នាព្រឹកថ្ងៃទី៥ ខែកុម្ភៈ ឆ្នាំ២០២៦ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) លោកបណ្ឌិត ថោង ខុន រួមជាមួយថ្នាក់ដឹកនាំ NOCC បានជួបពិភាក្សាការងារជាមួយលោក Maxim Zubachev គ្រូបង្វឹកកីឡា SAMBO កម្រិតអន្តរជាតិ និងជាតំណាងសហព័ន្ធកីឡា SAMBO អាស៊ី ដើម្បីពង្រឹងកិច្ចសហប្រតិបត្តិការនិងជំរុញការអភិវឌ្ឍកីឡា SAMBO នៅកម្ពុជា។
ក្នុងជំនួបនេះ លោក Maxim Zubachev បានស្នើសុំការគាំទ្រពី NOCC សម្រាប់ការផ្តួចផ្តើមបង្កើត “សហព័ន្ធជាតិកីឡា SAMBO” នៅកម្ពុជា ដើម្បីអភិវឌ្ឍធនធានអត្តពលិក និងបង្កើនសមត្ថភាពការហ្វឹកហាត់ឱ្យបានប្រសើរ។ លោកក៏បានបញ្ជាក់ថា សហព័ន្ធកីឡា SAMBO អាស៊ី និងសហព័ន្ធកីឡា SAMBO អន្តរជាតិ (FIAS) នឹងត្រៀមគាំទ្រកម្ពុជាលើការបញ្ជូនគ្រូបង្វឹកកម្រិតអន្តរជាតិមកបណ្តុះបណ្តាលក្នុងប្រទេស និងការឧបត្ថម្ភសម្ភារហ្វឹកហាត់ដែលចាំបាច់ផងដែរ។
ជាការឆ្លើយតប លោកបណ្ឌិត ថោង ខុន បានសម្តែងការគាំទ្រចំពោះការផ្តួចផ្តើមបង្កើតសហព័ន្ធជាតិកីឡា SAMBO ដើម្បីជំរុញការអភិវឌ្ឍវិស័យកីឡាយុទ្ធគុននៅកម្ពុជា។ លោកបានបញ្ជាក់ថា កិច្ចសហប្រតិបត្តិការនេះស្របទៅនឹងអនុស្សរណៈយោគយល់គ្នា (MoU) រវាងគណៈកម្មាធិការជាតិអូឡាំពិកកម្ពុជា និងគណៈកម្មាធិការអូឡាំពិករុស្ស៊ី ដែលបានចុះហត្ថលេខាកាលពីឆ្នាំ២០២៥ កន្លងទៅ។ លោកក៏សង្ឃឹមជឿជាក់ថា ការផ្តួចផ្តើមនេះនឹងរួមចំណែកជំរុញការអភិវឌ្ឍកីឡាយុទ្ធគុនកម្ពុជា ឈានទៅដណ្តើមមេដាយជូនជាតិនៅក្នុងព្រឹត្តិការណ៍កីឡាអន្តរជាតិ នាពេលអនាគត។
គួរបញ្ជាក់ផងដែរថា SAMBO ជាយុទ្ធគុនការពារខ្លួន ដែលមានដើមកំណើតនៅឆ្នាំ១៩៣៨ នៅសហភាពសូវៀត (បច្ចុប្បន្នប្រទេសរុស្ស៊ី)។ សហព័ន្ធកីឡា SAMBO អន្តរជាតិ (FIAS) ទទួលបានការទទួលស្គាល់ពេញលេញពីគណៈកម្មាធិការអូឡាំពិកអន្តរជាតិ (IOC) និងក្រុមប្រឹក្សាអូឡាំពិកអាស៊ី (OCA) ហើយបច្ចុប្បន្ន FIAS មានសហព័ន្ធជាតិជាសមាជិកចំនួន ១០៦ ប្រទេស ក្នុងនោះកីឡា SAMBO ក៏ត្រូវបានដាក់បញ្ចូលនៅក្នុងព្រឹត្តិការណ៍មួយចំនួនក្រោមក្របខ័ណ្ឌ OCA រួមមាន Asian Indoor & Martial Arts Games និង Asian Beach Games ហើយធ្លាប់បញ្ចូលនៅក្នុងកម្មវិធី Asian Games ផងដែរ។ ជាមួយគ្នានេះ កីឡា SAMBO ក៏ត្រូវបាន OCA សម្រេចដាក់បញ្ចូលក្នុងការប្រកួតកីឡាយុវជនអាស៊ី ឆ្នាំ២០២៩ នៅប្រទេសអ៊ូសបេគីស្ថាន ផងដែរ។
