ផ្អែកតាមផែនការប្រចាំឆ្នាំ គណៈកម្មាធិការជាតិអូឡាំពិកកម្ពុជាបានរៀបចំវគ្គសាមគ្គីអូឡាំពិកស្ដីពីរដ្ឋបាលកីឡានៅខេត្តតាកែវ ដោយមានកិច្ចសហការជាមួយនឹងមន្ទីរអប់រំ យុវជន និងកីឡា និងការិយាល័យកីឡាខេត្តតាកែវ ពីថ្ងៃទី១៨ដល់ថ្ងៃទី២១ ខែឧសភា ឆ្នាំ២០២៦ និងមានការចូលរួមពីសិក្ខាកាម២៥រូប ដែលទទួលបានមេរៀនសំខាន់ៗពីគ្រូឧទ្ទេសចំនួន៥រូប។
ជាក់ស្ដែង ឯកឧត្ដម វ៉ាត់ ចំរើន បានឧទ្ទេសផ្ដោតលើអត្ថប្រយោជន៍នៃកីឡា និងឥទ្ធិពលនៃកីឡាជាមួយនឹងកីឡាជំនាញមួយចំនួន។ ចំណែកលោកវេជ្ជបណ្ឌិត សុខ សារឿន បានឧទ្ទេសពីវេជ្ជសាស្ត្រកីឡាពាក់ព័ន្ធនឹងការការពាររបួសស្នាម ក៏ដូចជាពាក់ព័ន្ធនឹងអាហារូបត្ថម្ភ និងការជួយសង្គ្រោះបឋម។ ទី៣ លោក ឯម ហៀង បានឧទ្ទេសពាក់ព័ន្ធនឹងរូបមន្តនៃការប្រកួតកីឡា។ ទី៤ ឯកឧត្ដម ប៊ុយ សុភ័ណ្ឌ បានឧទ្ទេសពីរចនាសម្ព័ន្ធ និងសវតាមួយចំនួននៃកីឡាសង្គម និងចលនាអូឡាំពិក។ ទន្ទឹមនឹងនេះ ឯកឧត្តម ណយ ផាណា បានចូលរួមចែករំលែកពីមេរៀនស្ដីពីការរៀបចំផែនការប្រតិភូកីឡា និងការលេងដោយយុត្តិធម៌ (Fair Play) ក៏ដូចជាការកំណត់អត្តសញ្ញាណកីឡាទេពកោសល្យ។
ផ្អែកតាមការសិក្សារយៈពេល៤ថ្ងៃពេញ ឯកឧត្ដម ណយ ផាណា ជាគ្រូឧទ្ទេសក្នុងកម្មវិធីបានវាយតម្លៃខ្ពស់ចំពោះការយកចិត្តទុកដាក់របស់សិក្ខាកាមទាំង២៥រូបក្នុងការទទួលយកបទពិសោធដ៏មានតម្លៃពីលោកគ្រូឧទ្ទេសទាំងអស់។ ជាលទ្ធផល សិក្ខាកាម១៥រូបទទួលបាននិទ្ទេស A ស្មើនឹង៦៧ភាគរយ និងសិក្ខាកាម៩រូបទទួលបាននិទ្ទេស B ស្មើនឹង៣៧ភាគរយ។
នាព្រឹកនេះ ឯកឧត្តម ណយ ផាណា អគ្គលេខាធិការរង គណៈកម្មាធិការជាតិអូឡាំពិកកម្ពុជា (NOCC) និងជាគ្រូឧទ្ទេស ក្នុងវគ្គសាមគ្គីអូឡាំពិក ស្ដីពីរដ្ឋបាលកីឡា បានចូលបង្រៀនដល់សិក្ខាកាមទាំង២៥នាក់ ស្ដីពីការលេងដោយយុត្តិធម៌ (Fair Play), ការកំណត់អត្តសញ្ញាណ ទេពកោសល្យ ឬនិស្ស័យ(កីឡាករ) និង ផែនការធ្វើដំណើររបស់គណៈប្រតិភូ។
ឯកឧត្ដមអគ្គលេខាធិការរងក៏បានសង្កត់ធ្ងន់ថា ក្រោយឆ្លងកាត់វគ្គដ៏សំខាន់នេះ សិក្ខាកាមទាំងអស់នឹងបានដឹងអត្ថប្រយោជន៍ និងសក្ដានុពលនៃកីឡា ក៏ដូចជាកីឡាជំនាញកម្រិតខ្ពស់ និងព្រឹត្តិការណ៍កីឡាដែលធ្វើឱ្យបានយល់ពីរូបមន្តនៃការរៀបចំការប្រកួត។ ជាមួយគ្នានេះ សិក្ខាកាមបានដឹងពីរបៀបនៃការចៀសវៀងរបួសស្នាមអំឡុងការហ្វឹកហាត់ និងប្រកួត អាហារូបត្ថម្ភសម្រាប់កីឡាករ កីឡាការិនី។
ក្នុងនោះ សិក្ខាកាមបានយល់ដឹងពីសវតាចលនាអូឡាំពិក និងគុណតម្លៃអូឡាំពិក និងរចនាសម្ព័ន្ធសហព័ន្ធកីឡាជាតិ រចនាសម្ព័ន្ធគណៈកម្មាធិការជាតិអូឡាំពិក និងរចនាសម្ព័ន្ធគណៈកម្មាធិការអូឡាំពិកអន្តរជាតិផងដែរ។ មិនតែប៉ុណ្ណោះ សិក្ខាកាមបានយល់ដឹងពីការកំណត់ និងរៀបចំអត្តពលិកទេពកោសល្យ ថា កំណត់ដោយរបៀបណា ជ្រើសរើសពីប្រភពណា ថែរក្សាក្នុងកម្រិតណា មាននីតិវិធីក្នុងការជ្រើសរើសអត្តពលិកទេពកោសល្យវ័យក្មេង។ លើសពីនេះ ផែនការបេសកកម្មប្រតិភូកីឡា និងការលេងដោយយុត្តិធម៌ត្រូវបានបញ្ជ្រាបដល់សិក្ខាកាមគ្រប់រូប។ នេះជាចំណុចសំខាន់ៗដែលគណៈកម្មាធិការជាតិអូឡាំពិកមានគោលបំណងបញ្ជ្រាបដល់មន្ត្រីតាមខេត្តក្រោមឱវាទមន្ទីរ អប់រំ យុវជន និងកីឡា បានជ្រាបពីជំនាញ និងចំណេះដឹង។
ឆ្លៀតក្នុងឱកាសនោះ ឯកឧត្ដម ណយ ផាណា បានថ្លែងអំណរគុណចំពោះការសហការពីក្រសួងអប់រំ យុវជន និងកីឡា ដែលបានអនុញ្ញាតឱ្យគណៈកម្មាធិការជាតិអូឡាំពិកកម្ពុជាធ្វើសកម្មភាពជាមួយមន្ទីរអប់រំ យុវជន និងកីឡា និងការិយាល័យកីឡាខេត្តតាកែវ ប្រកបដោយភាពជោគជ័យតាំងពីដើមរហូតដល់ចប់៕
