បន្ទាប់ពីទទួលបានជោគជ័យគួរកត់សម្គាល់ក្នុងការរៀបចំទិវារត់ប្រណាំងស្ត្រីចម្ងាយ១០គីឡូម៉ែត្រនាពេលកន្លងមក ក្រុមហ៊ុនធានារ៉ាប់រងអាយុជីវិតសុវណ្ណភូមិឡាយហ្វ៍ បានបន្តចូលរួមជួយជ្រោមជ្រែងដល់គណៈកម្មាធិការជាតិអូឡាំពិកកម្ពុជា ក្នុងការបន្តបេសកកម្មរួមគ្នារយៈពេល៥ឆ្នាំបន្តទៅមុខទៀត។
ជាក់ស្ដែង លោក Loke Kah Meng នាយកប្រតិបត្តិក្រុមហ៊ុន សុវណ្ណាភូមិ ឡាយហ្វ៍ និងឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានចុះហត្ថលេខារួមគ្នាលើកិច្ចសហការគ្នារយៈពេល៥ឆ្នាំទៀត នៅព្រឹកថ្ងៃសុក្រ ទី៣០ ខែមករា ឆ្នាំ២០២៦ នាស្នាក់ការគណៈកម្មាធិការជាតិអូឡាំពិកកម្ពុជា។
លោក Loke Kah Meng សង្កត់ធ្ងន់ថា នេះជាការសហការគ្នាក្នុងការលើកកម្ពស់សុខភាពស្ត្រីក្នុងវិស័យកីឡា និងការចូលរួមជួយដល់ការងារសង្គម។ ក្នុងរយៈពេលនៃកិច្ចសហការរៀបចំកន្លងមក លោកនាយកប្រតិបត្តិបានមើលឃើញពីកំណើនកាន់ច្រើនឡើងពីស្ត្រីក្នុងការចូលរួមទិវារត់ប្រណាំងចម្ងាយ១០គីឡូម៉ែត្រនេះដែលបង្ហាញពីការយល់ដឹងកាន់តែខ្លាំងចំពោះសុខភាព។ ហេតុដូចនេះហើយបានជាក្រុមហ៊ុនធានារ៉ាប់រងអាយុជីវិតសុវណ្ណភូមិឡាយហ្វ៍ប្ដេជ្ញាបន្តរួមគ្នាជាមួយគណៈកម្មាធិការជាតិអូឡាំពិកកម្ពុជាតទៅមុខ ហើយសង្ឃឹមថា នឹងមិនមែនត្រឹមតែ៥ឆ្នាំទៀតទេ គឺរយៈពេលវែងតែម្ដង។
ចំណែកឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា ទិវារត់ប្រណាំងស្ត្រីចម្ងាយ១០គីឡូម៉ែត្រ ត្រូវបានរៀបចំឡើងដើម្បីលើកស្ទួយសមាភាពបុរស និងស្ត្រី ក៏ដូចជាស្ត្រីក្នុងវិស័យកីឡា។ មិនតែប៉ុណ្ណោះ ការរៀបចំឆ្នាំនេះ គឺផ្ដោតលើប្រធានបទ "ស្ត្រីរត់លើវិថីសន្តិភាព" ដែលស្ដែងឱ្យឃើញពីការគាំទ្រនូវសុខសន្តិភាពដោយប្រជាពលរដ្ឋខ្មែរ។ ឯកឧត្ដម វ៉ាត់ ចំរើន បន្តថា គិតមកទល់ពេលនេះមានអ្នកចុះឈ្មោះជិត៣០០០នាក់ហើយ ខណៈអ្នករៀបចំសង្ឃឹមថា នឹងមានអ្នកចូលរួមខ្ទង់៤០០០នាក់នៅថ្ងៃរត់ផ្លូវការ។
លោក សែម ផល្លា នាយកប្រតិបត្តិរៀបចំកីឡាម៉ារ៉ាតុង បានឱ្យដឹងថា ក្រៅតែពីការរត់ចម្ងាយ១០គីឡូម៉ែត្រ ក៏មានការរត់សប្បាយ៤គីឡូម៉ែត្រដែលអនុញ្ញាតឱ្យក្រុមគ្រួសារ មានម្ដាយ ឪពុក និងក្មេង ចូលរួមរត់កម្សាន្ដផងដែរ ហើយគណៈកម្មការនឹងរៀបចំឱ្យបានល្អដើម្បីសុខសុវត្ថិភាពដល់អ្នកចូលរួម។
សូមបញ្ជាក់ថា ទិវារត់ប្រណាំងស្ត្រីចម្ងាយ១០គីឡូម៉ែត្រ ឆ្នាំ ២០២៦ នឹងប្រព្រឹត្តទៅនៅថ្ងៃអាទិត្យ ទី៨ ខែមីនា នៅមុខសួនច្បារវត្តបទុមវតី៕
