សហព័ន្ធកីឡាវ៉ូវីណាមកម្ពុជា បានទទួលការឧបត្ថម្ភគាំទ្រ ទាំងផលិតផល និងថវិកា ពីក្រុមហ៊ុន មីដាស សម្រាប់ដំណើរត្រៀមឆ្ពោះទៅធ្វើម្ចាស់ផ្ទះកីឡាវ៉ូវីណាមជើងឯកអាស៊ី លើកទី៦ នៅរាជធានីភ្នំពេញ នាថ្ងៃទី២១ ដល់ថ្ងៃទី២៧ ខែវិច្ឆិកា ឆ្នាំ២០២៦ ខាងមុខ។
ពិធីប្រគល់ទទួលជំនួយពីវិស័យឯកនេះ ធ្វើឡើងក្រោមវត្តមានឯកឧត្តម ឈួរ សុបញ្ញា អនុប្រធានសហព័ន្ធកីឡាវ៉ូវីណាមកម្ពុជា ព្រមទាំងតំណាងក្រុមហ៊ុន នៅថ្ងៃទី២៩ ខែឧសភា ឆ្នាំ២០២៦ នេះ នៅសាលហ្វឹកហាត់កីឡាវ៉ូវីណាម នៃមជ្ឈមណ្ឌលជាតិហ្វឹកហ្វឺនកីឡា។
ឆ្លៀតឱកាសនោះ ឯកឧត្តម ឈួរ សុបញ្ញា បានសម្ដែងនូវសេចក្ដីសោមនស្សរីករាយ ដែលក្រុមហ៊ុន មីដាស ក្នុងនាមក្រុមហ៊ុនផលិតនំជាង ២០ប្រភេទនៅកម្ពុជា បានមើលឃើញពីសកម្មភាពកីឡាវ៉ូវីណាម ហើយបានចូលរួមឧបត្ថម្ភគាំទ្រដល់សហព័ន្ធ ក៏ដូចជាកីឡាករ-កីឡាការិនី ដើម្បីត្រៀមធ្វើម្ចាស់ផ្ទះជើងឯកអាស៊ី នាចុងខែវិច្ឆិកា។
ឯកឧត្តមបន្ដថា ទោះបីការឧបត្ថម្ភតិចក្ដី ឬច្រើនក្ដី តែនេះគឺជាសមាចិត្តរបស់វិស័យឯកជន ដែលជាផ្នែកមួយដ៏សំខាន់ ក្នុងការរួមចំណែកអភិវឌ្ឍកីឡាជាតិ បន្ទាប់ពីរាជរដ្ឋាភិបាល ដែលមានក្រសួងអប់រំ យុវជន និងកីឡា ជាសេនាធិការ និងសហព័ន្ធ ។ ទាំងអស់នេះ គឺជាការផ្ដល់នូវភាពកក់ក្ដៅ និងជំរុញឆន្ទៈកាន់តែមោះមុត ដល់កីឡាករ-កីឡាការិនី ដើម្បីឆ្ពោះទៅរកការប្រកួតប្រជែងមេដាយជូនជាតិ ក្នុងនាមម្ចាស់ផ្ទះជើងឯកទ្វីបអាស៊ី។
អនុប្រធានសហព័ន្ធដដែលបន្ថែមទៀតថា ការទទួលធ្វើម្ចាស់ផ្ទះជើងឯកទ្វីបអាស៊ី គឺជាមោទនភាពជាតិ ដ្បិតសហព័ន្ធកីឡាវ៉ូវីណាមពិភពលោក ក៏ដូចជាបណ្ដាប្រទេសក្នុងទ្វីបអាស៊ី សុទ្ធតែបានគាំទ្រកម្ពុជា ក្នុងការទទួលរៀបចំព្រឹត្តិការណ៍ដ៏ធំនេះ ដោយសារការជឿជាក់ពីកត្ដាសុខសន្ដិភាពនៅកម្ពុជា ព្រមទាំងសក្ដានុពលរបស់ធនធានកីឡាករ-កីឡាការិនី ដែលទទួលបានលទ្ធផលដ៏ល្អប្រសើរក្នុងស៊ីហ្គេម ឆ្នាំ២០២៣ និងការប្រកួតជើងឯកពិភពលោក នៅឥណ្ឌូនេស៊ី កាលពីថ្មីៗ។
ឯកឧត្តមបានឲ្យដឹងថា មកទល់ពេលនេះ មានប្រទេសសមាជិកជាង ២០ប្រទេសហើយ ដែលបានចុះឈ្មោះចូលរួមព្រឹត្តិការណ៍នេះ ក្នុងនោះមានកីឡាករ-កីឡាការិនីសរុបជាង ២០០នាក់ ។ ក្នុងនាមម្ចាស់ផ្ទះ សហព័ន្ធក៏បានត្រៀមខ្លួនរួចរាល់ ដើម្បីត្រៀមទទួលបដិសណ្ឋារកិច្ចប្រតិភូគ្រប់បណ្ដាប្រទេស និងធានាបាននូវការរៀបចំប្រព្រឹត្តទៅដោយរលូន និងជោគជ័យផងដែរ៕
