ព្រឹត្តិការណ៍កីឡាបាល់ទាត់កុមារ Daiichi Junior Cup ២០២៦ ដែលបានរៀបចំដោយ Peak Digital និងសហការដោយក្រុមហ៊ុន Daiichi Life Cambodia នឹងប្រព្រឹត្តទៅនៅ៤ទីតាំងផ្សេងគ្នា ក្នុង៣រាជធានីខេត្ត។
លោក សេង សុភ័ក្ត្រ នាយកប្រតិបត្តិ Peak Digital មានប្រសាសន៍ថា ការប្រកួតបាល់ទាត់កុមារដ៏ពិសេសនេះជាការពង្រឹង និងផ្តល់ឱកាសដល់យុវជនជំនាន់ក្រោយ”។ លោកបន្តថា ព្រឹត្តិការណ៍នេះមិនត្រឹមតែបង្កើតការប្រកួតមួយទេ តែក៏ជាវេទិកាភ្ជាប់គ្នារវាងកីឡា សហគមន៍ និងអនាគត បង្រៀនឱ្យមានវិន័យ អត្តចរិតល្អក៏ដូចជាការលូតលាស់ និងរីកចម្រើនរបស់យុវជន។
លោក Mah Kin Yoong អគ្គនាយកប្រតិបត្តិនៃក្រុមហ៊ុន Daiichi Life មានប្រសាសន៍ថា ក្រុមហ៊ុនរបស់លោកមានមោទនភាពដែលបានចូលរួមជំរុញ និងលើកកម្ពស់កុមារតាមរយៈកម្មវិធីបាល់ទាត់បែបសហគមន៍នេះ។ លោកសង្ឃឹមថានឹងអាចធ្វើការរួមគ្នាជាមួយភាគីពាក់ព័ន្ធ ដើម្បីកសាងអនាគតកាន់តែភ្លឺស្វាង និងប្រកបដាយ សុខុមាលភាព សម្រាប់កុមារ និងសហគមន៍ទាំងមូល។
លោកស្រីបណ្ឌិត ហោ សុវឌ្ឍនា អគ្គនាយករងនៃនិយ័តករធានារ៉ាប់រងកម្ពុជា ថ្លែងថា ការប្រកួតនេះឆ្លុះបញ្ចាំងពីគុណតម្លៃនៃវិស័យធានារ៉ាប់រងនៅកម្ពុជា ពោលគឺការរួមចំណែកពង្រឹងសុខុមាលភាពនៅក្នុងសហគមន៍តាមរយៈវិស័យសុខភាព និងកីឡា ជាពិសេសគឺកីឡាបែបសហគមន៍។ សម្មភាពកីឡាមិនថាប្រភេទណាក៏ដោយ មិនត្រឹមជួយដល់សុខភាពរាងកាយ និងសុខភាពផ្លូវចិត្តប៉ុណ្ណោះទេ ថែមទាំងជួយពង្រឹងស្មារតីឯកភាព សាមគ្គីភាពរឹងមាំ បណ្ដុះស្មារតីមិនបោះបង់ និងភាពអត់ធ្មត់ សម្រាប់ប្អូនៗកុមារ ដែលនឹងជួយបណ្តុះធនធានសម្រាប់អនាគតកម្ពុជា។
ឯកឧត្ដម វ៉ាត់ ចំរើន រដ្ឋលេខាធិការតំណាងដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្រសួង និងគណៈកម្មាធិការជាតិអូឡាំពិកកម្ពុជា បានគាំទ្រយ៉ាងពេញទំហឹងចំពោះការផ្ដួចផ្ដើមរៀបចំព្រឹត្តិការណ៍បាល់ទាត់កុមារដ៏ធំមួយនេះ ព្រោះជាការបំផុសយ៉ាងសំខាន់ដល់កុមារចូលរួមលេងកីឡា។ ឯកឧត្ដមសង្កត់ធ្ងន់ថា កីឡាក៏ជាចលនាសង្គមមួយជួយអភិឌ្ឍផ្នែកសុខភាព សាមគ្គីភាព មិត្តភាព ស្មារតី ជាពិសេសការកសាងគុណភាពជីវិតមនុស្ស។
ព្រឹត្តិការណ៍កីឡាបាល់ទាត់កុមារ Daiichi Junior Cup នឹងចាប់ផ្ដើមយុទ្ធនាការជម្រុះរបស់ខ្លួននៅថ្ងៃទី៣១ ខែឧសភា ឆ្នាំ២០២៦ នៅទីលានផ្ការីកគ្រប់រដូវ រាជធានីភ្នំពេញ ហើយបន្តទៅខេត្តបាត់ដំបង ថ្ងៃទី២១ ខែមិថុនា និងលើកទី៣នៅខេត្តសៀមរាប ថ្ងៃទី២៦ ខែកក្កដា។
ចំណែកលើកទី៤ និងលើកទី៥នឹងវិលត្រលប់មករាជធានីភ្នំពេញវិញ ថ្ងៃទី១ និងថ្ងៃទី២ ខែសីហា ដែលជាដំណាក់កាលជម្រុះថ្នាក់ជាតិ និងវគ្គផ្ដាច់ព្រ័ត្រ ឬ Grand Final តែម្ដង៕
