ច្រើនឆ្នាំមកហើយដែលលោក Jurgen Klopp ទទួលបានការកោតសរសើរពីថ្នាក់ដឹកនាំ Real Madrid ហើយគេជឿថា ក្រុមរហស្សនាមអធិរាជ នឹងបើកការចរចាជាមួយ គ្រូបង្វឹកជនជាតិអាល្លឺម៉ង់ រូបនេះឆាប់ៗ។
បើតាមសារព័ត៌មាន AS ថ្នាក់ដឹកនាំ Real Madrid ជឿជាក់ថា លោក Klopp ជាជម្រើសដ៏ស័ក្ដិសមសម្រាប់តំណែងជា គ្រូបង្គោល ដោយយោងទៅតាមស្នាដៃរបស់លោកកាលនៅ Liverpool និង Borussia Dortmund។ ថ្នាក់ដឹកនាំខ្លះរបស់ Real Madrid ថែមទាំងបានចាត់ទុកថា លោក Klopp មានសមត្ថភាពខ្ពស់ជាងបេក្ខភាព គ្រូបង្វឹក ផ្សេងៗជាច្រើនទៀតដែរ។
ប៉ុន្តែការចង់បានលោក Klopp នាពេលនេះ ហាក់មិនងាយស្រួលឡើយ ព្រោះលោកកំពុងតែកាន់តែតំណែងជា នាយកកីឡាបាល់ទាត់សកល របស់ក្រុមហ៊ុន Red Bull។ អតីតគ្រូបង្គោល Liverpool រូបនេះក៏មិនទាន់មានបំណងវិលទៅកាន់ការងារជាគ្រូបង្វឹកដែរ។ ផ្ទុយទៅវិញ ប្រធានក្លិប Real Madrid លោក Florentino Perez មានទំនុកចិត្តខ្ពស់ក្នុងការបញ្ចុះបញ្ចូលលោក Klopp។
សូមបញ្ជាក់ថា Real Madrid បានប្រកាសចែកផ្លូវពីលោក Xabi Alonso កាលពីថ្ងៃចន្ទ ទី ១២ ខែ មករា ឆ្នាំ២០២៦ និងបានតែងតាំងលោក Alvaro Arbeloa ដែលជា គ្រូបង្វឹក ក្រុមយុវជនរបស់ខ្លួនមកកាន់ការងារជា គ្រូបង្គោល ក្រុមធំជាបណ្ដោះអាសន្ន៕
