ភ្នំពេញ៖ ឯកឧត្តម វ៉ាត់ ចំរើន អគ្គលេខាធិការ នៃ គណៈកម្មាធិការជាតិអូឡាំពិកកម្ពុជា(NOCC) បានមានប្រសាសន៍ថា ក្រោយមហាសន្និបាតបញ្ចប់អាណត្តិរបស់ គណៈកម្មាធិការជាតិអូឡាំពិកកម្ពុជាបានបញ្ចប់កាលពីពេលថ្មីៗនេះ។ សម្រាប់អាណត្តិថ្មី គឺចាប់ផ្តើមអនុវត្តផែនការយុទ្ធសាស្រ្តរបស់ខ្លួន ដោយអនុវត្តចាប់ពីឆ្នាំ ២០២៦ ទៅ គឺ គណៈកម្មាធិការជាតិអូឡាំពិកកម្ពុជា នឹងរៀបចំការជំរុញ និងពង្រីកវិសាលភាពការយល់ដឹងស្តីអំពីការអប់រំអូឡាំពិក ឬឧត្តមគតិអូឡាំពិក ពិសេស ការអប់រំនូវអត្ថប្រយោជន៍ នៃ សកម្មភាពចលនាកីឡា នៅក្នុងសង្គមជាតិ ដល់ សិស្សានុសិស្ស ក៏ដូចជា កុមារ ដែលត្រូវទទួលចំណេះដឹង អប់រំកីឡាអូឡាំពិក ដែលជាស្មារតីរបស់ អូឡាំពិក ដើម្បីជាការទាក់ទាញ និងលើកកម្ពស់នូវ សុខភាព និងសុខភាពសិក្សា។
ឯកឧត្តម អគ្គលេខាធិការ NOCC ក៏បានគូសបញ្ជាក់ទៀតថា ផែនការបញ្ជ្រាបនេះ គឺ គណៈកម្មាធិការជាតិអូឡាំពិកកម្ពុជា បានអនុវត្តតាម ផែនការរបស់ គណៈកម្មាធិការអូឡាំពិកអន្តរជាតិ ក៏ដូចជា អង្គការសាមគ្គីអូឡាំពិក និង ក្រុមប្រឹក្សាអូឡាំពិកអាស៊ី ហើយ ក្នុងនោះក៏មានការណែនាំផ្តល់ជាអនុសាសន៍ដ៏ខ្ពង់ខ្ពស់ពី ឯកឧត្តម បណ្ឌិត ថោង ខុន ទេសរដ្ឋមន្រ្តី និងជាប្រធាន គណៈកម្មាធិការជាតិអូឡាំពិកកម្ពុជា ដោយបានបង្កើតនៅក្រុមមន្រ្តីជំនាញរបស់ គណៈកម្មាធិការជាតិអូឡាំពិកកម្ពុជា បញ្ជូនទៅសិក្សារៀនសូត្រអំពីចលនាអូឡាំពិក ឬឧត្តមគតិអូឡាំពិកនៅក្រៅប្រទេស ដើម្បីនាំយកនូវចំណេះជំនាញមកធ្វើការផ្សព្វផ្សាយ បានយ៉ាងទូលំទូលាយស្របតាមផែនការយុទ្ធសាស្រ្ត កំណែទម្រង់ របស់ ក្រសួងអប់រំ យុវជន និងកីឡា ក្នុងការបញ្ជា្របចំណេះដឹងខាងផ្នែក អប់រំកាយ និងកីឡា ដើម្បីជួយរួមចំណែក អភិវឌ្ឍន៍សុខភាពសិក្សារបស់សិស្សអោយបានល្អដែលឈានទៅពង្រឹងសុខភាពសិក្សារបស់សិស្សបានល្អផងដែរ។
ឯកឧត្តម អគ្គលេខាធិការ បានរំលេចទៀតថា ឆ្នាំ ២០២៦នេះ ដោយមានកិច្ចសហការជាមួយមន្ទីរអប់រំ យុវជន និងកីឡា យ៉ាងល្អនោះ គណៈកម្មាធិការជាតិអូឡាំពិកកម្ពុជា នឹងមានកម្មវិធី ផ្សព្វផ្សាយពិសេស គឺចុះទៅកាន់ខេត្តជាយដែនពិសេស ខេត្តរងផលប៉ះពាល់ដោយសង្រ្គាម ដោយសារតែការរំលោភឈ្លានពានពីប្រទេសថៃកន្លងមក។ ក្នុងនោះមាន ខេត្តឧត្តរមានជ័យ និងខេត្តព្រះវិហារ។ ទន្ទឹមនិងនោះ ក្នុងយុទ្ធនានាការផ្សព្វផ្សាយនោះ នឹងមានការផ្តល់ជាជំនួយដូចជាការរៀបចំទីលានកីឡាក្នុងសាលារៀន ដែលរងផលប៉ះពាល់ និងសាលារៀនមានការខ្វះខាតក្នុងសកម្មភាពកីឡា។ ក្រុមការងារ គណៈកម្មាធិការជាតិអូឡាំពិកកម្ពុជា នឹងរៀបចំជួសជុលកែលម្អរ និងសាងទីលានចំនួនពីរជូនផងដែរ។ ជាមួយគ្នានោះដែរ មន្រ្តីរបស់យើងក៏មាន កម្មវិធីអប់រំ ដល់ សិស្សានុសិស្ស និង លោកគ្រូ និង អ្នកគ្រូ នៅទីនោះទទួលបាននៅចំណេះដឹងកីឡា ដើម្បីឱ្យពួកគាត់មាន សកម្មភាពកីឡា ដើម្បីឱ្យកុមារ មានរឹងមាំផ្នែកបញ្ញាស្មារតីជួយឱ្យសុខភាពសិក្សាបានល្អប្រសើរ។
ឯកឧត្តម បានបន្ថែមទៀតថា ការដាក់ចេញនៅផែនការផ្សព្វផ្សាយ ចលនាអូឡាំពិក ដល់កុមារ និងយុវជន ដែលជាសិស្សានុសិស្សនៅតាមបណ្តាខេត្ត ទូទាំងប្រទេសនេះ គឺជាកម្មវិធីរួមចំណែកមួយក្នុងការកសាងនូវ ធនធានមនុស្ស ពីវ័យកុមារភាពទៅ ដើម្បីឱ្យពួកគាត់មានការចាប់ផ្តើមដោយដំណើរត្រឹមត្រូវ។ ឯកឧត្តម អគ្គលេខាធិការ សង្ឈឹមជឿជាក់ថា កម្មវិធីផ្សព្វផ្សាយចលនាអូឡាំពិកនេះ ចាប់ពីឆ្នាំ ២០២៦ នេះរហូតដល់ ៤ ឆ្នាំទៅទៀត កម្មវិធីអប់រំ អូឡាំពិក នឹងត្រូវបានផ្សព្វផ្សាយ បានបញ្ជ្រាបផ្សព្វផ្សាយដល់ កុមារទាំងអស់នៅទូទាំងប្រទេស៕
