីឡាចំបាប់ដូចជាកីឡាយុវជនអាស៊ី និងអូឡាំពិកជាដើម។
អតីតកីឡាការិនីចមបាប់ម្ចាស់មេដាយមាសព្រឹត្តិការណ៍កីឡាស៊ីហ្គេមរូបនេះ នាងបានសម្រេចចិត្តលាឈប់ពីកីឡាចំបាប់នៅក្នុងចន្លោះឆ្នាំ២០១៩ ដោយនាងបានសម្រេចចិត្តកសាងគ្រួសារ ហើយ បច្ចុប្បន្ន នាងបានបង្កើតបានកូនស្រីមួយមានអាយុ៦ឆ្នាំជាចំណងដៃ ហើយ ក៏បានក្របខណ្ឌជាមន្រ្តីរាជការមួយរូបបំរើការងារជាមន្រ្តីក្នុងក្រសួងអប់រំយុវជននិងកីឡាបំរើរការងារនៅក្នុងពហុកីឡដ្ឋានជាតិ ។ក្រៅពីការងារក្នុងក្របខណ្ឌរដ្ឋ នាងក៏ជាអ្នកគ្រូបង្ហាត់ប្រាណមួយរូបជួយផ្នែកវិស័យសុខភាព នៅខាងក្រៅផងដែរ។
សូមរំលឹកថា អតីតកីឡាការិនី កីឡាចំបាប់ និ សំណាង ជាអ្នកខេត្ត បាត់ដំបង នាងចាប់ផ្តើមចូលរួមហ្វឹកហាត់ជាកីឡាការិនីចំបាប់នៅក្នុងអាយុ១៧ឆ្នាំ នាងចាប់ផ្តើមទទួលបានមេដាយកម្រិតខ្ពស់ជូនជាតិក្នុងឆ្នាំ២០១៣ ក្នុងព្រឹត្តិការណ៍កីឡាស៊ីហ្គេម នៅប្រទេសមីយ៉ាន់ម៉ា ឆ្នាំ២០១៥ឈ្នះមេដាយសំរឹទ្ធក្នុងព្រឹត្តិការណ៍អេស៊ានប៊ីចហ្គេម នៅប្រទេសថៃ និងឆ្នាំ២០២៣ឈ្នះមេដាយសំរឹទ្ធក្នុងព្រឹត្តិការណ៍ព្រីស៊ីហ្គេម មុនព្រឹត្តិការណ៍កីឡាស៊ីហ្គេម៕
