ឯកឧត្តម ប៉ាន សូរស័ក្តិ សមាជិករដ្ឋសភានៃកម្ពុជា និងជា ប្រធាន សហព័ន្ធកីឡាទោចក្រយានកម្ពុជា បានផ្ដាំផ្ញើដល់ គ្រូបង្វឹក ពិសេសគ្រូទើបតែបញ្ចប់ វគ្គបណ្ដុះបណ្ដាលកម្រិត១ ត្រូវប្រើប្រាស់ និងចែករំលែកចំណេះដឹងឲ្យបានទូលំទូលាយ ដើម្បីផលិតបាននូវធនធាន កីឡាករ-កីឡាការិនី នៅទូទាំង រាជធានី-ខេត្ត សម្រាប់ត្រៀមការប្រកួតថ្នាក់ជាតិ និងអន្ដរជាតិនានា ពិសេសការត្រៀមធ្វើម្ចាស់ផ្ទះ កីឡាយុវជនអាស៊ី ឆ្នាំ២០៣១ នៅកម្ពុជា។
ការផ្ដាំផ្ញើនេះ ធ្វើឡើងក្នុងឱកាស ឯកឧត្តម បានអញ្ជើញជាអធិបតី ក្នុងពិធីបិទវគ្គបណ្ដុះបណ្ដាលបច្ចេកទេសគ្រូបង្វឹកកីឡាទោចក្រយានកម្រិត១ ក្រោមគម្រោងថវិការបស់ ក្រសួងអប់រំ យុវជន និងកីឡា កាលពីថ្ងៃទី ៥ ខែ កុម្ភៈ ឆ្នាំ២០២៦ ក្រោយដំណើរការសិក្សាអស់រយៈពេល ៤ថ្ងៃ នៅទីស្នាក់ការ គណៈកម្មាធិការជាតិអូឡាំពិកកម្ពុជា។ វគ្គនេះមានសិក្ខាកាម ២៥រូបចូលរួម និងបង្រៀនដោយ គ្រូឧទ្ទេស កាន់សញ្ញាបត្រអន្ដរជាតិ (កម្រិត៣) លោក យឿន ភីយុទ្ធ។
តាមរបាយការណ៍លោក នូ ចំរើន អគ្គលេខាធិការ សហព័ន្ធ បានឲ្យដឹងថា វគ្គនេះ រៀបចំឡើងស្របតាមផែនការ កសាងធនធានមនុស្សរបស់ សហព័ន្ធ ឆ្ពោះទៅព្រឹត្តិការណ៍ ការប្រកួតកីឡាយុវជនអាស៊ី ឆ្នាំ២០៣១ ។ ហេតុនេះ ទើបសហព័ន្ធរៀបចំវគ្គសិក្សាខ្លីនេះ ដើម្បីអភិវឌ្ឍន៍សមត្ថភាពធនធាន គ្រូបង្វឹកជាតិ និងធានាបាននូវការបង្វឹក កីឡាករ ក៏ដូចជាបញ្ជូន កីឡាករមកចូលរួមការប្រកួតឲ្យបានសមស្រប និងអនុឡោមទៅតាមស្តង់ដារបស់ស្ថាប័នអន្ដរជាតិ ជាពិសេស ការបណ្តុះបណ្តាលធនធានគ្រូបង្វឹក និង កីឡាករ តាមបណ្តា រាជធានី-ខេត្តតែម្ដង។
លោកថា «វគ្គបណ្តុះបណ្តាលនេះ ពិតជាមានសារៈសំខាន់ណាស់ ក្នុងការលើកកម្ពស់សមត្ថភាព ធនធានមនុស្ស លើផ្នែកបង្វឹកកីឡាករ និងរៀបចំផែនការ ការប្រកួតកីឡាទោចក្រយាន ដើម្បីឲ្យ កីឡាករ ចូលរួមការប្រកួតយល់ច្បាស់ពី ច្បាប់ នៃការប្រកួតដោយ យុត្តិធម៌ សុខសុវត្ថិភាព និងត្រៀមខ្លួនចូលរួមដឹកនាំ និងបង្វឹក កីឡាករ-កីឡាការិនី ចូលរួមការប្រកួតកីឡា ទោចក្រយាន លក្ខណៈអន្តរជាតិនានា និងជាពិសេសសម្រាប់ត្រៀមខ្លួន ទទួលធ្វើជាម្ចាស់ផ្ទះក្នុងការប្រកួតកីឡាយុវជនអាស៊ី ឆ្នាំ២០៣១ នាពេលខាងមុខ»។
ក្រោយបញ្ចប់វគ្គសិក្សាខាងលើ ឯកឧត្តម បានសម្តែងនូវការកោតសរសើរ និងវាយតម្លៃខ្ពស់ ចំពោះការគាំទ្ររបស់ ក្រសួងអប់រំ និងកិច្ចសហការរបស់ គណៈកម្មាធិការជាតិអូឡាំពិកកម្ពុជា ក្នុងការរៀបចំវគ្គបណ្តុះបណ្តាលបច្ចេកទេស គ្រូបង្វឹកកីឡាទោចក្រយានកម្រិត១ នាពេលនេះ ដែលធ្វើឲ្យគ្រូបង្វឹករបស់សហព័ន្ធ បានយល់ដឹងកាន់តែច្បាស់ អំពីបច្ចេកទេស ក្នុងការរៀបចំបង្វឹកកីឡាករ ដើម្បីត្រៀមចូលរួម រៀបចំការប្រកួតកីឡាទោចក្រយានលក្ខណៈជាតិ និងអន្តរ ជាតិនានា។
ឯកឧត្តមប្រធានសហព័ន្ធបន្ដទៀតថា «បន្ទាប់ពីបញ្ចប់វគ្គបណ្ដុះបណ្ដាលដ៏មានសារៈសំខាន់នេះ សិក្ខាកាមទាំងអស់ នឹងយកចំណេះដឹងទាំងអស់នេះ ទៅចែករំលែកបន្តដល់ សមាគម-ក្លិប និងក្រុមកីឡាករ-កីឡាការិនីរបស់ខ្លួន នៅតាមរាជធានី-ខេត្ត ស្របតាមផែនការអភិវឌ្ឍ ជំនាញបច្ចេកទេស សម្រាប់ការប្រកួតកីឡាកម្រិតជាតិ និងអន្តរជាតិនានា នាពេលខាងមុខ ពិសេសការបណ្ដុះនូវធនធាន កីឡាករ-កីឡាការិនីបន្ដវេន សម្រាប់ត្រៀមធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី លើកទី៥ ឆ្នាំ២០៣១»។
សម្រាប់លទ្ធផល នៃ វគ្គបណ្ដុះបណ្ដាលគ្រូកម្រិត១ លើកដំបូង បង្រៀនដោយ គ្រូឧទ្ទេសជនជាតិខ្មែរនេះ ត្រុវបានវាយតម្លៃក្នុងចំណោមសិក្ខាកាមចូលរួម គឺមានសិក្ខាកាមទទួលបាននិទ្ទេសល្អ ២០% និទ្ទេសល្អបង្គួរ ៥០% និងនិទ្ទេសមធ្យម ៣០%៕
