ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និង កីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានវាយតម្លៃខ្ពស់ចំពោះកម្មវិធី កម្សាន្ដ«១ម៉ឺនជំហានដើម្បីសិស្ស១ម៉ឺននាក់» ដែលបានប្រព្រឹត្តទៅប្រកបដោយភាពជោគជ័យកាលពីព្រឹកថ្ងៃអាទិត្យ ទី៣១ ខែមិថុនា ឆ្នាំ២០២៦។
ជាក់ស្ដែង ឯកឧត្ដមរដ្ឋលេខាធិការសង្កត់ធ្ងន់ថា ដំណើរការរៀបចំ និងការចូលរួមសហការពីអាជ្ញាធរ ពិតជាមានភាពរលូន ដោយមិនមានបញ្ហាគ្រោះថ្នាក់ណាមួយកើតឡើងឡើយ ខណៈអ្នកចូលរួមរត់បានបង្ហាញភាពសប្បាយរីករាយ និងស្នាមញញឹមគ្រប់ៗគ្នា។
សូមជម្រាបជូនថា កម្មវិធីរត់កម្សាន្ត ១ម៉ឺនជំហានដើម្បីសិស្ស១ម៉ឺននាក់ ត្រូវបានរៀបចំឡើងដោយមានការសហការរវាងក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា(NOCC) សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន(ស.ស.រ) និងគ្រឹះស្ថានមីក្រូហិរញ្ញវត្ថុអម្រឹត និងក្រោមប្រធានបទ «រត់ ដើរ ដើម្បីលើកកម្ពស់ការអាន និងសារមន្ទីរ ស.ស.រ»។
សម្រាប់អ្នកចូលរួមទាំងខ្មែរ និង បរទេស ដោយបានចុះឈ្មោះមានប្រមាណ ៣.៧០០នាក់ និងអ្នកមិនបានចុះឈ្មោះផ្សេងទៀតសរុបខ្ទង់៤ពាន់នាក់ ។ ឯកឧត្ដមចាត់ទុកថា នេះគឺជាភាពជោគជ័យស្របតាមគុណតម្លៃនៃព្រឹត្តិការណ៍ក្នុងយុទ្ធនាការលើកកម្ពស់ការអានដល់ប្រជាពលរដ្ឋ។ នេះក៏ជាសកម្មភាពបំផុសប្រជាពលរដ្ឋចូលរួមលេងកីឡា ទទួលបាននូវសុខភាពល្អ ក៏ដូចជាបំផុសស្មារតីផ្នែកអំណាន ដើម្បីលើកកម្ពស់គុណភាព និងមូលធនមនុស្ស ស្របតាមគោលការណ៍រាជរដ្ឋាភិបាល។
ក្រៅពីរាជធានីភ្នំពេញ កម្មវិធីនេះក៏បានប្រព្រឹត្តទៅនៅក្នុងខេត្តចំនួន៥ផ្សេងទៀត រួមមាន បាត់ដំបង កំពត ស្វាយរៀង តាកែវ និង ស្ទឹងត្រែង ដើម្បីចូលរួមផ្សព្វផ្សាយ លើកកម្ពស់ការអាន និង ផ្សព្វផ្សាយអំពីសារមន្ទីរ ស.ស.រ ឲ្យ កាន់តែទូលំទូលាយ៕
