ព្រឹត្តិការណ៍កីឡាការ៉ាតេជើងឯកថ្នាក់ជាតិ ២០២៥ បានចាប់ផ្ដើមដំណើរការហើយនៅព្រឹកថ្ងៃសុក្រ ទី៦ ខែកុម្ភៈ ឆ្នាំ ២០២៦ នាសាលដំបូលទូកនៃសាកលវិទ្យាល័យភូមិន្ទភ្នំពេញ និងគ្រោងបញ្ចប់នៅថ្ងៃអាទិត្យ ទី៨ ខែកុម្ភៈ។
បើតាមរបាយការណ៍ពីលោក ដែក ភារៈ អគ្គលេខាធិការរងសហព័ន្ធកីឡាការ៉ាតេកម្ពុជា ការប្រកួតឆ្នាំនេះមានសាលាគុន សមាគម ក្លឹប ចំនួន ២៧ និង កីឡាករចំនួន ១៧៦នាក់ កីឡាការិនីចំនួន ១៥៨នាក់ គ្រូបង្វឹកចំនួន ៥៩នាក់ ប្រតិភូដឹកនាំ ៣១នាក់ មន្ត្រីផ្លូវការចំនួន ២៤នាក់ អាជ្ញាកណ្ដាល ចៅក្រម ចំនួន ១៥នាក់ សរុបចំនួន ៤៦៣នាក់ ។
កាលពីជើងឯកថ្នាក់ជាតិ ឆ្នាំ២០២៤ មានចំនួនតែ ៣៥២នាក់ប៉ុណ្ណោះ ហេតុដូចនេះ ការចូលរួមជ្រើសរើសជើងឯក ឆ្នាំ២០២៥នេះ មានការកើនឡើងចំនួន ១១១នាក់។
សម្រាប់វិញ្ញាសាប្រកួតមានចំនួន២ គឺ វិញ្ញាសាកាតា (Kata) និងវិញ្ញាសា
ប្រយុទ្ធ (Kumite) ដែលចែកចេញជា ៦៦វិញ្ញាសាតូចៗ ហើយបែងចែកតាមកម្រិតអាយុមានចាប់ពី៨ឆ្នាំដល់៣២ឆ្នាំ។ អ្វីគួរកត់សម្គាល់នោះ គឺឆ្នាំនេះមានថែមនូវវិញ្ញាសាកុមារ៨ដល់៩ឆ្នាំជាលើកដំបូង។ លោក ដែក ភារៈ សង្កត់ធ្ងន់ថា ការថែមកម្រិតអាយុកាន់តែតូចនេះជាការសម្រួចធនធានឆ្ពោះទៅកាន់ឆ្នាំ២០៣១ដែលកម្ពុជានឹងធ្វើម្ចាស់ព្រឹត្តិការណ៍កីឡាយុវជនអាស៊ី។
ឯកឧត្ដម វ៉ាត់ ចំរើន អគ្គលេខាធិការសហព័ន្ធកីឡាការ៉ាតេកម្ពុជា តំណាងដ៏ខ្ពង់ខ្ពស់ឯកឧត្ដមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ប្រធានសហព័ន្ធ បានផ្ដាំផ្ញើយុវជនខិតខំពង្រឹងសមត្ថភាព និងផ្លូវកាយ ផ្លូវចិត្តដើម្បីឆ្ពោះទៅរកអនាគតរុងរឿង៕
