សិក្ខាកាម៣៦រូប ក្នុងនោះមាននារី៤រូបបានបញ្ចប់វគ្គបណ្ដុះបណ្ដាលមន្ត្រីបច្ចេកទេសកម្រិត១ លើកទី៣របស់សហព័ន្ធកីឡាលើកទម្ងន់កម្ពុជា នៅរសៀលថ្ងៃចន្ទ ទី៩ ខែកុម្ភៈ ឆ្នាំ២០២៦ ក្រោយបានដំណើរការចាប់ពីថ្ងៃទី៧ ខែកុម្ភៈ មក។
លោក ឈុំ វាសនា អគ្គលេខាធិការសហព័ន្ធកីឡាលើកទម្ងន់កម្ពុជាបានឱ្យដឹងថា សិក្ខាកាមទាំង៣៦រូបមកពីរាជធានីភ្នំពេញ ខេត្តកណ្ដាល ខេត្តកែប ខេត្តបាត់ដំបង កំពង់ស្ពឺ តាកែវ បន្ទាយមានជ័យ បាត់ដំបង ពោធិ៍សាត់ ព្រៃវែង សៀមរាប ព្រះសីហនុ ស្វាយរៀង និង ឧត្ដរមានជ័យ ដោយទទួលបានការបណ្ដុះបណ្ដាលពីមន្ត្រីបច្ចេកទេសមានអាជ្ញាបណ្ណទទួលស្គាល់ជាលក្ខណៈអន្តរជាតិ។
សម្រាប់មេរៀននៃវគ្គបណ្ដុះបណ្ដាលនេះ គឺផ្ដោតលើតួនាទីមន្ត្រីបច្ចេកទេស តួនាទីគណៈវិនិច្ឆ័យ និងចៅក្រម តួនាទីនាយកការប្រកួត តួនាទីអាជ្ញាកណ្ដាល តួនាទីប្រធានបច្ចេកទេស តួនាទីប្រធានកំណត់ពេលវេលា តួនាទីលេខាប្រកួត តួនាទីប្រធានទំនាក់ទំនង និងព័ត៌មាន តួនាទីអ្នកប្រកាសក្នុងពេលប្រកួត តួនាទីវេជ្ជបណ្ឌិត តួនាទីក្រុមថ្លឹងទម្ងន់ និងតួនាទីសំខាន់ៗមួយចំនួនទៀត។
ជាលទ្ធផលពីការសិក្សា សិក្ខាកាម៩នាក់ទទួលបាននិទ្ទេសល្អ ល្អបង្គួរ៨នាក់ និងនិទ្ទេសមធ្យមចំនួន១៥នាក់។ លោក ឈុំ វាសនា បន្តថា សហព័ន្ធកីឡាលើកទម្ងន់កម្ពុជាមានមន្ត្រី និងមន្ត្រីបច្ចេកទេសចំនួន៤៥នាក់ ក្នុងនោះជាសិស្ស១១នាក់ និស្សិត១៦នាក់ និងបញ្ចប់បរិញ្ញាបត្រ១៨នាក់ និងមួយចំនួនទៀតជាមន្ត្រីប្រចាំក្រសួងស្ថាប័នរាជធានីខេត្ត។
ឯកឧត្ដម តែម ម៉ឺន ប្រធានសហព័ន្ធកីឡាលើកទម្ងន់កម្ពុជាមានប្រសាសន៍ថា បានកោតសរសើរ និងវាយតម្លៃខ្ពស់អំពីលទ្ធផលការងាររបស់គ្រូឧទ្ទេស និងសិក្ខាកាមមានលក្ខណៈស្តង់ដារជាតិ - អន្តរជាតិដើម្បីសម្រេចបានការងារជូនជាតិ និងមាតុភូមិនៅថ្ងៃអនាគត។
ឯកឧត្ដមប្រធានក៏បានជំរុញឱ្យសិក្ខាកាមទាំងអស់ប្ដេជ្ញាអនុវត្តចំណេះដឹងបានសិក្សានេះ ប្រកបដោយប្រសិទ្ធភាពក្នុងបេសកកម្ម - នឹងត្រៀមសិក្សាបន្ដដណ្ដើមយកកម្រិតខ្ពស់ជាតិ-អន្តរជាតិ៕
