ក្រុមកីឡាបាល់ទាត់យុវជនអាយុក្រោម ១៥ ឆ្នាំ (U15) នៃសមាគមកីឡាបាល់ទាត់កងយោធពលខេមរភូមិន្ទ ត្រៀមខ្លួនរួចរាល់ក្នុងការចេញទៅប្រកួតប្រជែងក្នុងព្រឹត្តិការណ៍កីឡាបាល់ទាត់យុវជនឆ្នើមអន្តរជាតិ «Silk Road 2026» នៅទីក្រុងឈានចូវ ខេត្តហ្វូជាន ប្រទេសចិន ដែលនឹងប្រព្រឹត្តទៅចាប់ពីថ្ងៃទី ៧ ដល់ថ្ងៃទី ១២ ខែសីហា ឆ្នាំ ២០២៦ ខាងមុខនេះ។
លោក ថោង ឧត្ដម អ្នកចាត់ការទូទៅនៃសមាគមកីឡាបាល់ទាត់កងយោធពលខេមរភូមិន្ទ បានលើកឡើងថា នេះជាឱកាសមាសដ៏កម្រមួយសម្រាប់កីឡាករវ័យក្មេងកម្ពុជា ក្នុងការបង្ហាញសមត្ថភាពលើឆាកអន្តរជាតិ បង្កើនបច្ចេកទេស និងក្រេបជញ្ជក់បទពិសោធប្រកួតពីក្រុមយុវជនឆ្នើមៗជាច្រើន។ លោកបានបន្តថា ទោះបីជាមិនបានដាក់រំពឹងខ្ពស់លើលទ្ធផលចាញ់ឈ្នះក៏ដោយ ប៉ុន្តែអ្វីដែលសំខាន់បំផុតគឺការរៀនសូត្រ អភិវឌ្ឍសមត្ថភាពកីឡាករ និងការរឹតចំណងមិត្តភាពរវាងប្រទេសទាំងពីរ។
ថ្នាក់ដឹកនាំរូបនេះបានបន្ថែមទៀតថា ថ្វីត្បិតតែក្រុម U15 ទ័ព ធ្លាប់មានបទពិសោធចេញទៅប្រកួតនៅក្រៅប្រទេសខ្លះៗក៏ដោយ ប៉ុន្តែការធ្វើដំណើរទៅកាន់ប្រទេសចិនលើកនេះ គឺកាន់តែពិសេស ដោយសារទទួលបានការឧបត្ថម្ភគាំទ្រយ៉ាងពេញទំហឹងពី សមាគមឈានចូវ និងសមាគមហ្វូជាននៅកម្ពុជា។ ជំនួយនេះ មិនត្រឹមតែជាការជ្រោមជ្រែងផ្នែកកីឡាប៉ុណ្ណោះទេ ប៉ុន្តែថែមទាំងជាស្ពានមិត្តភាព និងកិច្ចសហប្រតិបត្តិការយូរអង្វែង ក្នុងការរួមចំណែកអភិវឌ្ឍវិស័យបាល់ទាត់កម្ពុជាឱ្យកាន់តែរីកចម្រើន។
ជាមួយគ្នានេះដែរ លោក Ye ChangQing ប្រធានសមាគមឈានចូវនៅកម្ពុជា និងជាតំណាងក្រុមហ៊ុនឧបត្ថម្ភ បានសម្តែងនូវក្តីរីករាយយ៉ាងខ្លាំង ដែលបានចូលរួមគាំទ្រដល់សមាគមកីឡាបាល់ទាត់កងយោធពលខេមរភូមិន្ទ។ លោកបានគូសបញ្ជាក់ថា ព្រឹត្តិការណ៍បាល់ទាត់អន្តរជាតិមួយនេះ (ដែលមានការប្រកួតចាប់ពីកម្រិតអាយុ ៨ ឆ្នាំ ដល់ ១៥ ឆ្នាំ) គឺជាការផ្លាស់ប្ដូរបទពិសោធកីឡា និងវប្បធម៌ដ៏មានអត្ថន័យរវាងចិន និងកម្ពុជា។ លោកក៏បានជូនពរឱ្យក្រុមយុវជនកម្ពុជាទទួលបានបទពិសោធល្អៗ និងទទួលបានជោគជ័យក្នុងការប្រកួតនេះផងដែរ។
ដោយឡែក លោក ភួង សុខសាណា គ្រូបង្គោលក្រុមយុវជន U15 កងយោធពលខេមរភូមិន្ទ បានចាត់ទុកការប្រកួតនេះថាជា «តេស្តសមត្ថភាពដ៏សំខាន់» សម្រាប់កូនក្រុមរបស់លោក ដែលទើបតែប្រមូលផ្ដុំហ្វឹកហាត់រួមគ្នាបានប្រមាណ ៤ ខែប៉ុណ្ណោះ ហើយលោកជឿជាក់យ៉ាងមុតមាំថា ពួកគេនឹងអាចទាញយកបទពិសោធទាំងនេះមកអភិវឌ្ឍខ្លួនឱ្យកាន់តែខ្លាំងក្លានាពេលអនាគត៕
