(អូស្រ្តាលី)៖ គណៈកម្មាធិការអូឡាំពិកអូស្ត្រាលី (Australian Olympic Committee) បានប្រកាសពីការផ្តល់មូលនិធិថ្មីចំនួន ៣៣,៣៤លានដុល្លារ សម្រាប់ជំនួយដល់អត្តពលិកមុនការចូលរួមព្រឹត្តិការណ៍អូឡាំពិកទីក្រុង Brisbane 2032 ។
ថវិកានេះក៏រួមទាំងជំនួយសម្រាប់ការចូលនិវត្តន៍របស់អត្តពលិកអូឡាំពិក និងជារង្វាន់សាច់ប្រាក់ ដើម្បីជួយអត្តពលិកឱ្យវិលត្រឡប់ទៅការប្រកួតកំពូលវិញបន្ទាប់ពីមានកូន។
មូលនិធិនេះបង្កើតឡើងដោយជំនួយឥតសំណងចំនួន ២០លានដុល្លារអូស្ត្រាលី ពីមូលនិធិអូឡាំពិកអូស្ត្រាលី Australian Olympic Foundation (AOF) នឹងផ្តល់ប្រាក់ចំនួន ៥.០០០ដុល្លារអូស្ត្រាលី ដល់អត្តពលិកគ្រប់រូបដែលត្រូវបានជ្រើសរើសសម្រាប់ចូលរួមប្រជែងព្រឹត្តិការណ៍អូឡាំពិក ចាប់ពីព្រឹត្តិការណ៍កីឡារដូវរងា Milano Cortina 2026 រហូតដល់ព្រឹត្តិការណ៍កីឡា Brisbane 2023 ។
សូមជម្រាបផងថា ប្រទេសអូស្រ្តាលី ធ្លាប់ធ្វើជាម្ចាស់ផ្ទះកីឡាអូឡាំពិកឆ្នាំ២០០០ ជាមួយគ្នានោះ ស្ថាប័នមូលនិធិអូឡាំពិកអូស្ត្រាលី Australian Olympic Foundation (AOF) ឥឡូវនេះមានទ្រព្យសកម្មសុទ្ធចំនួន ២០០លានដុល្លារអូស្ត្រាលី ដែលជាផ្នែកមួយនៃគោលការណ៍បែងចែកប្រាក់ចំណូលនៃការរៀបចំការប្រកួត ។
ហើយទឹកប្រាក់សុទ្ធពីមូលនិធិនៅពេលខាងមុខ ដែលទទួលបានពីការផ្តល់ជំនួយសប្បុរសធម៌ នឹងត្រូវបានបន្ថែមទៅលើជំនួយរបស់ស្ថាប័ន (AOC) ដែលបានបង្កើតឡើងរួច និងមូលនិធិរបស់រដ្ឋាភិបាលកណ្តាលសម្រាប់អត្តពលិកអូឡាំពិក ។
កាលចុងឆ្នាំ២០២៤ គណៈកម្មការសហព័ន្ធបានប្តេជ្ញាផ្តល់មូលនិធិចំនួន ៣៨៥លានដុល្លារអូស្ត្រាលីសម្រាប់កីឡាដែលមានដំណើរការខ្ពស់ក្នុងរយៈពេល ១៨ខែបន្ទាប់ ដែលជាគោលដៅដ៏សមរម្យក្នុងមានប្រទេសម្ចាស់ផ្ទះព្រឹត្តិការណ៍អូឡាំពិក និងប៉ារ៉ាឡាំពិកឆ្នាំ២០៣២ នៅលើទឹកដីកំណើតរបស់ខ្លួន ៕ ប្រភពពី Freshnews
