ភ្នំពេញ៖ ថ្លែងក្នុងកិច្ចប្រជុំជាមួយតំណាងសហព័ន្ធកីឡាជាតិ និងមន្រ្តីគណៈកម្មការបច្ចេកទេស របស់ ក្រសួងអប់រំយុវជននិងកីឡា នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា នាព្រឹកថ្ងៃទី៣០ ខែ មេសា ឆ្នាំ២០២៦ ស្តីពីការត្រៀមលក្ខណៈរៀបចំការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ជាតិ ឆ្នាំ២០២៦ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា ការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ជាតិ គឺ ក្រសួងអប់រំ យុវជន និងកីឡា បានរៀបចំជារៀងរាល់ឆ្នាំ គឺមានលក្ខណៈដដែលៗ ប៉ុន្តែអ្វីដែលយើងចង់ឃើញពីការរៀបចំនោះ គឺការប្រែប្រួលសមត្ថភាព នៃគុណភាពការរៀបចំ ពិសេស ប្រកបដោយប្រសិទ្ធភាព របស់លទ្ធផលដែលចេញមក ដើម្បីជួយអភិវឌ្ឍន៍ឱ្យវិស័យកីឡាបានរីកចម្រើន។
ឯកឧត្តម បានគូសបញ្ជាក់ទៀតថា គោលដៅសំខាន់ នៃការរៀបចំ កីឡាសិស្សបឋមសិក្សាថ្នាក់ជាតិនេះ គឺយើងចង់បង្កើនគុណភាពនិងសមត្ថភាពក្នុងការរៀបចំព្រឹត្តិការណ៍ កាន់តែមានគុនភាព ស្របតាមលក្ខណៈវិទ្យាសាស្រ្តកីឡា។
ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ បានជំរុញឱ្យគ្រប់ គណៈកម្មការរៀបចំការប្រកួត កីឡាសិស្សបឋមសិក្សាថ្នាក់ជាតិ ដែលគ្រោងនឹងធ្វើឡើងជាផ្លូវការពីថ្ងៃទី ០២-០៩ ខែឧសភាឆាប់ៗនេះ ដើម្បីពង្រឹងគុណភាព នៃការរៀបចំឱ្យបានល្អ ដើម្បីជំរុញឱ្យព្រឹត្តិការណ៍កីឡាដ៏ធំប្រចាំឆ្នាំនេះ ដំណើរការដោយរលូន និងជោគជ័យ។
ឯកឧត្តម បានអំពាវនាវឱ្យថ្នាក់ដឹកនាំ ប្រតិភូ គ្រូបង្វឹក ទាំង ២៥ រាជធានីខេត្ត ដែលត្រៀមចូលរួមប្រកួតក្នុងព្រឹត្តិការណ៍នេះជួយបំផុសស្មារតីបន្ថែមទៀត ដល់អាណាព្យាបាល កុំបង្អាក់ស្មារតីកុមារ ក្នុងការចូលរួមលេងកីឡា។ ប៉ុន្តែសូមបំផុសស្មារតីដល់ឪពុកម្តាយទាំងឡាយឱ្យលើកទឹកចិត្តដល់កុមារ ចូលរួមលេងកីឡាឱ្យបានច្រើន ពីព្រោះព្រឹត្តិការណ៍នេះ ផ្តោតលើប្រធានបទចម្បង គឺ កីឡាដើម្បីសុខភាពកុមារ ។
ជាមួយគ្នានេះ លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡាបញ្ជាក់ថា ការប្រកួតកីឡាសិស្សបឋមសិក្សាថ្នាក់ជាតិ ២០២៦ មានប្រតិភូ គ្រូបង្វឹក កីឡាករ កីឡាការិនី ជាកុមារចូលរួមសរុប ២៧៩២នាក់មកពី ២៥ រាជធានី-ខេត្ត ដែលរៀបចំលើ ១២ប្រភេទកីឡា ដែលប្រកួតចាប់ពីថ្ងៃទី ១ ដល់ថ្ងៃទី ៩ ខែ មេសា ឆ្នាំ២០២៦ នឹងដំណើរការប្រកួតលើ ១០ ទីលានក្នុងរាជធានីភ្នំពេញ៕
