នៅព្រឹកថ្ងៃសុក្រ ទី១០ ខែមេសា ឆ្នាំ ២០២៦ ក្រុមកីឡាករ កីឡាការិនីជម្រើសជាតិកម្ពុជា មកពីប្រភេទកីឡាចំនួន១៦ប្រភេទកីឡា បានទទួលប្រាក់រង្វាន់លើកទឹកចិត្តពីរាជរដ្ឋាភិបាល សម្រាប់ការដណ្ដើមបានមេដាយមាស ប្រាក់ និងសំរឹទ្ធ ពីការប្រកួតជើងឯកពិភពលោក ជើងឯកអាស៊ី និងជើងឯកអាស៊ីអាគ្នេយ៍អំឡូងឆ្នាំ២០២៤ និង ២០២៥។
ពិធីប្រគល់ប្រាក់រង្វាន់នេះបានប្រព្រឹត្តទៅនៅមជ្ឈមណ្ឌលជាតិហ្វឹកហ្វឺនកីឡា ក្រោមអធិបតីភាពដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
តាមរយៈរបាយការណ៍ឯកឧត្ដម ប៉ុន សុខ អគ្គនាយកនៃអគ្គនាយកដ្ឋានកីឡា កីឡាករ១៤៥នាក់ កីឡាការិនី៨៩នាក់ និងគ្រូបង្វឹក ក៏ដូចជាគ្រូជំនួយ៤៩នាក់ សរុបចំនួន២៨៣នាក់ មកពី១៦ប្រភេទកីឡា បានទទួលបានរង្វាន់ពីការប្រកួតកីឡាជើងឯកពិភពលោក ជើងឯកអាស៊ី និងជើងឯកអាស៊ីអាគ្នេយ៍។
កីឡាទាំង១៦ប្រភេទមាន ទូកកានូស្ព្រីន ចំបាប់ ហែលទឹកពាក់ជើងទា ឃីកបុកស៊ីង ប៉េតង់ ប្រដាល់សកល វ៉ូវីណាម ជឺជីតស៊ូ កាយវប្បកម្ម បញ្ចស៊ីឡាត់ អេឡិចត្រូនិក (E-Sports) បាល់បោះជនពិការ ការ៉ាតេ ជឺជីតស៊ូ តេក្វាន់ដូ WT និងរាំ។ ជាលទ្ធផលពីការប្រកួតកម្រិតអន្តរជាតិនៅក្នុងស្រុក និងនៅក្រៅប្រទេស កម្ពុជាទទួលបានមេដាយមាស៧៩គ្រឿង ប្រាក់៩៨គ្រឿង និងសំរឹទ្ធ១០៨គ្រឿង សរុប២៨៥គ្រឿង។ សរុបប្រាក់រង្វាន់ដែលត្រូវប្រគល់ដល់ម្ចាស់ជ័យលាភី គឺ៥,៩០៣,៤០០,០០០រៀល។
ក្នុងឱកាសនោះដែរ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី បានបង្ហាញក្ដីសង្ឃឹមថា កីឡាករ កីឡាការិនីនឹងខិតខំប្រឹងប្រែងហ្វឹកហាត់បង្កើនសមត្ថភាព ត្រៀមខ្លួនក្នុងការប្រកួតលើកក្រោយៗទៀត ដើម្បីយកជ័យជម្នះ និងមេដាយជូនជាតិកាន់តែច្រើន។
ក្នុងនាមរាជរដ្ឋាភិបាល ឯកឧត្ដមបណ្ឌិតសភាចារ្យ មានប្រសាសន៍បន្ថែមថា ក្រសួងអប់រំ យុវជន និងកីឡា នៅតែបន្តគាំទ្រកីឡាករ កីឡាការិនី ទាំងស្មារតី និងថវិកា ព្រមទាំងសូមអំពាវនាវដល់គ្រប់ភាគីពាក់ព័ន្ធទាំងអស់ សូមបន្តចូលរួមឧបត្ថម្ភគាំទ្រវិស័យកីឡា ឱ្យកាន់តែរីកចម្រើន និងមាននិរន្តរភាព ដោយបន្តពង្រឹងការប្រកួតជើងឯកជាតិ-អន្តរជាតិ និងការប្រកួតកីឡាថ្នាក់ជាតិ ឱ្យកាន់តែមានគុណភាពឈានទៅរកស្តង់ដាតំបន់៕
