លោកយាយ ឆេង ឡាងហ៊ាង វ័យ៨៣ឆ្នាំប្រាប់ថា ពិតជាសប្បាយចិត្តដែលចៅៗបានចូលហ្វឹកហាត់កីឡាការ៉ាតេ ព្រោះអាចជួយឱ្យបានសុខភាពល្អ និងចេះក្បាច់គុនការពារខ្លួន។
គិតទាំងចៅ និងចៅទួត លោកយាយមានលំនៅដ្ឋាននៅម្ដុំ វិទ្យាល័យសន្ធរម៉ុក ប្រាប់ថា មានចៅជាង ១០នាក់ដែលបានហ្វឹកហាតកីឡាមួយនេះ ហើយពួកគេបានចូលរួមប្រកួត កីឡាការ៉ាតេជើងឯកថ្នាក់ជាតិ ឆ្នាំ ២០២៥ ប្រព្រឹត្តទៅនៅ សាកលវិទ្យាល័យភូមិន្ទភ្នំពេញ។ លោកយាយបញ្ជាក់ថា តែងតែទៅតាមលើកទឹកចិត្តពួកគេរាល់ពេលមានការប្រកួតម្ដងៗ។
លោកយាយ ឡាងហ៊ាង បន្តថា ការស្រលាញ់ចូលចិត្ត កីឡាការ៉ាតេ ពីសំណាក់ចៅៗ ក៏ដោយសារតែប្អូនៗ របស់លោកយាយ សុទ្ធតែជាអ្នកហ្វឹកហាត់កីឡាក្បាច់គុនមួយនេះតាំងពីក្មេងៗមកម៉្លេះ។ ប៉ុន្តែសម្រាប់លោកយាយវិញ មិនបានចូលហ្វឹកហាត់ដូចប្អូនៗទេ ព្រោះត្រូវជួយគ្រួសារលក់ដូរ។
លោកយាយបង្ហើបថា ប្អូនៗរបស់លោកយាយមានដូចជា លោក ឡាច ច័ន្ទសុវណ្ណ លោក ឡាច ច័ន្ទឫទ្ធី លោក ឡាច ច័ន្ទដារ៉ា និងប្អូនៗមួយចំនួនទៀត ដែលសុទ្ធតែជា អតីតកីឡាករ ជម្រើសជាតិការ៉ាតេ និងបច្ចុប្បន្នជា គ្រូបង្វឹក ក៏ដូចជាថ្នាក់ដឹកនាំក្នុងសហព័ន្ធផងដែរ៕
