នៅព្រឹកថ្ងៃពុធ ទី២៥ ខែកុម្ភៈ ឆ្នាំ ២០២៦ នាស្នាក់ការគណៈកម្មាធិការជាតិអូឡាំពិកកម្ពុជា សហព័ន្ធកីឡាប្រដាល់សកលកម្ពុជា និងក្រុមហ៊ុនវឌ្ឍនៈបានចុះអនុស្សារណៈលើភាពជាដៃគូឧបត្ថម្ភភេសជ្ជៈផ្ដាច់មុខដល់សហព័ន្ធ និង ក្រុមជម្រើសជាតិប្រដាល់សកលកម្ពុជាមួយឆ្នាំពេញសម្រាប់ឆ្នាំ ២០២៦។
ពិធីនេះមានការចូលរួមដោយឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា លោក ពេជ្រ សុផែន អនុប្រធានសហព័ន្ធ កញ្ញា ឡុង ស៊ីណេត ប្រធានផ្នែកទីផ្សារ និងកញ្ញា ទូច លាភភា អ្នកគ្រប់គ្រងផែនការផ្សព្វផ្សាយតំណាងក្រុមហ៊ុន វឌ្ឍនៈ។
ឯកឧត្ដម ប៊ុយ សុភ័ណ្ឌ សង្កត់ធ្ងន់ថា សម្រាប់ភាពជាដៃគូរវាងសហព័ន្ធកីឡាប្រដាល់សកលកម្ពុជា និងក្រុមហ៊ុន វឌ្ឍនៈ នាពេលនេះនឹងក្លាយជាកាលានុវត្តភាព ជាប្រវត្តិសាស្រ្តថ្មីយ៉ាងសំខាន់ក្នុងការផ្តល់ឱកាសដល់កីឡាករ កីឡាការិនីប្រដាល់សកលតាមបណ្តាក្លិបបានពង្រឹងសមត្ថភាព និងបង្កើនចំណូល ក៏ដូចជារួមចំណែកអភិវឌ្ឍគុណផលក្រុមជម្រើសជាតិប្រដាល់សកលត្រៀមចូលរួមការប្រកួតអន្តរជាតិនានាសម្រាប់ឆ្នាំ២០២៦ ក៏ដូចជាត្រៀមការប្រកួតកីឡាស៊ីហ្គេមនាឆ្នាំ២០២៧ នៅប្រទេសម៉ាឡេស៊ី ពិសេសឆ្ពោះទៅប្រកួតទទួលបានសិទ្ធិផ្លូវការ “Qualified” សម្រាប់ការប្រកួតកីឡាអូឡាំពិក នាឆ្នាំ២០២៨ នៅទីក្រុង Los Angeles សហរដ្ឋអាមេរិក និងត្រៀមឆ្ពោះទៅដណ្តើមមេដាយក្នុងការប្រកួតកីឡាយុវជនអាស៊ី ឆ្នាំ២០៣១ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះ។
ប្រមុខសហព័ន្ធដដែលបន្តថា ប្រដាល់សកលកម្ពុជាគឺជាប្រភេទកីឡាដ៏មានសក្តានុពលបំផុតមួយតាំងពីសម័យសង្គមរាស្រ្តនិយម ដោយក្រុមជម្រើសជាតិប្រដាល់សកលកម្ពុជារហូតដល់ ៤រូប ទទួលបានសិទ្ធិ ចូលរួមការប្រកួតកីឡាអូឡាំពិក នាឆ្នាំ១៩៦៤ នៅទីក្រុងតូក្យូ ប្រទេសជប៉ុន ដែលជាកំណត់ត្រាខ្ពស់បំផុតរបស់ប្រដាល់សកលកម្ពុជាក្នុងប្រវត្តិចូលរួមការប្រកួតកីឡាអូឡាំពិក។ ក្នុងន័យនេះ សហព័ន្ធសង្ឃឹមថា ក្រោមជួយឧបត្ថម្ភ គាំទ្រពីក្រុមហ៊ុន វឌ្ឍនៈ នាពេលនេះ សហព័ន្ធនឹងមានលទ្ធភាពអភិវឌ្ឍធនធានកីឡាករ កីឡាការិនីឈានទៅប្រកួតទទួលបានសិទ្ធិផ្លូវការសម្រាប់ការប្រកួតកីឡាអូឡាំពិក នាពេលអនាគតជាក់ជាមិនខាន។
កញ្ញា ឡុង ស៊ីណេត ប្រធានផ្នែកទីផ្សារប្រចាំក្រុមវឌ្ឍនៈ ថ្លែងថា កិច្ចសហប្រតិបត្តិការនេះ គឺជាការចូលរួមលើកស្ទួយកីឡាប្រដាល់សកលក្នុងស្រុកដែលជាប្រភេទកីឡាដ៏មានសក្ដានុពលមួយដែរនៅកម្ពុជា។ ប្រធានផ្នែកទីផ្សារដដែលសង្ឃឹមថា បណ្ដាក្រុមហ៊ុនផ្សេងៗទៀត នឹងចូលរួមលើកស្ទួយកីឡាប្រដាល់កម្ពុជាឱ្យបានកាន់តែផុលផុសដើម្បីឆ្ពោះទៅក្រសោបសមិទ្ធផលល្អៗលើឆាកអន្តរជាតិ។
សូមជម្រាបជូនថា កម្មវិធីប្រដាល់សកលអាជីពប្រចាំខែ Dragon the Golden Ring រៀបចំឡើងដោយសហព័ន្ធកីឡាប្រដាល់សកលកម្ពុជា ក្រោមការឧបត្ថម្ភពីក្រុមហ៊ុនវឌ្ឍនៈ នឹងប្រព្រឹត្តទៅចំនួនមួយខែម្ដង រហូតដល់ខែធ្នូ ឆ្នាំ ២០២៦។ ការប្រកួតនឹងប្រព្រឹត្តទៅនៅសាលកីឡាប្រដាល់សកលកម្ពុជា នៃពហុកីឡដ្ឋានជាតិអូឡាំពិក ដោយមានចំនួន៦គូក្នុងមួយថ្ងៃ។ ក្នុងនោះដែរ កីឡាករឆ្នើមកម្ពុជា ពេជ្រ ម្ទេសខ្មាំង ត្រូវតតាំងកីឡាករសិង្ហបុរី និង វី សុភ័ស្ស តទល់កីឡាករអ៊ីរ៉ង់៕
